संजय राऊत- मुरलीधर मोहोळ भेटीने चर्चांना उधाण:पुणे दौऱ्यात दोघांमधील भेट राजकीय चर्चेचा विषय; बैठकीआधी अनपेक्षित वळण

शिवसेना उद्धव बाळासाहेब ठाकरे गटाचे नेते आणि खासदार संजय राऊत सध्या पुणे दौऱ्यावर असून त्यांच्या या भेटीत एक वेगळीच घडामोड समोर आली आहे. पक्षाच्या महत्त्वाच्या बैठकीपूर्वी त्यांनी भाजपचे केंद्रीय राज्यमंत्री मुरलीधर मोहोळ यांची त्यांच्या कोथरूड येथील निवासस्थानी जाऊन भेट घेतली. या भेटीदरम्यान राऊत यांनी मोहोळ यांच्या प्रकृतीची विचारपूस करत त्यांना लवकर बरे होण्यासाठी शुभेच्छा दिल्या. राजकीय विरोधक असतानाही दोघांमधील ही भेट चर्चेचा विषय ठरली आहे. ही भेट पूर्णपणे वैयक्तिक कारणासाठी झाल्याचे सांगितले जात आहे. काही दिवसांपूर्वी मुरलीधर मोहोळ यांच्यावर पुण्यातील एका खासगी रुग्णालयात शस्त्रक्रिया करण्यात आली होती. अनेक वर्षांपूर्वी कुस्ती खेळताना झालेली दुखापत पुन्हा बळावल्यामुळे डॉक्टरांनी ऑपरेशनचा सल्ला दिला होता. 14 एप्रिल रोजी ही शस्त्रक्रिया पार पडली असून त्यानंतर त्यांना किमान महिनाभर विश्रांती घेण्याचा सल्ला देण्यात आला आहे. ऑपरेशननंतर मोहोळ यांनी स्वतः सोशल मीडियावर माहिती देत लवकरच पुन्हा कामावर रुजू होणार असल्याचे संकेत दिले होते. सध्या ते पुण्यातील त्यांच्या निवासस्थानी विश्रांती घेत आहेत. अशा परिस्थितीत संजय राऊत यांनी त्यांची भेट घेऊन विचारपूस केल्यामुळे या भेटीला वेगळे महत्त्व प्राप्त झाले आहे. राजकीय मतभेद असले तरी वैयक्तिक नात्यांना प्राधान्य दिल्याचे या प्रसंगातून दिसून आले. दरम्यान, संजय राऊत यांचा पुणे दौरा राजकीयदृष्ट्या देखील महत्त्वाचा मानला जात आहे. त्यांनी शहरातील शिवसेना नेते आणि पदाधिकाऱ्यांची बैठक घेतली. या बैठकीसाठी पक्षातील सर्व प्रमुख पदाधिकारी आणि कार्यकर्त्यांना निमंत्रित करण्यात आले होते. शहरातील संघटनात्मक स्थिती आणि आगामी रणनीती यावर चर्चा करण्यात आली. भेटीमुळे राजकारणात वेगवेगळ्या प्रतिक्रिया या दौऱ्यात शिवसेना गटनेता पक्ष कार्यालयाचे उद्घाटनही पार पडले. त्यानंतर सारसबागसमोरील बाळासाहेब ठाकरे कलादालनात महत्त्वाची बैठक आयोजित करण्यात आली. या बैठकीत पुणे शहरातील पक्षबांधणी, संघटन विस्तार आणि महापालिका निवडणुकांच्या पार्श्वभूमीवर पुढील योजना यांचा आढावा घेण्यात येत आहे. एकूणच, संजय राऊत यांच्या पुणे दौऱ्यातील राजकीय हालचालींसोबतच मुरलीधर मोहोळ यांच्याशी झालेली भेटही विशेष ठरली आहे. या भेटीमुळे राजकारणात वेगवेगळ्या प्रतिक्रिया उमटत असून, विरोधकांमधील मानवी नात्यांची झलक पुन्हा एकदा समोर आली आहे.