उद्धव ठाकरे फक्त 'टीव्हीवर उरलेले नेते':शिंदे गटाच्या संजय निरुपम यांची टीका; केवळ मुलाखती, पत्रकार परिषदांपुरते मर्यादित राहिल्याचा टोला
शिवसेना (शिंदे गट) नेते संजय निरुपम यांनी नागपूर येथे उद्धव ठाकरे यांच्यावर जोरदार टीका केली आहे. उद्धव ठाकरे हे आता फक्त ‘टीव्हीवर उरलेले नेते’ आहेत. ते केवळ मुलाखती आणि पत्रकार परिषदांपुरते मर्यादित राहिले आहेत, असे ते म्हणालेत. संजय निरुपम यांनी ‘ऑपरेशन टायगर’ या नावाला पत्रकारांनी दिलेले नाव म्हटले. ते म्हणाले की, उद्धव ठाकरे गटातील अनेक खासदार आणि आमदार मुख्यमंत्री एकनाथ शिंदे यांच्या कामावर आणि हिंदुत्वाच्या भूमिकेवर विश्वास ठेवून शिंदे गटात येण्यास इच्छुक आहेत. उद्धव ठाकरे यांनी काँग्रेस आणि राष्ट्रवादीसोबत जाऊन बाळासाहेब ठाकरे यांच्या हिंदुत्ववादी विचारांशी तडजोड केल्याचा आरोपही त्यांनी केला. संजय निरुपम यांनी राष्ट्रवादी काँग्रेसचे अध्यक्ष शरद पवार यांच्यावरही टीका केली. शरद पवार स्वतःचा पक्ष चालवण्याऐवजी विलीनीकरणाची भाषा करतात, हे दुर्दैव असल्याचे निरुपम म्हणाले. निरुपम यांनी अशोक खरातसारख्या ‘भोंदू बाबां’पासून सावध राहण्याचे आवाहन केले. असे बोगस बाबा अनेकदा राजकारण्यांशी संपर्क साधतात, असे ते म्हणाले. नेत्यांची छायाचित्रे असली म्हणजे ते चुकीच्या कामांचे समर्थन करतात असे होत नाही. आसाराम बापूंकडे पंतप्रधान नरेंद्र मोदींसह इतर पक्षांतील अनेक नेते गेले होते. त्याचप्रमाणे, मुख्यमंत्री एकनाथ शिंदे अशोक खरात यांच्याकडे गेले असतील, याचा अर्थ ते त्यांच्या चुकीच्या कामांचे समर्थन करत नाहीत, असे निरुपम यांनी स्पष्ट केले.
वार्ताहार/प्रतिनिधी
