पुण्यातील बुधवार पेठेत छाप्यात सहा बांगलादेशी महिला आढळल्या:महिलांशी संबंधित एजंट ताब्यात; आणखी दोन संशयितांचा शोध सुरू

पुणे शहरातील बुधवार पेठ परिसरात पोलिसांनी छापा टाकून सहा बांगलादेशी महिला आढळून आल्याने खळबळ उडाली आहे. या महिलांशी संबंधित एका एजंटला पोलिसांनी ताब्यात घेतले असून, अन्य दोन संशयित आरोपींचा शोध सुरू आहे. याप्रकरणी फरासखाना पोलिस ठाण्यात गुन्हा दाखल करण्याची प्रक्रिया सुरू आहे. कृषीकेश रावले पोलिस उपायुक्त, परिमंडळ एक यांच्या मार्गदर्शनाखाली बुधवार पेठ परिसरात ही कारवाई करण्यात आली. बांगलादेशी महिला परिसरात आढळून आल्याची माहिती मिळाल्यानंतर पोलिसांनी संयुक्त पथकाच्या माध्यमातून छापा टाकला. या कारवाईत खडक पोलिस ठाण्याचे वरिष्ठ पोलिस निरीक्षक धनंजय पिंगळे, पोलिस उपनिरीक्षक कांबळे आणि पोलिस उपनिरीक्षक मखारे, विश्रामबाग पोलिस ठाण्याचे सहायक पोलिस निरीक्षक कुडाळे, फरासखाना पोलिस ठाण्याचे सहायक पोलिस निरीक्षक सुरवसे, महिला पोलिस उपनिरीक्षक गाडीलवाड यांच्यासह पोलिस कर्मचारी सहभागी झाले होते. छाप्यादरम्यान सहा बांगलादेशी महिला आढळून आल्या. त्यांच्याशी संबंधित असल्याचा संशय असलेल्या एका एजंटला पोलिसांनी ताब्यात घेतले आहे. या एजंटसह अन्य दोन फरार आरोपींविरोधात फरासखाना पोलिस ठाण्यात गुन्हा दाखल करण्याची प्रक्रिया सुरू असल्याची माहिती पोलिसांनी दिली. भिक्षेकऱ्याकडून तरुणावर शस्त्राने वार पुणे स्टेशन परिसरातील घटना भिक्षेकऱ्याने तरुणावर तीक्ष्ण शस्त्राने वार केल्याची घटना पुणे स्टेशनच्या परिसरात घडली. या प्रकरणी हल्लेखोर भिक्षेकऱ्याला पोलिसांनी अटक केली. अबूबकर अब्दुल रेहमान सिद्धी (वय ३२, रा. खालापूर, जि. रायगड) असे अटक करण्यात आलेल्याचे नाव आहे. याबाबत एका तरुणाने बंडगार्डन पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार ३८ वर्षीय तरुण भवानी पेठेत राहायला आहे. २६ ऑक्टोबर रोजी तो दुपारी चारच्या सुमारास पुणे स्टेशन परिसरात गेला होता. त्या वेळी आरोपी अबूबकर याने तरुणाला अडविले. भूक लागली आहे, असे सांगून त्याने त्याच्याकडे पैशांची मागणी केली. तक्रारदार तरुणाने त्याला नकार दिला. त्यानंतर आरोपीने तरुणावर तीक्ष्ण शस्त्राने वार केले. तरुण जखमी झाला. या घटनेची माहिती मिळताच पोलिसांनी तेथे धाव घेतली. आरोपीला पोलिसांनी ताब्यात घेऊन अटक केली. पोलीस उपनिरीक्षक गणेश चव्हाण तपास करत आहेत.