शरद पवारांची भेट केवळ सदिच्छा, त्यात राजकारण नाही:विधान परिषदेच्या मतदानावर काँग्रेसचे लक्ष – हर्षवर्धन सपकाळ

काँग्रेसचे नेते हर्षवर्धन सपकाळ यांनी आज पत्रकारांशी संवाद साधताना राज्यातील राजकीय घडामोडी, शरद पवार यांच्यासोबत झालेली भेट आणि आज पार पडत असलेल्या विधान परिषदेच्या निवडणुका यावर सविस्तर भाष्य केले. “महाविकास आघाडी म्हणून आम्ही प्रत्येक निवडणुकीला सामोरे जात असून, शरद पवार यांची घेतलेली भेट ही पूर्णपणे सदिच्छा भेट होती,” असे स्पष्टीकरण सपकाळ यांनी दिले आहे. ‘शरद पवारांची भेट केवळ सदिच्छा’ राष्ट्रवादी काँग्रेसचे (शरद पवार गट) अध्यक्ष शरद पवार यांच्या भेटीबाबत बोलताना सपकाळ म्हणाले, “आज आदरणीय शरद पवार साहेबांची घेतलेली भेट ही कुठल्याही राजकीय किंवा प्रासंगिक कारणासाठी नव्हती. राज्यसभेवर त्यांची पुन्हा निवड झाल्यापासून ही भेट प्रलंबित होती. तसेच, त्यांच्या प्रकृतीची विचारपूस करण्यासाठी मी गेलो होतो, त्यामुळे ही केवळ एक सदिच्छा भेट होती. यात कोणताही राजकीय संदर्भ नव्हता. मात्र, महाराष्ट्रात सध्या काय सुरू आहे आणि ‘इंडिया’ आघाडीचा समन्वय कसा आहे, यावर साधक-बाधक चर्चा नक्कीच झाली.” ‘महाविकास आघाडी म्हणून सर्व निवडणुकांना सामोरे जातोय’ राज्यातील आगामी निवडणुका आणि महाविकास आघाडीतील समन्वयावर त्यांनी समाधान व्यक्त केले. “राज्यसभेची निवडणूक असो, विधान परिषदेची असो किंवा सध्या होऊ घातलेल्या पाच निवडणुका असोत, आम्ही महाविकास आघाडी म्हणून एकत्रितपणे सामोरे गेलो आहोत. मित्रपक्षांमध्ये परस्परपूरक अशी भूमिका आहे,” असे सपकाळ यांनी स्पष्ट केले. ‘विधान परिषदेच्या मतदानावर आमचे लक्ष’ आज पार पडत असलेल्या विधान परिषदेच्या पाच मतदारसंघांच्या मतदानाबाबत माहिती देताना ते म्हणाले, “आज पाच ठिकाणी मतदान सुरू असून यावर आमचे पूर्ण लक्ष आहे. तीन जागांवर काँग्रेस थेट निवडणूक लढवत आहे (अमरावती, नागपूर) तर उर्वरित जागांवर मित्रपक्ष लढत आहेत. या निवडणुकीची सर्व तयारी कालच पूर्ण झाली होती. आज सकाळपासून मतदान प्रक्रिया अतिशय सुरळीत सुरू असून, अद्याप कुठूनही कोणतीही तक्रार प्राप्त झालेली नाही.” पुणे पदवीधर-शिक्षक मतदारसंघात स्पायकॅम पेनद्वारे पैसे वाटप- सुप्रिया सुळे पुणे शिक्षक आणि पदवीधर मतदारसंघाच्या निवडणुकीत भाजपकडून पैसे वाटपासाठी स्पायकॅम असलेल्या पेनचा वापर केला जात असल्याच्या तक्रारी समोर येत आहेत, असा गंभीर आरोप खासदार सुप्रिया सुळे यांनी केला आहे. मतदारांच्या खिशाला असे पेन लावून, भाजपच्या उमेदवाराला मतदान केल्याचा व्हिडिओ रेकॉर्ड केला जात आहे आणि मतदान झाल्यानंतर तो व्हिडिओ दाखविल्यावर ठरलेली रक्कम दिली जात आहे, असा प्रकार सुरू असल्याची माहिती मतदार देत असल्याचे त्यांनी म्हटले आहे. सुप्रिया सुळे म्हणाल्या की, या तक्रारी अत्यंत गंभीर आणि चिंताजनक आहेत. मतदानाची गोपनीयता आणि मतदारांचे स्वातंत्र्य धोक्यात आणणाऱ्या या प्रकाराची निवडणूक आयोगाने व शासनाने तातडीने दखल घेऊन सखोल चौकशी करावी आणि दोषींवर कठोर कारवाई करावी. लोकशाहीच्या मूलभूत तत्त्वांना हरताळ फासणारे असे प्रकार कोणत्याही परिस्थितीत खपवून घेता कामा नयेत. निवडणूक प्रक्रिया ही निष्पक्ष, निर्भय आणि पारदर्शक वातावरणात पार पडलीच पाहिजे.
—————— हेही वाचा.. विधान परिषदेच्या 5 जागांसाठी आज मतदान: 182 उमेदवारांचे भवितव्य मतपेटीत बंद होणार, कोण मारणार बाजी? 27 ऑक्टोबरला मतमोजणी
राज्यातील विधान परिषदेच्या बहुचर्चित शिक्षक आणि पदवीधर मतदारसंघांच्या निवडणुकीसाठी आज (शुक्रवार, २३ ऑक्टोबर) मतदान पार पडत आहे. पुणे, नागपूर, अमरावती आणि छत्रपती संभाजीनगर (मराठवाडा) या विभागांमधील एकूण ५ मतदारसंघांमध्ये ही निवडणूक होत असून, तब्बल १८२ उमेदवारांचे राजकीय भवितव्य आज मतपेटीत बंद होणार आहे. अनेक मतदारसंघांमध्ये प्रस्थापित विरुद्ध बंडखोर अशी चुरशीची लढत पाहायला मिळत आहे. २७ ऑक्टोबर रोजी या निवडणुकीची मतमोजणी होणार आहे. सविस्तर वाचा