Case registered against Ash-Shifa Clinic doctors; Husband sold house for treatment | अश-शिफा क्लिनिकच्या डॉक्टरांवर गुन्हा दाखल; पतीने उपचारार्थ घरदार विकले: युनानी डाॅक्टरच्या चुकीच्या उपचारामुळे 203 दिवसांपासून 28 वर्षांची महिला व्हेंटिलेटरवर – Chhatrapati Sambhajinagar News

.

तक्रारदार बाबा खान मियाँ खान यांची पत्नी रईसा खान हिला डोळ्यांचा त्रास होत होता. १२ जून २०२५ रोजी ती शहाबाजार परिसरातील दवाखान्यात जात असताना, वरच्या मजल्यावर असलेल्या अश-शिफा चॅरिटेबल क्लिनिकमध्ये गेली. तेथील डॉ. मोहंमद इब्राहिम सौदागर यांनी रईसाला तपासून डोळ्यांच्या तज्ज्ञाकडे न पाठवता स्वतःच काही हाय-डोस ॲलोपॅथी गोळ्या लिहून दिल्या.

उपचारासाठी संसार उघड्यावर

तक्रारदार बाबा खान यांनी पत्नीला वाचवण्यासाठी प्लॉट, दुचाकी आणि इतर वाहने विकली असून सुमारे १५ ते १६ लाख रुपये खर्च केले आहेत.

वैद्यकीय समितीचा अहवाल ठरला निर्णायक

या प्रकरणाच्या चौकशीत शासकीय वैद्यकीय महाविद्यालय व रुग्णालयाच्या (घाटी) समितीने धक्कादायक माहिती दिली. आरोपी मोहंमद इब्राहिम सौदागर हे BUMS (युनानी) डॉक्टर असून त्यांना ॲलोपॅथी औषधे देण्याची कायदेशीर परवानगी नाही. तरीही त्यांनी जाणीवपूर्वक ही औषधे दिल्याने महिलेचा जीव धोक्यात आल्याचा स्पष्ट अभिप्राय समितीने दिला आहे.

गोळ्यांच्या दुष्परिणामाने महिलेचा चेहरा विद्रूप

डॉक्टरांनी दिलेल्या गोळ्या घेतल्यावर अवघ्या दोनच दिवसांत रईसाच्या शरीरावर त्याचे तीव्र दुष्परिणाम दिसून आले. तिचा चेहरा पूर्णपणे विद्रूप होऊन चेहऱ्यावर गंभीर जखमा झाल्या. प्रकृती खालावल्याने तिला १६ जून २०२५ रोजी एमजीएम रुग्णालयात दाखल करण्यात आले. तेव्हापासून रईसा व्हेंटिलेटरवर असून तिला अन्न घेणे किंवा स्वतःहून श्वास घेणेही कठीण झाले आहे.