35,000 कोटींचा चुराडा कुठे झाला?:गिरीश महाजनांच्या बगलबच्च्यांचा 7-8 हजारांचा घोटाळा बाहेर काढणार; रोहित पवारांचा इशारा

नाशिकमध्ये आगामी सिंहस्थ कुंभमेळ्याच्या नावाखाली सुरू असलेल्या विकासकामांमध्ये कोट्यवधी रुपयांचा महाघोटाळा झाल्याचा अत्यंत गंभीर आरोप राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी केला आहे. “शासनाकडून कुंभमेळ्याच्या तयारीसाठी तब्बल 35,000 कोटी रुपयांचा खर्च झाल्याचा फुशारक्या मारल्या जात आहेत; मात्र प्रत्यक्ष नाशिक शहरात फिरताना 35,000 कोटींची कामे कुठे सुरू आहेत, याचा शोध घेण्याची वेळ आली आहे. चांगले डांबरी रस्ते विनाकारण उकरून ठेवल्यामुळे पावसाळ्यात खड्ड्यांत पडून तब्बल 15 ते 16 निष्पाप नागरिकांनी आपले प्राण गमावले. आम्ही प्रभू श्रीराम, गंगा आणि गोदावरीचे निस्सीम भक्त आहोत; परंतु धर्माच्या नावाखाली सुरू असलेला हा उघड भ्रष्टाचार आम्ही कदापि खपवून घेणार नाही,” असा सज्जड इशारा रोहित पवार यांनी पत्रकार परिषदेत दिला. नाशिकमधील कुंभमेळा विकासकामांचा सविस्तर आढावा घेतल्यानंतर रोहित पवार यांनी प्रशासकीय पातळीवरील अनागोंदी आणि मंत्री गिरीश महाजन यांच्या कार्यपद्धतीवर थेट ताशेरे ओढले. नाशिकमध्ये 35,000 कोटी कुठे जिरवले? कुंभमेळ्याच्या खर्चाच्या विसंगतीवर बोट ठेवताना आमदार रोहित पवार म्हणाले, “मी स्वतः प्रयागराजच्या कुंभमेळ्यात गेलो होतो. तिथे एकाच दिवसात तब्बल 16 कोटी भाविक दाखल झाले होते, तरीही संपूर्ण कुंभमेळ्याचा एकूण खर्च अवघा 7 हजार कोटी रुपये झाला होता. मग नाशिकमध्ये भाविक येण्याआधीच तब्बल 35,000 कोटी रुपयांची उधळपट्टी कशासाठी आणि कोणाच्या फायद्यासाठी दाखवली जात आहे?” गोदावरीचे पाणी गायब “महाकुंभ मेळ्याचे खरे पावित्र्य आणि महत्त्व हे गोदावरी मातेच्या पाण्याचे आहे. देशभरातून येणाऱ्या भाविकांना आणि साधू-संतांना गोदावरीत स्नान करायचे असते, पण आज गोदावरी पात्रात स्वच्छ पाणीच दिसत नाही. खालील बाजूला तातडीने बंधारा बांधण्याची गरज असताना प्रशासन भलत्याच कामांत मग्न आहे.” प्रदूषण मंडळ अन् MIDC ला 20 दिवसांचा अल्टिमेटम “नाशिकमधील औद्योगिक वसाहतींमधून प्रक्रिया न केलेले विषारी केमिकलचे पाणी थेट नदीपात्रात सोडले जात आहे. मी एमआयडीसी आणि प्रदूषण नियंत्रण मंडळाला (MPCB) 20 दिवसांची मुदत देतो. जर हे सांडपाणी रोखले नाही, तर कुंभमेळ्यात येणाऱ्या साधू-संतांना हेच विषारी केमिकलचे पाणी प्यावे लागेल आणि साथीच्या आजारांचा उद्रेक होईल. त्यानंतर होणाऱ्या परिणामांना प्रशासनच जबाबदार राहील.” गिरीश महाजनांच्या बगलबच्च्यांचा 7 ते 8 हजार कोटींचा भ्रष्टाचार चव्हाट्यावर आणणार! कुंभमेळा विकासकामांच्या कंत्राटांमध्ये जळगाव पॅटर्न राबवला जात असल्याचा थेट आरोप रोहित पवारांनी केला. “नाशिकचे स्थानिक अधिकारी सक्षम असताना पालकमंत्री गिरीश महाजन यांनी विशेष मर्जीतील जळगावचे अधिकारी नाशिक कुंभमेळा प्राधिकरणात का आणून बसवले आहेत? त्यांच्या ओळखीच्या आणि जवळच्या बगलबच्च्यांचा तब्बल 7 ते 8 हजार कोटी रुपयांचा भ्रष्टाचार आम्ही पुराव्यानिशी उघडकीस आणणार आहोत.” माहिती लपवण्याचे आदेश “आम्ही विभागीय आयुक्त, नाशिक जिल्हाधिकारी आणि कुंभमेळा आयुक्तांना पत्र लिहून कामांचा ताळेबंद मागितला आहे. मात्र मंत्री गिरीश महाजन यांनी अधिकाऱ्यांना माहिती न देण्याचे तोंडी फर्मान काढले आहे. मी अधिकाऱ्यांना 10 दिवसांची मुदत देतो; जर 10 दिवसांत अधिकृत माहिती दिली नाही, तर आम्ही कोणालाही सोडणार नाही.” नोएडात महाल अन् अधिकाऱ्यांचे हॉटेल्स “कुंभमेळ्याच्या निधीतून अधिकाऱ्यांनी स्वतःचे हॉटेल्स कसे उभे केले? नोएडामध्ये जो आलिशान महाल उभा राहत आहे, त्यासाठी पैसा कुठून गेला? या बेनामी संपत्तीची संपूर्ण कुंडली आम्ही बाहेर काढणार आहोत.” खड्ड्यांमुळे मृत्यू झालेल्यांच्या वारसांना नोकऱ्या द्या नाशिकच्या स्थानिक शेतकऱ्यांच्या आणि नागरिकांच्या प्रश्नांवरून रोहित पवारांनी सरकारला घेरले. “नाशिकमध्ये रिंगरोडचे काम कोणत्याही अधिकृत परवानग्या न घेता रेटले जात आहे. ज्या बळीराजाच्या जमिनी घेतल्या जात आहेत, त्या शेतकऱ्यांना अद्याप 1 रुपयाचाही योग्य मोबदला मिळालेला नाही.” संतांच्या नावाने केवळ राजकारण “शासनाच्या अधिकृत कार्यक्रमांत संतश्रेष्ठ निवृत्तीनाथ महाराज यांचे नाव घेण्याचे सौजन्यही दाखवले जात नाही. संतांच्या आणि धर्माच्या नावावर मतांचे राजकारण करायचे, पण त्यांच्या तिर्थक्षेत्रांच्या विकासावर १ रुपयाही खर्च करायचा नाही, हा सरकारचा ढोंगीपणा आहे.” बळी गेलेल्यांच्या कुटुंबीयांना नोकऱ्यांची मागणी “रस्ते उकरून ठेवल्यामुळे रस्त्यावरील खड्ड्यांत पडून ज्या निष्पाप 15 ते 16 नागरिकांचा दुर्दैवी मृत्यू झाला आहे, त्यांच्या कुटुंबीयांना शासनाने तातडीने सरकारी नोकरी आणि भरपाई दिली पाहिजे,” अशी आग्रही मागणी आमदार रोहित पवार यांनी शेवटी केली. ———————————————————- हेही वाचा… बसमध्ये काँग्रेसच्या महिला खासदाराला चापट?:व्हिडीओ व्हायरल होताच टीकेची झोड; बर्वे म्हणाले- बहिणीशी थट्टा चालली होती; धानोरकर म्हणाल्या- बदनामी चुकीची काँग्रेस पक्षाच्या दिल्लीतील आंदोलनादरम्यान आंदोलक खासदारांना घेऊन जाणाऱ्या बसमधील एका व्हिडिओवरून महाराष्ट्राच्या राजकीय वर्तुळात मोठी खळबळ उडाली आहे. या व्हिडीओमध्ये रामटेकचे काँग्रेस खासदार श्यामकुमार बर्वे हे चंद्रपूरच्या खासदार प्रतिभा धानोरकर यांच्या गालावर हात लावताना (हलकी चापट मारताना) दिसत आहेत. हा व्हिडीओ सोशल मीडियावर व्हायरल झाल्यानंतर काँग्रेसच्याच काही कथित पदाधिकाऱ्यांनी पक्षाध्यक्ष मल्लिकार्जुन खरगे, सोनिया गांधी, राहुल गांधी आणि के. सी. वेणुगोपाल यांच्याकडे थेट ईमेलद्वारे तक्रार दाखल केली. या वर्तनामुळे पक्षाच्या प्रतिमेला धक्का बसल्याचा दावा करत शिस्तभंगाच्या कारवाईची मागणी करण्यात आली आहे. येथे वाचा संपूर्ण बातमी