अंबादास दानवे यांच्या पत्नीच्या नावावर मर्सिडीज बेन्झ:संपत्तीतही मोठी वाढ; विधान परिषद उमेदवारांच्या संपत्तीची मोठी झेप
राज्यात सध्या विधान परिषद निवडणुकीच्या पार्श्वभूमीवर राजकीय हालचालींना वेग आला आहे. 30 एप्रिल हा अर्ज दाखल करण्याचा शेवटचा दिवस ठरला असून 12 मे रोजी मतदान आणि त्याच दिवशी मतमोजणी होणार आहे. एकूण 9 जागांसाठी ही निवडणूक होत असून, भाजपकडून 5, शिवसेना शिंदे गटाकडून 2, राष्ट्रवादी काँग्रेस अजित पवार गटाकडून 1 आणि शिवसेना ठाकरे गटाकडून 1 उमेदवार रिंगणात उतरले आहेत. भाजपने अतिरिक्त उमेदवार न दिल्याने निवडणूक बिनविरोध होण्याची शक्यता निर्माण झाली आहे. या निवडणुकीदरम्यान उमेदवारांच्या प्रतिज्ञापत्रातून त्यांच्या संपत्तीबाबत धक्कादायक आणि लक्षवेधी माहिती समोर आली आहे. विशेषतः काही नेत्यांच्या संपत्तीत गेल्या काही वर्षांत मोठ्या प्रमाणात वाढ झाल्याचे दिसून येत आहे. त्यामुळे राजकीय वर्तुळात चर्चा रंगली असून जनतेतही या आकड्यांबाबत उत्सुकता निर्माण झाली आहे. नीलम गोऱ्हे यांची जंगम मालमत्ता 11.66 कोटी रुपयांवर शिवसेना शिंदे गटाच्या उमेदवार नीलम गोऱ्हे यांच्या संपत्तीत गेल्या सहा वर्षांत मोठी झेप घेतल्याचे स्पष्ट झाले आहे. 2020 मध्ये त्यांची जंगम मालमत्ता 1.57 कोटी रुपये होती, तर स्थावर मालमत्ता सुमारे 6 कोटी रुपयांच्या घरात होती. मात्र 2026 मध्ये ही जंगम मालमत्ता 11.66 कोटी रुपयांवर पोहोचली आहे. त्याचबरोबर त्यांनी 7.69 कोटी रुपयांची स्वअर्जित आणि 12.76 कोटी रुपयांची वडिलोपार्जित स्थावर मालमत्ता जाहीर केली आहे. त्यांच्या नावावर टोयोटा इनोव्हा हायक्रॉस ही सुमारे 34.69 लाख रुपयांची गाडी देखील असल्याचे समोर आले आहे. अंबादास दानवे यांच्या पत्नी अनुराधा यांच्या नावावर मर्सिडीज बेन्झ शिवसेना ठाकरे गटाचे उमेदवार अंबादास दानवे यांच्या संपत्तीतही मोठी वाढ झाल्याचे दिसून आले आहे. 2019 मध्ये त्यांच्या कुटुंबाची एकूण जंगम मालमत्ता 63.78 लाख रुपये होती, तर स्थावर मालमत्ता 46.24 लाख रुपयांची होती. मात्र 2026 मध्ये ही आकडेवारी झपाट्याने वाढून जंगम मालमत्ता 2.36 कोटी रुपये आणि स्थावर मालमत्ता 5.06 कोटी रुपये इतकी झाली आहे. त्यांच्या कुटुंबावर एकूण 8.96 कोटी रुपयांचे कर्ज असल्याचेही नमूद करण्यात आले आहे. विशेष म्हणजे त्यांच्या पत्नी अनुराधा यांच्या नावावर मर्सिडीज बेन्झ ही आलिशान गाडी आहे. झिशान सिद्दीकी यांच्या जंगम मालमत्तेत मोठी झेप राष्ट्रवादी काँग्रेस अजित पवार गटाचे उमेदवार झिशान सिद्दीकी यांच्या संपत्तीत सर्वाधिक वाढ झाल्याचे समोर आले आहे. 2024 मध्ये त्यांनी विधानसभा निवडणुकीवेळी 5.20 कोटी रुपयांची जंगम मालमत्ता आणि 31.69 कोटी रुपयांची स्थावर मालमत्ता जाहीर केली होती. तसेच त्यांच्यावर 8.77 कोटी रुपयांचे कर्ज असल्याचेही त्यांनी नमूद केले होते. मात्र केवळ दोन वर्षांत त्यांच्या जंगम मालमत्तेत मोठी झेप घेत ती 21.17 कोटी रुपयांवर पोहोचली आहे. संपत्तीमध्ये जवळपास चौपट वाढ तथापि, सिद्दीकी यांच्या स्थावर मालमत्तेत किंचित घट होऊन ती 28.74 कोटी रुपये इतकी असल्याचे स्पष्ट झाले आहे. त्यांच्या कर्जातही काही प्रमाणात घट होऊन ते 8.69 कोटी रुपयांवर आले आहे. या सर्व आकडेवारीमुळे त्यांच्या संपत्तीमध्ये जवळपास चौपट वाढ झाल्याचे दिसून येते. त्यामुळे या निवडणुकीत केवळ राजकीय समीकरणेच नव्हे, तर उमेदवारांच्या आर्थिक स्थितीचीही मोठ्या प्रमाणात चर्चा सुरू झाली आहे.
