नगरसेविका सहर शेख अडचणीत, बनावट जात प्रमाणपत्राची फॉरेन्सिक चौकशीची मागणी

Sahar Shaikh | ठाणे (Thane) महापालिकेतील मुंब्रा (Mumbra) भागातील नगरसेविका सहर शेख (Sahar Shaikh) आणि त्यांचे वडील युनूस शेख (Yunus Shaikh) यांच्याविरोधात बोगस जात प्रमाणपत्राचा वाद निर्माण झाला आहे. या प्रकरणावर स्पष्टीकरण देण्यासाठी त्यांनी पत्रकार परिषद घेतली असली, तरी त्यानंतरही त्यांच्या अडचणी कमी झालेल्या नाहीत. उलट नव्या आरोपांमुळे प्रकरण अधिक गंभीर बनले आहे.

बोगस कागदपत्रे आणि खोट्या स्वाक्षऱ्यांचा आरोप

निवडणूक विजयानंतर आपल्या भाषणातील विधानांमुळे चर्चेत आलेल्या सहर शेख यांच्या अडचणीत आता वाढ झाली आहे. तक्रारदार जावेद शेख यांनी असा दावा केला आहे की, युनूस शेख यांनी सादर केलेली जात पडताळणीची कागदपत्रे पूर्णपणे बनावट आहेत. सरकारी अधिकाऱ्यांच्या बनावट स्वाक्षऱ्या आणि शिक्क्यांचा वापर करून ही कागदपत्रे तयार करण्यात आली असल्याचा खळबळजनक आरोप त्यांनी केला आहे.

जावेद शेख यांच्या मते, युनूस शेख यांनी पत्रकार परिषदेत जी कागदपत्रे माध्यमांना दाखवली, ती केवळ जनतेची दिशाभूल करण्यासाठी होती. या प्रकरणाच्या अधिकृत सुनावणीला युनूस शेख वारंवार अनुपस्थित राहत असल्याने त्यांच्यावरील संशयाची सुई अधिक गडद झाली आहे. प्रशासनासमोर आपली बाजू मांडण्याऐवजी ते टाळाटाळ करत असल्याचे तक्रारदाराने नमूद केले आहे.

फॉरेन्सिक तपासणीची मागणी आणि कायदेशीर पेच

या प्रकरणातील सत्यता समोर आणण्यासाठी सादर केलेल्या सर्व पुराव्यांची आणि स्वाक्षऱ्यांची फॉरेन्सिक (Forensic) म्हणजेच न्यायवैद्यक चाचणी करण्यात यावी, अशी मागणी आता जोर धरू लागली आहे. सरकारी कागदपत्रांमध्ये फेरफार करणे आणि स्वाक्षऱ्यांची चोरी करणे हा अजामीनपात्र गुन्हा असल्याने, या तपासातून मोठे वास्तव समोर येण्याची शक्यता वर्तवण्यात आली आहे.

जर या चाचणीत कागदपत्रे बोगस असल्याचे सिद्ध झाले, तर सहर शेख यांचे नगरसेवक पद धोक्यात येण्याची शक्यता आहे. या कायदेशीर लढाईमुळे मुंब्रा परिसरातील राजकीय वातावरण तापले असून, पोलीस प्रशासन आणि जात पडताळणी समिती यावर काय पाऊल उचलणार, याकडे संपूर्ण ठाणे जिल्ह्याचे लक्ष लागले आहे.

News Title: Sahar Sheikh in trouble demand for forensic investigation of fake caste certificate