अवघा रंग एक झाला!:राज्यभरात आषाढी एकादशीचा भक्तीमय उत्साह, पंढरीत भाविकांचा महासागर

आषाढी एकादशीनिमित्त आज सकाळपासूनच राज्यभरात आनंदाचे आणि भक्तीमय वातावरण पाहायला मिळत आहे. आज पहाटे पंढरपुरात मुख्यमंत्र्यांच्या हस्ते विठूरायाची शासकीय महापूजा पार पडली. यावेळी त्यांनी ‘राज्यात चांगला पाऊस पडून पीक बहरू दे आणि महाराष्ट्र समृद्ध होऊ दे,’ अशी प्रार्थना पांडुरंगाचरणी केली. राज्याच्या इतर भागांतही आषाढीचा मोठा उत्साह दिसून येत असून विठुरायाच्या दर्शनासाठी मंदिरांमध्ये भाविकांची मोठी मांदियाळी जमली आहे. अनेक शहरे आणि गावांमध्ये पालखी तसेच दिंडीचे आयोजन करून विठूनामाचा जयघोष केला जात असल्याने सर्वत्र चैतन्याचे वातावरण निर्माण झाले आहे. आषाढी एकादशीच्या पवित्र पर्वानिमित्त विठ्ठल-रुक्मिणीचे दर्शन आणि चंद्रभागा नदीत पवित्र स्नान करण्यासाठी लाखो वारकरी व भाविक पंढरपुरात दाखल झाले असून, त्यांच्या विठ्ठलनामाच्या जयघोषाने संपूर्ण पंढरपूर नगरी दुमदुमून गेली आहे. तसेच चंद्रभागा तीर आणि प्रदक्षिणा मार्गावर भाविकांची प्रचंड गर्दी पाहायला मिळत आहे. वडाळ्यात मुंबईच्या महापौरांकडून विठुरायांची पूजा आषाढी एकादशीनिमित्त ‘मुंबईचे प्रति पंढरपूर’ अशी ओळख असलेल्या वडाळा येथील विठ्ठल मंदिरात परंपरेनुसार मुंबईच्या महापौर रितू तावडे यांच्या हस्ते पहाटे सहकुटुंब अभिषेक पूजा संपन्न झाली. यावेळी त्यांचे पती राजेश तावडे यांच्यासह इतर मान्यवर उपस्थित होते. मुंबईच्या महापौर या नात्याने विठुरायाची पूजा करण्याचा हा बहुमान मिळाल्याने आपले मन भरून आल्याची कृतज्ञतापूर्ण भावना व्यक्त करत, महापौर तावडे यांनी सर्व मुंबईकर आणि वारकरी बांधवांना आषाढी एकादशीच्या मनःपूर्वक शुभेच्छा दिल्या. सावंतवाडीत 60 फुटांची भव्य विठ्ठल मूर्ती आषाढी एकादशीच्या पूर्वसंध्येला सिंधुदुर्ग जिल्ह्यातील सावंतवाडी तालुक्यातील माजगाव येथे भक्ती आणि कलेचा एक अनोखा संगम पाहायला मिळत आहे, जिथे कुडाळचे डॉ. अनिकेत निब्रे यांनी आपल्या शेतात नदीतील दगड-गोटे आणि रानफुलांचा कल्पक वापर करून तब्बल 60 फुटांची भव्य विठ्ठल मूर्ती साकारली आहे. निसर्गाच्या सान्निध्यात उभी राहिलेली ही आकर्षक कलाकृती पंचक्रोशीतील नागरिकांसाठी श्रद्धा आणि कौतुकाचा विषय ठरली असून, विठुरायाचे हे लोभस रूप डोळे भरून पाहण्यासाठी भाविक व ग्रामस्थ मोठ्या संख्येने गर्दी करत आहेत. साजगावच्या ‘धाकट्या पंढरीत’ भाविकांची मांदियाळी आषाढी एकादशीनिमित्त रायगड जिल्ह्यातील ‘धाकटी पंढरी’ म्हणून प्रसिद्ध असलेल्या साजगाव येथील विठ्ठल-रुक्मिणी मंदिरात पहाटेपासूनच जिल्ह्याच्या कानाकोपऱ्यातून आलेल्या हजारो भाविकांनी दर्शनासाठी मोठी गर्दी केली असून, संपूर्ण परिसर टाळ-मृदुंगाच्या गजराने आणि ‘विठ्ठल… विठ्ठल…’ च्या नामघोषाने दुमदुमून गेला आहे. प्रत्यक्ष पंढरपूरला जाता न आलेल्या अनेक वारकऱ्यांनी या धाकट्या पंढरीत विठुरायाचे दर्शन मिळाल्याचे समाधान व्यक्त केले; तर मंदिर प्रशासनाकडूनही दर्शनरांग, पिण्याचे पाणी आणि सुरक्षेची चोख व्यवस्था ठेवण्यात आल्याने भाविकांना शिस्तबद्ध पद्धतीने दर्शन घेता आले. नागपुरात आषाढीचा जागर; विठ्ठल मंदिरांमध्ये भाविकांची गर्दी आषाढी एकादशीनिमित्त नागपूर जिल्ह्यातील विविध विठ्ठल मंदिरांमध्ये पहाटेपासूनच भक्तांची मोठी गर्दी पाहायला मिळत असून, विशेषतः निर्मल नगरीतील विठ्ठल-रुक्मिणी मंदिर आकर्षक फुलांच्या सजावटीने आणि विद्युत रोषणाईने उजळून निघाले आहे. रंगीबेरंगी सजावट आणि पारंपरिक पूजेच्या वातावरणात पहाटेपासूनच काकड आरती, महापूजा तसेच प्रसादाचे आयोजन करण्यात आले असून, ‘ज्ञानोबा-तुकाराम’ आणि हरिनामाच्या जयघोषाने संपूर्ण मंदिर परिसर भक्तीमय झाला आहे; तसेच या चैतन्यमयी वातावरणात नागपूरकर भाविक मोठ्या श्रद्धेने विठुरायाच्या चरणी नतमस्तक होत आहेत. या संदर्भातील ही देखील बातमी वाचा …आणिक दर्शन विठोबाचे!:पंढरपुरात पहाटे 3 वा. मुख्यमंत्र्यांच्या हस्ते सपत्नीक महापूजा; सलग 20 वर्षे वारी करणाऱ्या धाराशिवच्या माने दांपत्याला पूजेचा मान श्री क्षेत्र पंढरपूर येथे आषाढी एकादशीनिमित्त शनिवारी पहाटे ३ च्या सुमारास श्री विठ्ठल-रुक्मिणी मातेची शासकीय महापूजा संपन्न झाली. मुख्यमंत्री देवेंद्र फडणवीस आणि त्यांच्या पत्नी अमृता फडणवीस व मानाचे वारकरी दांपत्य यांच्या हस्ते परंपरेनुसार ही पूजा झाली. यंदा मुख्यमंत्र्यांसमवेत पूजा करण्याचा मान धाराशिव जिल्ह्यातील गौरगांवच्या बाबासाहेब माने (वय ७०) व प्रभावती माने (वय ६८) या वारकरी दांपत्यास मिळाला. शेतकरी असलेले माने दांपत्य गेल्या २० वर्षांपासून पंढरपूरची वारी करते. सविस्तर वाचा