पुण्यात भाजप उमेदवार पूजा मोरे यांच्या माघारीनंतरचा वाद आता स्थानिक राजकारणाच्या चौकटीबाहेर जात राज्यव्यापी सामाजिक संघर्षाचं रूप घेताना दिसत आहे. या प्रकरणात ओबीसी नेते लक्ष्मण हाके यांनी मराठा आंदोलक मनोज जरांगे पाटील यांच्यावर अप्रत्यक्ष निशाणा सा
.
पुणे महानगरपालिका निवडणुकीच्या पार्श्वभूमीवर राजकीय वातावरण चांगलंच तापलं असतानाच प्रभाग क्रमांक 2 मधून भाजपच्या तिकीटावर उमेदवारी अर्ज दाखल केलेल्या पूजा मोरे यांना अखेर निवडणूक रिंगणातून माघार घ्यावी लागली आहे. सोशल मीडियावर सुरू असलेल्या तीव्र टीका आणि ट्रोलिंगमुळे पूजा मोरे आणि त्यांचे पती धनंजय जाधव यांनी उमेदवारी अर्ज मागे घेण्याचा निर्णय घेतल्याचं समोर आलं आहे. या निर्णयानंतर भावनिक झालेल्या पूजा मोरे यांच्या डोळ्यांत पाणी आल्याचं दृश्य अनेकांनी पाहिलं. मात्र त्यांच्या या माघारीनंतर राजकीय वाद संपण्याऐवजी आणखी पेटल्याचं चित्र आहे.
पूजा मोरे यांनी यापूर्वी पहलगाम हल्ल्यानंतर दिलेली प्रतिक्रिया तसेच मराठा आरक्षण आंदोलनादरम्यान मुख्यमंत्री देवेंद्र फडणवीस यांच्यावर केलेली टीका पुन्हा एकदा चर्चेत आली. याच वक्तव्यांच्या आधारे भाजप कार्यकर्त्यांकडून त्यांना मोठ्या प्रमाणावर सोशल मीडियावर ट्रोल करण्यात येत होतं. या सततच्या टीकेमुळे आणि दबावामुळे अखेर पूजा मोरे यांनी पुणे महापालिकेच्या निवडणुकीतून माघार घेतल्याचं सांगितलं जात आहे. उमेदवारी अर्ज मागे घेतल्यानंतरही या प्रकरणाचे पडसाद राजकीय वर्तुळात उमटत राहिले.
या संपूर्ण प्रकरणावरून आता ओबीसी नेते लक्ष्मण हाके यांनी थेट हल्लाबोल केला आहे. पूजा मोरे आणि धनंजय जाधव यांच्यावर टीका करताना लक्ष्मण हाके यांनी त्यांच्या राजकीय प्रवासावरच प्रश्नचिन्ह उपस्थित केलं. तुम्ही दरवर्षी पक्ष बदलत आहात. काँग्रेस, राष्ट्रवादी, शेतकरी संघटना, संभाजी ब्रिगेड, स्वराज्य पक्ष असा सगळा प्रवास करून आता भाजपच्या चिन्हावर निवडणूक लढवायला निघालात? असा खोचक सवाल हाके यांनी केला. त्यांच्या मते, आधी ओबीसी कोट्यातून उमेदवारी मिळवण्याचा प्रयत्न झाला, मात्र ते शक्य न झाल्याने भाजपकडे मोर्चा वळवण्यात आला.
लक्ष्मण हाके यांनी पुढे असंही नमूद केलं की, पूजा मोरे यांनी यापूर्वी केलेली अनेक वादग्रस्त विधानं महाराष्ट्राने पाहिली आहेत. त्यामुळे जनता सजग असून अशा राजकीय भूमिकांना सहज बळी पडणार नाही, असा इशाराही त्यांनी दिला. तुमचं आणि तुमच्या पतीचं ‘लगा लगा मला बघा’ असं वर्तन आहे, अशी बोचरी टीका करत हाके यांनी या जोडप्याच्या राजकारणावर ताशेरे ओढले. त्यांच्या या वक्तव्यामुळे ओबीसी विरुद्ध मराठा असा सुप्त वाद पुन्हा उफाळण्याची शक्यता वर्तवली जात आहे.
याचवेळी लक्ष्मण हाके यांनी धनंजय जाधव यांच्यावरही गंभीर आरोप केले. त्यांनी म्हटलं की, तुमचा पती धनंजय जाधव ओबीसी नेते छगन भुजबळ यांच्या गाडीवर दगडफेक करण्यासाठी निघाला होता. तसेच पूजा मोरे यांच्यावर थेट टीका करत, तुम्ही निवडणुकीआधीच युद्धातून पराभव स्वीकारला आहे, असं विधान त्यांनी केलं. देवराई प्रकरणाचा संदर्भ देत, याआधीही अशाच पद्धतीने राजकीय भूमिका घेतल्याचा आरोप हाके यांनी केला.
हाके यांनी पुढे असंही सांगितलं की, एका ओबीसी समाजाच्या जागेवरून निवडून आल्यानंतर पुन्हा पुणे महापालिकेची निवडणूक लढवण्याचा प्रयत्न करणं हे योग्य नाही. ओबीसी समाज, त्यांचं आरक्षण आणि त्यांच्या नेतृत्वाशी केलेल्या कथित विश्वासघातावरून हाके यांनी जोरदार शब्दांत नाराजी व्यक्त केली. या विधानांमुळे ओबीसी राजकारणातील अंतर्गत संघर्ष पुन्हा एकदा उघड झाला आहे.
मनोज जरांगे पाटील यांनाही अप्रत्यक्षपणे लक्ष्य केलं
या संपूर्ण वादात लक्ष्मण हाके यांनी मराठा आंदोलक मनोज जरांगे पाटील यांनाही अप्रत्यक्षपणे लक्ष्य केलं. अती केली की माती होते, असा टोला लगावत त्यांनी म्हटलं की, पूजा मोरे हा फक्त ट्रेलर आहे, पिक्चर अजून बाकी आहे. यानंतर त्यांनी खासदार बजरंग सोनवणे, आमदार विजयसिंह पंडित, प्रकाश सोळंके आणि राजेश टोपे यांची नावं घेत पुढील राजकीय लढाया सुचवल्या. ओबीसी समाजाच्या प्रश्नांवर आम्ही गप्प बसणार नाही, असा स्पष्ट इशाराही त्यांनी दिला. त्यामुळे पुण्यातील उमेदवारी माघारीचा मुद्दा आता राज्यव्यापी सामाजिक-राजकीय संघर्षाचं प्रतीक बनत चालल्याचं दिसत आहे.
