[ads1]
नांदेड (प्रतिनिधी) – साहित्य आणि काव्य क्षेत्रात आपल्या संवेदनशील लेखणीने वंचित, उपेक्षित आणि कष्टकरी समाजाचा आवाज बुलंद करणारे कवी डी. एन. मोरे खैरकेकर यांची शंभराव्या राज्यस्तरीय पुणे मराठी काव्य संमेलन २०२६ मध्ये प्रतिष्ठेच्या साहित्यसम्राट अण्णाभाऊ साठे कविरत्न पुरस्कार २०२६ साठी निवड करण्यात आली आहे. त्यांच्या साहित्यिक, सामाजिक तसेच काव्य क्षेत्रातील संघर्षमय आणि प्रेरणादायी योगदानाची दखल घेत ही निवड करण्यात आली आहे.
‘जिथे इच्छा तिथे मार्ग’ या उक्तीप्रमाणे प्रतिकूल परिस्थितीतही सातत्याने साहित्यसेवा करणाऱ्या कवी डी. एन. मोरे यांच्या लेखणीतून वंचितांचा हुंकार, सामाजिक वास्तव आणि लोककलेचा जागर सातत्याने उमटत आला आहे. त्यांच्या कवितांमध्ये सामान्य माणसाच्या जगण्यातील वेदना, संघर्ष आणि आशावाद यांचे प्रभावी प्रतिबिंब दिसून येते. त्यामुळेच त्यांच्या साहित्यिक वाटचालीकडे अण्णाभाऊ साठे यांच्या परिवर्तनवादी साहित्यपरंपरेचा वारसा पुढे नेणारी वाटचाल म्हणून पाहिले जाते.
कवी डी. एन. मोरे यांनी ९५ व्या अखिल भारतीय मराठी साहित्य संमेलन, उदगीर येथील सीमावर्ती कवी संमेलनात तसेच ९९ व्या अखिल भारतीय मराठी साहित्य संमेलन, सातारा येथील कवी कट्ट्यावर काव्यवाचन केले आहे. याशिवाय विविध राज्यस्तरीय कवी संमेलनांमध्ये त्यांनी आपल्या कविता प्रभावीपणे सादर केल्या असून, त्यांना शाल, सन्मानपत्र आणि सन्मानचिन्ह देऊन गौरविण्यात आले आहे.
मराठवाडा साहित्य परिषद, अविष्कार साहित्य संमेलन यांसह विविध साहित्यिक व्यासपीठांवर त्यांच्या कवितांचे सादरीकरण झाले आहे. आकाशवाणी नांदेडवरून त्यांच्या तब्बल १५ मिनिटांच्या कार्यक्रमात ९ कविता प्रसारित झाल्यानंतर त्यांचे अभिनंदन करून शुभेच्छापत्रासह ५०० रुपयांचा धनादेश देऊन गौरव करण्यात आला होता.
त्यांच्या कविता विविध वर्तमानपत्रे, मासिके तसेच पद्मरत्न दिवाळी अंकात सलग सहा वर्षे आणि व्यक्तिमत्व विकास दिवाळी अंकात सलग चार वर्षे प्रकाशित झाल्या आहेत. दैनिक ‘सकाळ’चे तत्कालीन कार्यकारी संपादक यमाजी मालकर यांनीही त्यांच्या साहित्यिक योगदानाची दखल घेत शुभेच्छांसह अभिनंदनपत्र आणि १०० रुपयांचा धनादेश पाठवून त्यांचा गौरव केला होता.
कवी डी. एन. मोरे हे नांदेड जिल्हा पोलीस सेवादलातून सहाय्यक पोलीस उपनिरीक्षक म्हणून सेवानिवृत्त झाले आहेत. सेवाकाळासोबतच त्यांनी सामाजिक कार्याचीही नाळ घट्ट जोडून ठेवली. साहित्य, सामाजिक बांधिलकी आणि लोकजागृतीच्या क्षेत्रातील त्यांच्या योगदानामुळे त्यांच्या पुरस्कार निवडीचे सर्वत्र स्वागत होत आहे. ‘थेंबे थेंबे तळे साचे’ या म्हणीप्रमाणे अनेक वर्षांच्या सातत्यपूर्ण साहित्यसेवेचे हे यश असल्याची भावना साहित्यप्रेमींमधून व्यक्त होत आहे.
हा प्रतिष्ठेचा पुरस्कार २७ सप्टेंबर २०२६ रोजी महात्मा फुले सांस्कृतिक भवन, फातिमानगर, वानवडी, पुणे येथे आयोजित भव्य सोहळ्यात प्रदान करण्यात येणार आहे.
या पुरस्कारासाठी निवड झाल्याची माहिती रानकवी जगदीप वनशिव, संस्थापक अध्यक्ष, रानकवी प्रतिष्ठान महाराष्ट्र राज्य आणि लोककवी सीताराम नरके, संस्थापक अध्यक्ष, ज्ञानाई फाउंडेशन, कला साहित्य विचारमंच, पुणे यांनी कळविली आहे.
कवी डी. एन. मोरे यांच्या या उल्लेखनीय सन्मानाबद्दल साहित्यिक, कवी, मित्रमंडळी, परिवारातील सदस्य आणि साहित्यप्रेमींकडून त्यांच्यावर अभिनंदनाचा वर्षाव होत आहे. ‘कष्टाला फळ मिळतेच’ याचा प्रत्यय देणारी त्यांची साहित्यिक वाटचाल नवोदित कवींना निश्चितच प्रेरणादायी ठरणारी आहे.
[ads2]
Leave a Reply