IPL 2026 | IPL 2026 मधील ‘हे’ ५ महागडे खेळाडू ठरले फ्लॉप! संघ मालकांचं वाढवलं टेन्शन
IPL 2026 | आयपीएल 2026 हा हंगाम अनेक संस्मरणीय घटनांमुळे क्रिकेटप्रेमींच्या चर्चेत राहिला. युवा फलंदाज वैभव सूर्यवंशी (Vaibhav Suryavanshi) याची आक्रमक फलंदाजी, पंजाब किंग्स (Punjab Kings) संघाने केलेला ऐतिहासिक धावांचा पाठलाग आणि रॉयल चॅलेंजर्स बंगळुरू (Royal Challengers Bengaluru) संघाचे सलग दुसरे विजेतेपद या गोष्टींनी स्पर्धेला वेगळीच रंगत दिली. मात्र, या चमकदार कामगिरीच्या पार्श्वभूमीवर काही स्टार खेळाडूंनी निराशाजनक प्रदर्शन करत आपल्या फ्रँचायझींना मोठा फटका दिला.
संघांनी या खेळाडूंवर 15 कोटींपेक्षा जास्त रक्कम खर्च केली होती. मात्र मैदानावरील कामगिरी अपेक्षेप्रमाणे झाली नाही. त्यामुळे हे खेळाडू संपूर्ण हंगामभर टीकेचे धनी ठरले. विशेष म्हणजे काही संघांच्या अपयशी मोहिमेमागे या महागड्या खेळाडूंची खराब कामगिरी महत्त्वाचे कारण मानली जात आहे.
लखनऊ सुपर जायंट्स (Lucknow Super Giants) संघाचा कर्णधार ऋषभ पंत (Rishabh Pant) हा यंदाच्या हंगामातील सर्वात महागडा खेळाडू होता. 27 कोटी रुपयांची मोठी बोली लावून त्याला संघात घेतले गेले होते. मात्र 14 सामन्यांत त्याने 138 च्या स्ट्राइक रेटने केवळ 312 धावा केल्या. संपूर्ण स्पर्धेत त्याला फक्त एकच अर्धशतक झळकावता आले. त्याच्या अपयशी फलंदाजीचा परिणाम संघाच्या कामगिरीवर झाला आणि लखनऊचा संघ गुणतालिकेत खालच्या स्थानावर राहिला.
कोलकाता नाईट रायडर्स (Kolkata Knight Riders) संघाने कॅमेरून ग्रीन (Cameron Green) याच्यावर 25.20 कोटी रुपयांची मोठी गुंतवणूक केली होती. मात्र त्यालाही अपेक्षित कामगिरी करता आली नाही. 14 सामन्यांत त्याने 322 धावा करत दोन अर्धशतके झळकावली, परंतु संघाला त्याच्याकडून अधिक प्रभावी खेळाची अपेक्षा होती. दुखापतीतून पुनरागमन केल्यामुळे सुरुवातीला त्याने गोलंदाजी केली नाही, तर नंतरही चेंडूने विशेष प्रभाव निर्माण करण्यात तो अपयशी ठरला.
IPL 2026 | सूर्यकुमार, पूरन आणि हार्दिकलाही अपयश :
मुंबई इंडियन्स (Mumbai Indians) संघाने सूर्यकुमार यादव (Suryakumar Yadav) याला कायम ठेवण्यासाठी 16.35 कोटी रुपये खर्च केले होते. मात्र भारतीय टी-20 संघाचा हा अनुभवी फलंदाज अपेक्षेनुसार चमक दाखवू शकला नाही. 13 डावांमध्ये त्याने 270 धावा केल्या. दोन अर्धशतके झळकावूनही त्याच्या खेळात सातत्याचा अभाव स्पष्टपणे दिसून आला. मुंबईच्या निराशाजनक हंगामामागील हे एक महत्त्वाचे कारण ठरले.
त्याचप्रमाणे लखनऊ सुपर जायंट्सने निकोलस पूरन (Nicholas Pooran) याला 21 कोटी रुपयांत कायम ठेवले होते. मात्र त्याच्या बॅटमधून 14 सामन्यांत फक्त 234 धावा निघाल्या. त्याने केवळ एक अर्धशतक झळकावले आणि मधल्या फळीत अपेक्षित योगदान देऊ शकला नाही.
दुसरीकडे मुंबई इंडियन्सचा कर्णधार हार्दिक पंड्या (Hardik Pandya) याचाही हंगाम अत्यंत निराशाजनक ठरला. 16.45 कोटी रुपयांच्या करारानंतर त्याने 10 सामन्यांत फक्त 206 धावा केल्या आणि एकही अर्धशतक नोंदवू शकला नाही. गोलंदाजीतही त्याला अवघ्या चार विकेट्स मिळाल्या. हंगामाच्या अखेरीस त्याच्या भवितव्याबाबत विविध चर्चांना उधाण आले. एकूणच, आयपीएल 2026 मध्ये अनेक युवा खेळाडूंनी चमकदार कामगिरी केली असली तरी काही महागड्या स्टार खेळाडूंना अपेक्षांचे ओझे पेलता आले नाही.
