Nagpur Beggars Fight Erupts at LIC Chowk; Traffic Disrupted

.

मिळालेल्या माहितीनुसार, आज संध्याकाळी सहा वाजेच्या सुमारास एलआयसी चौकातील सिग्नलवर नेहमीप्रमाणे भिकाऱ्यांची मोठी गर्दी होती. यावेळी दोन गटांमध्ये कोणत्यातरी किरकोळ कारणावरून बाचाबाची सुरू झाली. मात्र, काही वेळातच या वादाने हिंसक वळण घेतले. दोन्ही गटांनी एकमेकांवर मोठमोठे दगड भिरकावण्यास सुरुवात केली, तर काही जण लाकडी काठ्या घेऊन एकमेकांवर धावून गेले. गजबजलेल्या या चौकात अचानक सुरू झालेल्या या राड्यामुळे वाहनचालकांची मोठी तारांबळ उडाली.

नागरिकांचा पोलिसांच्या विलंबावर संताप

या भीषण हाणामारीमुळे चौकातील वाहतूक काही काळ विस्कळीत झाली होती. सुदैवाने, या दगडफेकीत कोणत्याही वाहनचालकाला किंवा पादचाऱ्याला गंभीर दुखापत झाली नाही, मात्र दोन्ही गटांतील काही भिकारी जखमी झाले आहेत. उपस्थित नागरिकांनी तातडीने ‘सदर’ पोलीस ठाण्याला या घटनेची माहिती दिली. मात्र, माहिती देऊनही पोलीस बराच वेळ घटनास्थळी पोहोचले नाहीत, असा गंभीर आरोप प्रत्यक्षदर्शी नागरिकांनी केला आहे.

नागपुरात भिकाऱ्यांची संख्या लक्षणीय वाढली

नागपूर शहरात सध्या सिग्नलवर भिकाऱ्यांची संख्या लक्षणीयरीत्या वाढल्याचे चित्र आहे. केवळ भीक मागणेच नव्हे, तर वाहनचालकांना पैसे देण्यासाठी जबरदस्ती करणे, पैसे न दिल्यास अश्लील शिवीगाळ करणे, धावत्या वाहनांच्या बोनटवर बसून राहणे अशा प्रकारांमुळे नागरिक त्रस्त झाले आहेत. आजच्या या घटनेमुळे या भिकाऱ्यांमधील आपापसातील टोळीयुद्ध आता सर्वसामान्यांच्या जीवावर उठत असल्याचे समोर आले आहे.

हे ही वाचा…