बुधवार पेठेत मानवी तस्करीचा पर्दाफाश:ब्युटी पार्लरच्या नावाखाली देहविक्री रॅकेट, 4 बांगलादेशी तरुणींची सुटका; एकाला अटक

पुण्यातील बुधवार पेठ परिसरात ब्युटी पार्लर आणि शिलाई कामाच्या नोकरीचे आमिष दाखवून परदेशी तरुणींना देहविक्रीच्या दलदलीत ओढणाऱ्या एका रॅकेटचा फरासखाना पोलिसांनी पर्दाफाश केला आहे. या कारवाईत पोलिसांनी चार बांगलादेशी तरुणींची सुटका केली असून, या मानवी तस्करी प्रकरणातील आरोपी मुराद अहमद गौस शेख (मूळ रा. बांगलादेश) याला अटक करण्यात आली आहे. मिळालेल्या माहितीनुसार, या चारही तरुणींना बांगलादेशातून ‘ब्युटी पार्लर’मध्ये चांगल्या पगाराची नोकरी देण्याचे स्वप्न दाखवून भारतात आणले गेले होते. पुण्यात आणल्यानंतर त्यांना डांबून ठेवून जबरदस्तीने देहविक्रयाच्या व्यवसायात ढकलण्यात आले. बांगलादेशातून एका अनोळखी एजंटमार्फत त्यांना पुण्यातील बाबुभाई उर्फ पापा शेख याच्या ताब्यात देण्यात आले होते. त्यानंतर भूपसिंग रजपूत (रा. बुधवार पेठ, पुणे) याने महिलांची इच्छा नसताना त्यांना भीती घालून तसेच पैशाचे आमिष दाखवून कुंटणखाना मालकीण मीनाक्षी रमेश मेट्री हिच्यामार्फत स्वतःच्या फायद्यासाठी वेश्याव्यवसाय करून घेतला. पुणे पोलिसांच्या गुन्हे शाखेला या बेकायदेशीर कृत्याबद्दल गोपनीय माहिती मिळाली होती. या माहितीच्या आधारे पोलिसांनी पथक तयार करून बुधवार पेठेत छापा टाकला. या मोहिमेदरम्यान चार पीडित तरुणींची यशस्वी सुटका करण्यात आली. तसेच, त्यांना या व्यवसायात ओढणाऱ्या एका आरोपीला रंगेहात पकडण्यात आले. याप्रकरणी फरासखाना पोलीस ठाण्यात गुन्हा दाखल करण्यात आला आहे. सुटका करण्यात आलेल्या चारही तरुणींची रवानगी सध्या सुरक्षित महिला सुधारगृहात करण्यात आली आहे. या तरुणींकडे वैध पासपोर्ट किंवा व्हिसा आहे का, याचीही तपासणी पोलीस करत आहेत. मानवी तस्करी रोखण्यासाठी पुणे पोलिसांनी आपली मोहीम अधिक तीव्र केली असून, अशा प्रकारे फसवणूक करणाऱ्या टोळ्यांवर करडी नजर ठेवली जात आहे.