मेळघाटात जलसंकट गहिरे:8 गावांना 19 टँकरने पाणीपुरवठा सुरू

तापमानात वाढ झाल्याने मेळघाटातील जलसंकट अधिक गंभीर झाले आहे. चिखलदरा तालुक्यातील आठ गावांमध्ये सध्या १९ टँकरने पाणीपुरवठा केला जात आहे. या गावांमध्ये भूगर्भात पाण्याचा कोणताही स्रोत उपलब्ध नसल्यामुळे टँकरशिवाय पाणीपुरवठा करण्याचा दुसरा कोणताही पर्याय नसल्याचे जिल्हा परिषद प्रशासनाने म्हटले आहे. जिल्हा परिषदेच्या पाणीपुरवठा विभागाच्या नोंदीनुसार, या आठही गावांमध्ये रहिवाशांसाठी दररोज पिण्याच्या पाण्याचे टँकर पाठवले जात आहेत. यामध्ये मोथा, खडीमल, गौलखेडा बाजार, बहादरपुर, आकी, मेहरियम, अलडोह-शहापूर आणि लावडा या गावांचा समावेश आहे. खडीमल येथे ६ टँकरने, मोथा येथे ३ टँकरने, तर आकी आणि बहादरपूर येथे प्रत्येकी एका टँकरने पाणी पुरवले जात आहे. उर्वरित चार गावांमध्ये प्रत्येकी दोन टँकरने पाणीपुरवठा सुरू आहे. प्रशासनाच्या वार्षिक अनुभवानुसार, येत्या काळात आणखी काही गावांमध्ये पिण्याच्या पाण्याची समस्या निर्माण होण्याची शक्यता आहे. पाणीपुरवठा विभागाने तयार केलेल्या टंचाई उपाययोजनांच्या आराखड्यानुसार, उन्हाळ्याच्या चार महिन्यांत १५ गावांमध्ये टँकर किंवा बैलगाडीने पाणीपुरवठा करण्याची वेळ येऊ शकते. यासाठी सुमारे ३० लाख रुपये खर्चाचा अंदाज वर्तवण्यात आला आहे. संपूर्ण जिल्ह्यात पाणीटंचाईची समस्या गंभीर असून, १४ तालुक्यांमधील ५४५ गावांमध्ये पाणीटंचाई जाणवत आहे. यावर मात करण्यासाठी ७२२ उपाययोजना आखण्यात आल्या आहेत, ज्यासाठी १९ कोटी ७ लाख ५५ हजार रुपये खर्च अपेक्षित आहे. या प्रस्तावित उपाययोजनांमध्ये टँकरने पाणीपुरवठा, तात्पुरत्या नवीन नळ योजना, विहिरींचे अधिग्रहण आणि इतर आवश्यक उपाययोजनांचा समावेश आहे. यावर्षीचा उन्हाळा अधिक तीव्र असल्याने, मे महिन्याच्या अखेरपर्यंत जवळपास सर्वच उपाययोजना कार्यान्वित कराव्या लागतील, असे प्रशासनाने म्हटले आहे. जिल्हा परिषदेने ऑक्टोबर ते डिसेंबर, जानेवारी ते मार्च आणि एप्रिल ते जून असे तीन स्वतंत्र कृती आराखडे यापूर्वीच तयार केले आहेत.