वडाळ्यात मसाजवालीचा महिला ग्राहकावर हल्ला:बूक केलेली अपॉईंटमेंट रद्द केल्याने राडा, VIDEO व्हायरल

मुंबईच्या वडाळा पूर्व येथील एका 46 वर्षीय महिलेने आरोप केला आहे की, बुक केलेली मसाज सेवा रद्द केल्यानंतर ‘अर्बन कंपनी’शी संबंधित एका मसाजवालीने तिच्यावर शारीरिक आणि शाब्दिक हल्ला केला. ही घटना बुधवारी संध्याकाळी घडली असून, याबाबत वडाळा ट्रक टर्मिनल (टीटी) पोलिसांना माहिती देण्यात आली आहे. या घटनेचा एक व्हिडिओ सोशल मीडियावर चांगलाच व्हायरल होत असून, यात ग्राहक आणि मसाजवाली यांच्यातील शिवीगाळ व मारहाण झाल्याचे दिसून येत आहे. व्हायरल व्हिडिओमध्ये, मसाज करणारी महिला घराच्या बेडरूममध्ये उभी असून तिच्या मोबाइलमध्ये ती महिला ग्राहकाचे रेकॉर्डिंग करत असल्याचे दिसून येत आहे. सुरुवातीला, ग्राहकाने तिला घरातून जाण्यास सांगितले. “घरात उभे राहून गैरवर्तन करू नकोस,” असे ती महिला व्हिडिओमध्ये म्हणताना ऐकू येते. मात्र ती महिला ऐकत नाही. काही क्षणातच दोघी एकमेकींना मारहाण करू लागतात, आणि नंतरच्या दृश्यांमध्ये ती महिला ग्राहक मसाज करणाऱ्या महिलेला पलंगावर ढकलून देताना दिसते. त्यानंतर, मसाज करणारी महिला त्या ग्राहकाचे केस पकडताना दिसते. “ही एक वेडी बाई आहे. ती माझ्या घरात आली आणि माझ्या आईला मारायला लागली,” असे या घटनेचे चित्रीकरण करणारा त्या महिलेचा मुलगा म्हणताना ऐकू येतो. “मी पोलिसांना बोलावणार, तुझे करिअर संपले,” असेही तो पुढे म्हणताना ऐकू येतो. घटनेचा व्हिडिओ पहा शहनाज वाहिद सय्यद, ज्या वाडाळा पूर्व येथील भक्ती पार्कमध्ये आपल्या 18 वर्षीय मुलासोबत राहणाऱ्या जनसंपर्क व्यावसायिक आहेत, त्यांनी फ्रोझन शोल्डरच्या वेदनांसाठी अर्बन कंपनीद्वारे मसाज सेशन बुक केले होते. थेरपिस्टचा पोर्टेबल मसाज बेड खराब अवस्थेत आणि आपल्या घरासाठी अयोग्य असल्याचे पाहून त्यांनी ही अपॉइंटमेंट रद्द केली. पोलिसांनी पुष्टी केली की, या रद्द करण्याच्या प्रकारामुळे वाद झाला, ज्याचे रूपांतर कथितरित्या शारीरिक हल्ल्यात झाले. सय्यद यांनी मसाज करणाऱ्या महिलेवर मारहाणीचे आरोप केले आहेत.