नांदेड (प्रतिनिधी) – स्वाभिमान, शौर्य, त्याग आणि राष्ट्रनिष्ठेचे प्रतीक असलेल्या वीर शिरोमणी महाराणा प्रताप यांच्या जयंतीनिमित्त शहरात उत्साहपूर्ण वातावरणात विविध कार्यक्रमांचे आयोजन करण्यात आले. महाराणा प्रताप चौक येथे त्यांच्या पुतळ्यास पुष्पहार अर्पण करून नागरिक, सामाजिक कार्यकर्ते, विविध संघटनांचे पदाधिकारी आणि मान्यवरांनी अभिवादन केले. यावेळी उपस्थितांनी महाराणा प्रताप यांच्या पराक्रमाचा गौरव करत त्यांच्या विचारांचे स्मरण केले.
जयंतीनिमित्त शहरातील मंदिर परिसरातून भव्य मिरवणुकीचे आयोजन करण्यात आले होते. पारंपरिक वेशभूषा, भगवे ध्वज, ढोल-ताशांचा गजर आणि घोषणांनी संपूर्ण परिसर दुमदुमून गेला. वीर शिरोमणी महाराणा प्रताप अमर रहे, जय महाराणा प्रताप अशा जयघोषांनी वातावरण भारावून गेले होते. मिरवणुकीत युवक-युवतींसह आबालवृद्ध, महिला, बालक-बालिका मोठ्या संख्येने सहभागी झाले होते.
मिरवणुकीदरम्यान महाराणा प्रताप यांच्या जीवनकार्याचे दर्शन घडविणारे फलक, ऐतिहासिक प्रसंगांचे चित्ररथ तसेच देशभक्ती आणि शौर्य जागविणारे संदेश नागरिकांचे लक्ष वेधून घेत होते. अनेक ठिकाणी नागरिकांनी मिरवणुकीचे स्वागत करत सहभागींचे पुष्पवर्षावाने स्वागत केले. शहरातील प्रमुख मार्गावरून ही मिरवणूक मार्गक्रमण करत महाराणा प्रताप चौकात पोहोचली.
यावेळी वक्त्यांनी महाराणा प्रताप यांचे जीवन हे संघर्ष, स्वाभिमान आणि राष्ट्रप्रेमाचे प्रेरणादायी उदाहरण असल्याचे सांगितले. संकटांच्या काळातही त्यांनी कधीही स्वाभिमानाशी तडजोड केली नाही. त्यांच्या शौर्यगाथा आजही तरुण पिढीला राष्ट्रसेवा, धैर्य आणि कर्तव्यनिष्ठेची प्रेरणा देतात, असे मत मान्यवरांनी व्यक्त केले.
कार्यक्रमात विविध सामाजिक, धार्मिक व सांस्कृतिक संघटनांच्या प्रतिनिधींसह नागरिकांचा उत्स्फूर्त सहभाग लाभला. शांतता, शिस्त आणि उत्साहपूर्ण वातावरणात पार पडलेल्या या जयंती सोहळ्याने शहरात ऐतिहासिक वारशाबद्दल अभिमान आणि प्रेरणेची भावना अधिक दृढ झाली. महाराणा प्रताप यांच्या जयघोषाने दुमदुमलेल्या या सोहळ्याने उपस्थितांच्या मनावर कायमस्वरूपी ठसा उमटविला.
वीर शिरोमणी महाराणा प्रताप यांचा जन्मोसव ग्रामीण रुग्णालय भोकर येथे साजरी
स्वाभिमानासाठी जगणारा आणि मातृभूमीसाठी लढणारा महान योद्धा म्हणजे महाराणा प्रताप आज दिनांक १७ जून २०२६ रोजी वीर शिरोमणी महाराणा प्रताप जी यांची जयंती (तिथी नुसार) मा. डॉ प्रताप चव्हाण सर वैद्यकीय अधिक्षक ग्रामीण रुग्णालय भोकर यांच्या मार्गदर्शनानुसार जयंती साजरी करण्यात आली.
महाराणा प्रताप जी यांच्या प्रतिमेस पुष्पहार अर्पण करून अभिवादन करण्यात आले.
यावेळी ग्रामीण रुग्णालय भोकर येथील वैद्यकीय अधिकारी डॉ नितीन कळसकर, डॉ मायादेवी नरवाडे ,सहाय्यक अधिक्षक संजय देशमुख, लिपिक प्रल्हाद होळगे, राजेश कल्याणकर, प्रयोगशाळा वैज्ञानिक अधिकारी मनोज पांचाळ, औषध निर्माण अधिकारी संदीप ठाकूर, अधिपरीचारिका श्रीमती जिजा भवरे, पत्रकार विठ्ठल सुरलेवार, इत्यादी अधिकारी, अधिकारी, कर्मचारी व नागरिक उपस्थित होते