पुणे शहराचा चेहरा तीन-चार वर्षांत पूर्णपणे बदललेला दिसेल:पायाभूत सुविधा बळकट करण्यावर सरकारचे काम; पोलिस आयुक्तांचा विश्वास

पुणे पोलिस आयुक्त अमितेश कुमार यांनी विश्वास व्यक्त केला आहे की, पुणे शहरातील पायाभूत सुविधा बळकट करण्याच्या दिशेने सरकार चांगले काम करत आहे. यामुळे पुढील तीन ते चार वर्षांत शहराचा चेहरा पूर्णपणे बदललेला दिसेल. ते द इंडियन इन्स्टिट्यूट ऑफ आर्किटेक्ट्सच्या (आयआयए) पुणे शाखेने आयोजित केलेल्या एका पुरस्कार सोहळ्यात बोलत होते. आयुक्तांच्या मते, शहरात उड्डाणपूल आणि मेट्रोचा विस्तार यांसारखी अनेक विकासकामे सुरू आहेत. यामुळे पायाभूत सुविधांना बळकटी मिळेल आणि वाहतूक व्यवस्था सुधारण्यास मदत होईल. हा पुरस्कार सोहळा डी. पी. रस्त्यावरील बोगनविला फार्म्स येथे आयोजित करण्यात आला होता. यावेळी वास्तुविशारद क्षेत्रात केलेल्या उल्लेखनीय कार्याबद्दल ज्येष्ठ वास्तुविशारद अनुराग कश्यप, व्ही. व्ही. बडवे, नरेंद्र डेंगळे आणि रामचंद्र गोहाड यांना ‘आयआयए एस. के. बेलवलकर अवॉर्ड फॉर एक्सलन्स इन प्रोफेशन’ देऊन सन्मानित करण्यात आले. याव्यतिरिक्त, वास्तुविशारद क्षेत्रात शिक्षण देणाऱ्या डॉ. अस्मिता पेठे, विनिश देसाई आणि अस्मिता जोशी यांना ‘आयआयए एस. जे. कॉन्ट्रॅक्ट्स अवॉर्ड फॉर एक्सलन्स इन टीचिंग’ हा पुरस्कार प्रदान करण्यात आला. या कार्यक्रमाला इंडियन इन्स्टिट्यूट ऑफ आर्किटेक्ट्सच्या पुणे शाखेचे अध्यक्ष विकास अचलकर, उपाध्यक्ष सीतेश अग्रवाल, समीर बेलवलकर आणि सौरभ जांगले यांच्यासह अनेक मान्यवर उपस्थित होते. पुरस्कार वितरणानंतर विकास अचलकर, सीतेश अग्रवाल आणि संदीप महाजन यांनी पोलीस आयुक्तांशी संवाद साधला. पोलीस आयुक्तांनी यावेळी सांगितले की, पोलीस आयुक्तालयाच्या अंतर्गत येणाऱ्या काही पोलीस ठाण्यांच्या इमारती भाडेतत्त्वावर आहेत, तर काही जुन्या झाल्या आहेत. या इमारतींच्या नूतनीकरणाची प्रक्रिया सुरू आहे. तसेच, पोलीस आयुक्तालयाच्या नवीन इमारतीचे बांधकाम सुरू असून ते पुढील दोन वर्षांत पूर्ण होईल. शहरातील उड्डाणपुलांखालील मोकळ्या जागेचा चांगल्या कामासाठी उपयोग करण्याची आवश्यकता त्यांनी व्यक्त केली. या जागांचे सुशोभीकरण केल्यास शहराच्या सौंदर्यात भर पडेल, असे आयुक्तांनी नमूद केले. वास्तुविशारद हे कल्पक लोक असतात, त्यांच्याकडून सहसा चुका होत नाहीत. मात्र, काम करताना चुकीच्या कागदपत्रांवर सही होणार नाही याची खबरदारी त्यांनी घ्यावी, असे आवाहन आयुक्तांनी केले. पोलीस प्रशासन शहरातील वास्तुविशारदांना विनाकारण त्रास देणार नाही याची काळजी घेईल, असे आश्वासनही त्यांनी दिले. नवीन इमारती उभारताना पार्किंगसाठी पुरेशी जागा असावी, तसेच रुग्णवाहिका आणि अग्निशमन दलाच्या गाड्यांना ये-जा करण्यासाठी पुरेसा मार्ग असावा, यावरही अमितेश कुमार यांनी भर दिला.