Chorbagan accident, ambulance did not arrive, injured were taken to hospital on two-wheelers, eyewitnesses narrated the incident…

पश्चिम बंगालच्या उत्तर कोलकाता येथील चोरबागान दुर्गा पूजा मंडपात मुसळधार पावसात गर्दी वाढल्याने चेंगराचेंगरी झाली. प्रत्यक्षदर्शींनुसार, मंडपात प्रवेश करण्यासाठी सुमारे दीड तास रांगेत उभे राहावे लागत होते. सुरुवातीला पोलीस, स्वयंसेवक आणि रुग्णवाहिका घटनास्थळी दिसली नाही, असा आरोप लोकांनी केला. स्थानिक लोकांनी स्वतः जखमींना बाहेर काढून दुचाकीवरून रुग्णालयात पोहोचवले. या दुर्घटनेनंतर मंडपातील गर्दी नियंत्रण आणि आपत्कालीन व्यवस्थेवर प्रश्नचिन्ह निर्माण झाले आहे.

एका प्रत्यक्षदर्शीच्या मते, ५० हून अधिक लोक एकमेकांखाली दबले गेले होते. स्थानिकांनी सांगितले की, मंडपाच्या आजूबाजूला अनेक मृतदेह पडले होते. पोलीस उशिरा पोहोचले आणि आल्यानंतरही मदत मिळाली नाही, असा त्यांचा आरोप आहे. पूजा समितीचे काही लोक मृत्यूची बातमी नाकारत होते, तर स्वतः घटनास्थळी मृतदेह पाहिले असल्याचा दावाही स्थानिकांनी केला. एका प्रत्यक्षदर्शीने सांगितले की, ‘आम्ही मृतदेह ओला-उबरने नेत आहोत, पोलिस-रुग्णवाहिका नाहीये.’

बाहेर जाण्याचा मार्ग बंदवरून प्रश्न: बाहेर पडण्याचा मार्ग बंद का ठेवला होता आणि गर्दी नियंत्रित करण्यासाठी पुरेशी व्यवस्था का नव्हती, असा सवाल स्थानिकांनी उपस्थित केला. मात्र, या आरोपांना अधिकृत दुजोरा मिळालेला नाही.

तीन मैत्रिणी दबल्या गेल्या

वाचलेल्या एका महिलेने सांगितले, ‘पावसामुळे अनेक लोक मंडपासमोर उभे होते. अचानक मागून जोरात धक्का लागला व लोक एकमेकांवर पडू लागले. माझ्यासोबतच्या ३ मैत्रिणीही गर्दीखाली दबल्या गेल्या. सुमारे ४०-४५ मिनिटे श्वास घेणे कठीण झाले होते. अखेर लोकांची मदत घ्यावी लागली. मंडपाचा भाग तोडून आम्हाला बाहेर काढले.’

‘माझा आणि मैत्रिणीचा जीव वाचला… तो भयानक क्षण होता’

एका प्रत्यक्षदर्शीने सांगितले की, ते त्यांच्या मैत्रिणीसोबत दुर्गा पुजा मंडपात आले होते. गर्दी इतकी वाढली की लोकांना गुदमरल्यासारखे होऊ लागले आणि ते बाहेर पडण्यासाठी धडपड करू लागले. कसेबसे ते बाहेर आले, पण त्यांची मैत्रीण आतच अडकली. खूप प्रयत्नांनंतर ती बाहेर आली. तिला किरकोळ दुखापत झाली आहे. हा त्यांच्यासाठी अत्यंत भयानक क्षण होता.

वेगळ्या थीममुळे हा मंडप होता व्हायरल

हा मंडप ‘बियॉन्ड साउंड’ म्हणजेच आवाजापलीकडच्या अनुभवावर बनवला आहे. हा मंडप प्रकाश, संगीत, सजावट व जागेच्या डिझाइनद्वारे प्रेक्षकांना गोंधळातही सखोल शांततेचा अनुभव देतो. मंडपाच्या मध्यभागी देवी दुर्गेची बारकाईने घडवलेली मूर्ती आहे, जिला शांत विश्वासारखा आकार दिलेला आहे. आपल्या वेगळ्या थीममुळे हा मंडप सोशल मीडियावर व्हायरल आहे.