भंडारा जिल्ह्यातील कोसरा येथे गुरुवारी सायंकाळी एका दुर्दैवी घटनेने संपूर्ण परिसर हादरून गेला. एका जुन्या मातीच्या घराला शॉर्ट सर्किटमुळे भीषण आग लागली. या आगीने रौद्र रूप धारण केल्याने घरातील चार लाखांची रोकड आणि ४ तोळे सोन्याचे दागिने अशा एकूण २० लाखांचे नुकसान झाले आहे. या घटनेमुळे पुष्पाज आबाजी हटवार (वय ३३) यांचे कुटुंब उघड्यावर आले आहे. मिळालेल्या माहितीनुसार, गुरुवारी ५ मार्च रोजी सायंकाळी ७:३० वाजण्याच्या सुमारास अचानक घराच्या विद्युत वाहिनीमध्ये शॉर्ट सर्किट झाले. हे घर मातीचे आणि लाकडाचे असल्याने आगीने काही मिनिटांतच संपूर्ण घराला वेढा घातला. बघता-बघता आगीच्या ज्वालांनी भीषण स्वरूप धारण केले. परिसरातील नागरिकांनी आणि कुटुंबीयांनी आरडाओरडा करून मदतीसाठी धाव घेतली, परंतु आगीची तीव्रता इतकी होती की, घरातील एकही वस्तू सुरक्षित बाहेर काढणे शक्य झाले नाही. पुष्पाज हटवार यांनी आपल्या शेतीतील धानाच्या उत्पादनातून मिळालेली ४ लाख रुपयांची रोकड चार दिवसांपूर्वीच बँकेतून काढली होती. ही रक्कम सोसायटीचे कर्ज भरण्यासाठी आणि पुढील वर्षाच्या शेती नियोजनासाठी ठेवली होती. मात्र, आगीत या नोटांची राख झाली, तर काही ठिकाणी केवळ कोळसा झालेली नोटांची पुडकी हाती लागली. दुर्दैवाची गोष्ट म्हणजे, केवळ रोकडच नाही, तर काही दिवसांपूर्वीच पतसंस्थेकडून सोडवून आणलेले ४ तोळे सोन्याचे दागिनेही या आगीत भस्मसात झाले. एकाच रात्रीत कुटुंबाची सर्व पुंजी जळून खाक झाल्याने परिसरात हळहळ व्यक्त केली जात आहे. आग लागल्याचे समजताच शिवसेनेचे तालुका प्रमुख प्रशांत भूते व इतर ग्रामस्थांनी तातडीने धाव घेऊन पाणी व वाळूच्या साह्याने आग विझवण्याचा प्रयत्न केला. गावाची घनदाट वस्ती असल्याने आग इतर घरांपर्यंत पसरण्याचा धोका निर्माण झाला होता. दरम्यान, पवनी नगरपालिकेच्या अग्निशमन दलाला पाचारण करण्यात आले. अग्निशमन दलाच्या जवानांनी अथक परिश्रमाने आगीवर नियंत्रण मिळवले, परंतु तोपर्यंत संपूर्ण घर आगीच्या भक्षस्थानी पडले होते. घटनेची माहिती मिळताच पोलीस निरीक्षक धनंजय पाटील, वीज वितरण कंपनीचे अधिकारी आणि गावचे तलाठी यांनी घटनास्थळी धाव घेतली. प्रशासनाने तातडीने घटनेचा पंचनामा केला असून, पीडित कुटुंबाला त्वरित शासकीय मदत मिळावी, अशी मागणी ग्रामस्थांकडून होत आहे.
शॉर्ट सर्किटमुळे घराला भीषण आग:४ लाखांची रोकड, सोन्याचे दागिने जळून खाक; भंडारा जिल्ह्यातील कोसरा येथील घटना
