शिंदेंच्या शिवसेनेत इनकमिंग सुरूच:6 खासदार, सचिन अहिर यांच्यानंतर आता शिक्षक आमदार किरण सरनाईक शिंदेंसोबत

राज्याच्या राजकारणात मोठ्या घडामोडी पाहायला मिळत आहेत. उपमुख्यमंत्री एकनाथ शिंदे यांच्या नेतृत्वाखालील शिवसेनेची ताकद दिवसेंदिवस वाढत असून, इतर पक्षांतील नेत्यांचा शिवसेनेत येण्याचा ओघ सुरूच आहे. काही दिवसांपूर्वी ठाकरे गटाचे खासदार आणि आमदारांनी शिवसेनेत प्रवेश केल्यानंतर, आता अमरावतीचे शिक्षक आमदार किरण सरनाईक यांनीही शिवसेनेला जाहीर पाठिंबा दिला आहे. ते आता शिवसेनेचे ‘सहयोगी सदस्य’ म्हणून काम करणार आहेत. आमदार किरण सरनाईक यांचा शिंदेंना पाठिंबा अमरावती शिक्षक मतदारसंघाचे आमदार किरण सरनाईक यांनी एकनाथ शिंदे यांच्या उपस्थितीत शिवसेनेला आपला अधिकृत पाठिंबा जाहीर केला. यावेळी बोलताना सरनाईक म्हणाले की, “ एकनाथ शिंदे आणि महायुती सरकार ज्या वेगाने आणि धडाडीने काम करत आहे, त्या कामाने प्रभावित होऊन मी शिवसेनेला पाठिंबा देण्याचा निर्णय घेतला आहे.” ‘शिवसेना दिलेला शब्द पाळते’ – एकनाथ शिंदे किरण सरनाईक यांच्या पाठिंब्यावर बोलताना एकनाथ शिंदे यांनी त्यांचे स्वागत केले. “किरण सरनाईक यांनी राज्यामध्ये शिवसेनेचे काम पाहून सहयोगी सदस्य होण्याचा मार्ग स्वीकारला आहे. महायुती सरकार शिक्षकांचे प्रश्न सोडवण्यासाठी कटिबद्ध आहे आणि सरनाईक यांनीही शिक्षकांना न्याय मिळवून देण्यासाठी हा निर्णय घेतला आहे. शिवसेना दिलेला शब्द पाळते, त्यामुळे शिक्षकांच्या सर्व प्रलंबित मागण्यांकडे विशेष लक्ष दिले जाईल,” अशी ग्वाही मुख्यमंत्र्यांनी दिली. शिवसेनेच्या ताकदीत वाढ
गेल्या काही दिवसांत शिवसेनेचे संख्याबळ वाढले आहे. आठवडाभरापूर्वीच उद्धव ठाकरे यांच्या पक्षातील ६ खासदारांनी शिवसेनेत प्रवेश केला होता. त्यानंतर काल ठाकरे गटाचे विधान परिषदेचे आमदार सचिन अहिर यांनीही एकनाथ शिंदे यांच्या पक्षात प्रवेश केल्याने राजकीय वर्तुळात मोठी खळबळ उडाली होती. त्याआधी एका अपक्ष आमदारानेही सहयोगी सदस्य म्हणून साथ दिली होती आणि आता किरण सरनाईक यांच्या पाठिंब्यामुळे शिंदे गटाचे पारडे अधिकच जड झाले आहे. संबंधित बातमी वाचा., पक्षांतरानंतर एका दिवसातच उपसभापतिपद मिळवणारे सचिन अहिर एकमेव:पक्ष बदलून 24 तासांत अहिर झाले विधान परिषदेचे 17 वे उपसभापती मंगळवारी दुपारी एक वाजेच्या सुमारास शिवसेनेत (शिंदे) प्रवेश करणारे उद्धवसेनेचे आमदार सचिन अहिर यांची बुधवारी दुपारी एक वाजेच्या सुमारास महाराष्ट्र विधान परिषदेचे १७ वे उपसभापती म्हणून निवड झाली. उद्धवसेनेचे उमेदवार जगन्नाथ अभ्यंकरांनी माघार घेतल्याने अहिरांची निवड बिनविरोध झाली. पक्षांतर करून उपसभापतिपद मिळवणारे म्हणून अहिर यांची महाराष्ट्र तसेच विधान परिषदेच्या इतिहासात नोंद झाली आहे. या निवडीच्या निमित्ताने राजकीय टोलेबाजी झाली. सविस्तर वाचा