June Bank Holiday | जून महिन्यात तब्ब्ल ‘इतक्या’ दिवस बँका राहणार बंद!
June Bank Holiday | जून 2026 मध्ये बँकांशी संबंधित महत्त्वाची कामे करण्याचा विचार असेल तर आधीच योग्य नियोजन करून ठेवणे गरजेचे ठरणार आहे. भारतीय रिझर्व्ह बँकेने (Reserve Bank of India) जून महिन्यातील बँक सुट्ट्यांचे वेळापत्रक जाहीर केले असून विविध सण, प्रादेशिक उत्सव तसेच शनिवार-रविवारच्या नियमित सुट्ट्यांमुळे देशातील अनेक भागांमध्ये बँका एकूण 11 दिवस बंद राहणार आहेत. त्यामुळे ग्राहकांनी वेळेत कामे पूर्ण करण्याचा सल्ला दिला जात आहे.
मे महिना संपल्यानंतर 1 जूनपासून नवीन महिन्याची सुरुवात होत आहे. अशा परिस्थितीत खाते उघडणे, कर्ज प्रक्रिया, धनादेश क्लिअरन्स, डिमांड ड्राफ्ट काढणे किंवा इतर बँकिंग व्यवहारांसाठी शाखेत जाण्याचा विचार असल्यास सुट्ट्यांची माहिती जाणून घेणे आवश्यक आहे. आरबीआयच्या कॅलेंडरनुसार 7 जून, 14 जून, 21 जून आणि 28 जून या रविवारी तसेच 13 जूनचा दुसरा शनिवार आणि 27 जूनचा चौथा शनिवार यामुळे देशभरातील बँका बंद राहतील.
याशिवाय काही प्रादेशिक आणि धार्मिक सणांमुळेही विशिष्ट शहरांमध्ये बँकांचे कामकाज बंद राहणार आहे. 15 जून रोजी अझिवल (Aizawl) आणि भुवनेश्वर (Bhubaneswar) येथे YMA Day आणि राजा संक्रांतीमुळे सुट्टी असेल. 25 जून रोजी मोहरमनिमित्त विजयवाडा (Vijayawada) येथील बँका बंद राहतील. तर 26 जून रोजी मोहरममुळे मुंबई (Mumbai), नवी दिल्ली (New Delhi), बंगळुरू (Bengaluru), चेन्नई (Chennai), हैदराबाद (Hyderabad), कोलकाता (Kolkata), लखनौ (Lucknow), पाटणा (Patna) आणि श्रीनगर (Srinagar) यांसह अनेक शहरांतील बँकांना सुट्टी असेल.
June Bank Holiday | डिजिटल सेवा सुरूच राहणार :
29 जून रोजी संत गुरु कबीर जयंती (Sant Guru Kabir Jayanti) निमित्त शिमला (Shimla) येथे बँकांना सुट्टी राहील. त्यानंतर 30 जून रोजी रेमना नी उत्सवानिमित्त अझिवलमधील बँकांचे कामकाज बंद असेल. त्यामुळे संबंधित शहरांतील ग्राहकांनी बँकिंग व्यवहारांचे नियोजन आधीच करून ठेवणे आवश्यक आहे.
मात्र शाखा बंद असल्या तरी डिजिटल बँकिंग सेवांवर कोणताही परिणाम होणार नाही. ग्राहक मोबाईल बँकिंग, इंटरनेट बँकिंग, यूपीआय (UPI), एनईएफटी (NEFT), आरटीजीएस (RTGS) आणि आयएमपीएस (IMPS) यांसारख्या सुविधांद्वारे व्यवहार करू शकतील. एटीएम सेवाही सुरू राहणार असल्याने रोख रक्कम काढणे किंवा शिल्लक तपासणे यांसारखी कामे सहज करता येतील. मात्र लॉकर सेवा, कर्ज अर्ज, खाते उघडणे किंवा शाखेत प्रत्यक्ष उपस्थिती आवश्यक असलेल्या कामांसाठी सुट्ट्यांचे वेळापत्रक तपासूनच बँकेत जाणे योग्य ठरेल.
