श्रीराम मंदिर निर्मितीतील योगदान परमभाग्य: ज्येष्ठ चित्रकार वासुदेव कामत:भारतीय संस्कृती संवर्धक संस्थेतर्फे कामत यांचा विशेष सत्कार

अयोध्येतील श्रीराम जन्मभूमीवरील मंदिराच्या भव्य निर्मितीमध्ये योगदान देण्याची संधी मिळाल्याबद्दल ज्येष्ठ चित्रकार वासुदेव कामत यांनी कृतज्ञता व्यक्त केली आहे. भारतीय संस्कृती संवर्धक संस्थेतर्फे (मोतीबाग) आयोजित कार्यक्रमात त्यांच्या विशेष सत्काराचे आयोजन करण्यात आले होते. यावेळी कामत यांनी हे माझे परमभाग्य असल्याचे म्हटले. ‘मोतीबाग’ कार्यालयात झालेल्या या कार्यक्रमात संस्थेचे अध्यक्ष राजीव जोशी आणि राष्ट्रीय स्वयंसेवक संघाच्या कसबा भागाचे संघचालक अँड प्रशांत यादव यांच्या हस्ते कामत यांना मानपत्र प्रदान करण्यात आले. यावेळी बोलताना कामत म्हणाले की, चित्र, संगीत, नृत्य, शिल्प यांसारख्या सर्व कला भारतीय संस्कृतीमध्ये जीवनाशी निगडित आहेत. आपल्या आचरणातच कलेचा स्पर्श आहे. जे काही करायचे ते सुंदर आणि उत्कृष्ट करायचे, हाच कलेचा संस्कार आहे. श्रीराम मंदिरात श्रीरामांचे दर्शन घेताना भाविकांना रामायणही पाहता यावे, या उद्देशाने तेथे रामायणातील पंच्याऐंशी प्रसंग कोरण्यात आले आहेत. या कामात मिळालेली संधी हे परमभाग्य आहे, असेही कामत यांनी नमूद केले. चित्रातून भावनिर्मिती झाली पाहिजे. केवळ सौंदर्यनिर्मिती नसावी. भावनिर्मिती करणाऱ्या चित्रांचा समाजावर परिणाम होतो. चित्रकाराने सतत निरीक्षण आणि रेखाचित्रण (स्केचिंग) करत राहिले पाहिजे. हाच त्याचा रियाज आहे. जेव्हा हे थांबेल, तेव्हा त्याची सर्जनशीलताही थांबेल, असे कामत यांनी सांगितले. आपली खरी ओळख संघाचा स्वयंसेवक किंवा कार्यकर्ता हीच आहे, असेही कामत यांनी स्पष्ट केले. श्रीराम मंदिराच्या निर्मितीमध्ये प्रत्येक जण सेवेची मोठी संधी मिळाली याच भावनेने काम करत आहे. कलाकाराने समाजातच राहायला हवे, कारण तो समाजाचा एक घटक आहे. कलेतून समाजप्रबोधन आवश्यक आहे, पण त्याने समाजमन दूषित होणार नाही, याचीही काळजी कलाकाराने घेतली पाहिजे, असे विचारही त्यांनी मांडले. यावेळी राजीव जोशी यांनी प्रास्ताविकामध्ये माहिती दिली की, ‘मोतीबाग’ कार्यालयात श्रीशिवराज्याभिषेक, श्रीरामपंचायतन, चाणक्यांचे गुरुकुल, विवेकानंद शिला स्मारक ही कामत यांची चित्रे प्रदर्शित करण्यात आली आहेत. संस्थेचे विश्वस्त राजू वालेकर यांनी सूत्रसंचालन केले.