पुणे होणार हरित शहर:सार्वजनिक ठिकाणी सौर ऊर्जा प्रकल्प राबवणार, महापौर मंजुषा नागपुरे यांची घोषणा

महापौर मंजुषा नागपुरे यांच्या हस्ते शुक्रवारी ‘मास्मा रिन्युएबल एनर्जी एक्स्पो २०२६’ या सौर ऊर्जा प्रदर्शनाचे उद्घाटन झाले. यावेळी बोलताना महापौर नागपुरे यांनी पुणे शहराला सौर ऊर्जेच्या माध्यमातून हरित आणि स्वयंपूर्ण बनवण्याची घोषणा केली. शिवाजीनगर येथील न्यू अ‍ॅग्रिकल्चर कॉलेज ग्राउंडवर सुरू असलेल्या या तीन दिवसीय प्रदर्शनाला नागरिकांचा चांगला प्रतिसाद मिळत आहे. उद्घाटनप्रसंगी मार्गदर्शन करताना महापौर नागपुरे यांनी पुण्याच्या सर्वांगीण आणि शाश्वत विकासासाठी सौर ऊर्जा हा एक प्रभावी पर्याय असल्याचे सांगितले. बदलत्या हवामान परिस्थिती आणि वाढत्या ऊर्जा गरजा लक्षात घेता, शहरात व्यावहारिक आणि अंमलबजावणीयोग्य सौर प्रकल्प राबवण्याची गरज त्यांनी अधोरेखित केली. त्या म्हणाल्या की, बसथांबे, उद्याने, सार्वजनिक स्वच्छतागृहे, शासकीय कार्यालये, शाळा, रुग्णालये तसेच महापालिकेच्या इमारतींवर सौर पॅनेल्स बसवून ऊर्जा निर्मिती करता येऊ शकते. सौर ऊर्जेवर चालणारे दिवे, सीसीटीव्ही यंत्रणा, डिजिटल माहिती फलक आणि मोबाईल चार्जिंग स्टेशन यांसारख्या सुविधा उभारल्यास शहर अधिक सक्षम आणि पर्यावरणपूरक बनेल, असा विश्वास त्यांनी व्यक्त केला. पारंपरिक विद्युत ऊर्जेवरील ताण कमी करण्यासाठी आणि प्रदूषणात घट घडवून आणण्यासाठी सौर ऊर्जेचा व्यापक वापर आवश्यक आहे. सौर ऊर्जा आणि इतर पर्यावरणपूरक ऊर्जास्रोतांचा समन्वय साधून पुण्याला हरित व स्वयंपूर्ण शहर बनविण्याचा संकल्प महापालिकेने करावा, असे आवाहनही त्यांनी केले. महापौर नागपुरे यांनी महाराष्ट्र सोलर मॅन्युफॅक्चरर्स असोसिएशनच्या प्रतिनिधींशी संवाद साधला. सार्वजनिक-खासगी भागीदारीतून प्रायोगिक सौर प्रकल्प राबवून ते टप्प्याटप्प्याने शहरभर विस्तारण्याची तयारी त्यांनी दर्शवली. पुण्याच्या विकासासाठी महापालिका सकारात्मक पावले उचलणार असल्याचे त्यांनी स्पष्ट केले. यावेळी नगरसेविका मंजुषा खेडेकर, स्वातंत्रवीर सावरकर यांचे नातू सत्यकी सावरकर, जर्मन इंडो इनोवेशन कॉरिडोर (GIIC) चे संस्थापक उपेंद्र बर्वे, मास्माचे अध्यक्ष अमित कुलकर्णी, उपाध्यक्ष प्रदीप खाडे आणि माजी अध्यक्ष शशिकांत वाकडे उपस्थित होते. प्रदर्शनात सौर ऊर्जा उत्पादनांबरोबरच महावितरण, महाराष्ट्र ऊर्जा विकास एजन्सी (मेडा) तसेच पुणे विद्यापीठाच्या स्कूल ऑफ एनर्जी स्टडीज विभागाचे स्टॉल्स नागरिकांचे लक्ष वेधून घेत आहेत. विविध सौर उपकरणे, रूफटॉप सिस्टिम्स, बॅटरी साठवण उपाय आणि ऊर्जा बचत तंत्रज्ञानाबाबत नागरिक माहिती घेत आहेत. हे प्रदर्शन आज (शनिवार) आणि उद्या (रविवार) सकाळी १० ते सायंकाळी ६ या वेळेत नागरिकांसाठी विनामूल्य खुले आहे. सौर ऊर्जा क्षेत्रातील नव्या तंत्रज्ञानाची माहिती व खरेदीची संधी उपलब्ध करून देणारे हे एक महत्त्वाचे व्यासपीठ ठरत आहे.