सालबर्डी यात्रेसाठी 100 अतिरिक्त एसटी बसेस:अमरावती, मोर्शी, वरुडहून 50 हजार प्रवाशांना सेवा; 30 लाखांचे उद्दीष्ट

महाशिवरात्री यात्रेनिमित्त १५ फेब्रुवारीपासून सुरू होणाऱ्या सालबर्डी यात्रेसाठी एसटी महामंडळाने १०० अतिरिक्त बसेसची व्यवस्था केली आहे. या बसेसद्वारे अमरावती, मोर्शी आणि वरुड येथून सुमारे ५० हजार प्रवाशांना सेवा पुरवली जाईल. या विशेष सेवेतून महामंडळाने ३० लाख रुपयांच्या अतिरिक्त उत्पन्नाचे उद्दीष्ट ठेवले आहे. सालबर्डी यात्रा ही बहिरमनंतर जिल्ह्यातील सर्वात मोठी यात्रा मानली जाते. या यात्रेतून दरवर्षी एसटी महामंडळाला अतिरिक्त उत्पन्न मिळते, तसेच महाराष्ट्र आणि मध्यप्रदेशातील दूरच्या गावांहून येणाऱ्या प्रवाशांना वाहतूक सेवा उपलब्ध होते. अमरावती आगारात एकूण ४२६ एसटी बसेस आहेत. त्यापैकी काही लांब पल्ल्याच्या फेऱ्या रद्द करून ही वाहने यात्रेसाठी वापरली जातील. बारावीच्या परीक्षा आणि जिल्ह्यातील ग्रामीण भागातील दळणवळणावर कोणताही परिणाम होणार नाही, याचीही काळजी घेतली जात आहे. एसटीचे विभाग नियंत्रक नरेंद्र बेलसरे यांनी या नियोजनाची तयारी पूर्ण केली आहे. सातपुडा पर्वताच्या पायथ्याशी, महाराष्ट्र आणि मध्यप्रदेशच्या सीमेवर ही यात्रा भरते, त्यामुळे दोन्ही राज्यांचे प्रशासन यावर नियंत्रण ठेवते. यात्रेकरूंसाठी अमरावती, मोर्शी आणि वरुड येथून धावणाऱ्या बसेस थांबवण्यासाठी सालबर्डीत तीन एकर जागा भाड्याने घेण्यात आली आहे. येथे तात्पुरते आगार उभारून बसेसची व्यवस्था करण्यात आली आहे. सालबर्डीप्रमाणेच कोंडेश्वर येथील यात्रेसाठीही एसटीने तयारी केली आहे. कोंडेश्वरसाठी राजापेठ आणि बडनेरा येथून सात ते आठ अतिरिक्त बसेस धावतील, ज्या सुमारे १२० फेऱ्या करतील. यातून एक लाख रुपयांचे अतिरिक्त उत्पन्न अपेक्षित आहे. वाहतूक नियंत्रणासाठी १५ अधिकारी सालबर्डी यात्रेत रात्रंदिवस कार्यरत राहतील. यात्रास्थळी उभारलेल्या तात्पुरत्या डेपोमध्ये हे अधिकारी आठ-आठ तासांच्या तीन पाळ्यांमध्ये काम करतील. अमरावतीहून सालबर्डीकडे जाताना मार्गातील मोठ्या गावांमध्येही एसटी कर्मचारी तैनात असतील. हे कर्मचारी मोबाईलवर अमरावतीच्या नियंत्रण कक्षाशी संपर्क साधून, एखाद्या थांब्यावर प्रवाशांची मोठी गर्दी झाल्यास तेथे बस मागवण्याची व्यवस्था करतील.