अमरावती पोलीस भरती: पहिल्या दिवशी 225 उमेदवार गैरहजर:800 पैकी 49 जण अपात्र ठरले, 214 जागांसाठी 21 हजार अर्ज

अमरावती येथील पोलीस कवायत मैदानावर बुधवारपासून सुरू झालेल्या पोलीस भरती प्रक्रियेत पहिल्याच दिवशी ८०० पैकी २२५ उमेदवार गैरहजर राहिले. उपस्थित ५७५ उमेदवारांपैकी ४९ जण कागदपत्र पडताळणी आणि शारीरिक चाचणीदरम्यान अपात्र ठरले. जिल्ह्याच्या ग्रामीण पोलीस दलात २१४ जागा रिक्त असून, त्यासाठी राज्यभरातून तब्बल २१ हजार २०६ उमेदवारांनी ऑनलाइन अर्ज दाखल केले आहेत. या भरतीसाठी पोलीस विभागातर्फे सर्व अर्जदारांना बोलावणे पाठवण्यात आले आहे. आजच्या पहिल्या दिवशी ८०० उमेदवारांची शारीरिक क्षमता चाचणी आणि कागदपत्रांची पडताळणी नियोजित होती. गेल्या वर्षभरापासून अनेक तरुण-तरुणी या भरतीसाठी तयारी करत होते. एका जागेसाठी सरासरी ९९ उमेदवारांनी अर्ज केले असून, यामध्ये बारावी उत्तीर्ण ते उच्चशिक्षित उमेदवारांचा समावेश आहे. भरती प्रक्रियेनुसार, ११ ते २३ फेब्रुवारीदरम्यान पुरुष उमेदवारांच्या तर २४ ते २६ फेब्रुवारीदरम्यान महिला उमेदवारांच्या कागदपत्रांची पडताळणी आणि शारीरिक चाचण्या घेतल्या जाणार आहेत. सर्व उमेदवारांच्या शारीरिक चाचण्या पहाटे ५ वाजतापासून सुरू होतील. एकूण अर्जदारांमध्ये १६ हजार २८६ पुरुष आणि ४ हजार ९२० महिलांचा समावेश आहे. भरती प्रक्रिया नियोजित वेळेत पूर्ण करण्यासाठी, सुरुवातीला दररोज ८०० उमेदवारांना बोलावले जात असले तरी, शुक्रवारपासून दररोज २ हजार उमेदवारांना शारीरिक चाचणीसाठी पाचारण करण्यात येणार आहे. जिल्हा ग्रामीण पोलीस अधीक्षकांनी या माहितीला दुजोरा दिला असून, २६ फेब्रुवारीपर्यंत संपूर्ण भरती प्रक्रिया पूर्ण करण्यासाठी हे आवश्यक असल्याचे म्हटले आहे. या भरती प्रक्रियेत प्रवर्गनिहाय आरक्षण निश्चित करण्यात आले आहे. २१४ जागांपैकी ६९ उमेदवार सर्वसाधारण प्रवर्गातील असतील, तर महिलांसाठी ६४ जागा राखीव आहेत. खेळाडू, प्रकल्पग्रस्त, होमगार्ड आणि अंशकालीन पदवीधर यांच्यासाठी प्रत्येकी १० जागा निश्चित करण्यात आल्या आहेत. उमेदवारांनी भरतीसाठी येताना शैक्षणिक कागदपत्रांसह प्रवर्ग, जात-जमाती आणि इतर सर्व आवश्यक कागदपत्रांच्या छायांकित प्रती सोबत आणाव्यात. भरतीस्थळी मोबाईल, कॅमेरा किंवा कोणत्याही मौल्यवान व इलेक्ट्रॉनिक वस्तू नेण्यास सक्त मनाई आहे. एकदा प्रवेश मिळाल्यानंतर कोणत्याही कारणास्तव बाहेर जाता येणार नाही, असेही स्पष्ट करण्यात आले आहे. बाहेरगावाहून येणाऱ्या उमेदवारांसाठी जोग स्टेडियम येथे मुक्कामाची सोय उपलब्ध करून देण्यात आली आहे.