महापालिकेनंतर आता जिल्हा परिषदेचे रणशिंग:राष्ट्रवादीची 40 स्टार प्रचारकांची यादी जाहीर, कोणकोणत्या दिग्गजांचा समावेश?

राज्यातील २९ महानगरपालिकांच्या निवडणुकीचा धुरळा खाली बसत नाही, तोच आता जिल्हा परिषद आणि पंचायत समित्यांच्या निवडणुकीची रणधुमाळी सुरू झाली आहे. या निवडणुकीसाठी राजकीय पक्षांनी कंबर कसली असून, राष्ट्रवादी काँग्रेस अजित पवार गटाने आज आपल्या ४० स्टार प्रचारकांची जंगी यादी जाहीर केली आहे. पक्षाचे प्रदेशाध्यक्ष खासदार सुनिल तटकरे यांनी या ही माहिती दिली. महानगरपालिकांच्या निकालांनी राज्याचे राजकीय वातावरण तापलेले असतानाच आता ग्रामीण भागातील ‘मिनी मंत्रालय’ मानल्या जाणाऱ्या जिल्हा परिषदांसाठी अर्ज भरण्याची प्रक्रिया सुरू झाली आहे. राष्ट्रवादी काँग्रेसने जाहीर केलेल्या या ४० प्रचारकांच्या माध्यमातून पक्ष ग्रामीण भागात आपले वर्चस्व निर्माण करण्याचा प्रयत्न करणार आहे. या यादीमध्ये अल्पसंख्याक समाजाचे नेते, महिला प्रतिनिधी आणि युवक नेत्यांचा समतोल साधण्यात आला आहे. राष्ट्रवादी काँग्रेसच्या ४० स्टार प्रचारकांची यादी या यादीत उपमुख्यमंत्री अजित पवार, राष्ट्रीय कार्याध्यक्ष प्रफुल्ल पटेल, प्रदेशाध्यक्ष सुनिल तटकरे आणि ज्येष्ठ नेते छगन भुजबळ यांचा प्रामुख्याने समावेश आहे. विशेष म्हणजे, अलीकडेच चर्चेत असलेले नवाब मलिक आणि झिशान सिद्दीकी यांनाही स्टार प्रचारक म्हणून जबाबदारी देण्यात आली आहे. प्रमुख स्टार प्रचारक खालीलप्रमाणे: मंत्रिमंडळातील चेहरे: दिलीप वळसे पाटील, हसन मुश्रीफ, धनंजय मुंडे, आदिती तटकरे, संजय बनसोडे, अनिल भाईदास पाटील, नरहरी झिरवाळ आणि धर्मरावबाबा आत्राम. खासदार: सुनेत्रा पवार आणि नितीन पाटील. इतर महत्त्वाचे नेते: रूपाली चाकणकर (महिला प्रदेशाध्यक्षा), अमोल मिटकरी, सुरज चव्हाण, समीर भुजबळ आणि शिवाजीराव आढळराव पाटील. ग्रामीण भागावर लक्ष केंद्रीत करण्याची रणनिती महापालिका निवडणुकांनंतर लगेचच जिल्हा परिषद आणि पंचायत समितीच्या निवडणुका होत असल्याने, ग्रामीण मतदारांपर्यंत पोहोचण्यासाठी राष्ट्रवादी काँग्रेसने ताकदवान प्रचार यंत्रणा उभी केली आहे. अनुभवी नेते, संघटनात्मक पदाधिकारी आणि विविध समाजघटकांचे प्रतिनिधी यांचा समन्वय साधत प्रचार अधिक प्रभावी करण्याची रणनिती आखण्यात आली आहे. जिल्हा परिषद आणि पंचायत समिती निवडणुकांच्या पार्श्वभूमीवर राष्ट्रवादी काँग्रेसने स्टार प्रचारकांची यादी जाहीर करत रणांगणात उतरण्याची तयारी पूर्ण केल्याचे स्पष्ट झाले आहे. आगामी काही दिवसांत प्रचाराचा जोर वाढणार असून, ग्रामीण महाराष्ट्रातील राजकारण तापण्याची चिन्हे दिसत आहेत.