कीर्तन, पुष्पवृष्टी आणि महाप्रसाद वाटपाने तुकाराम बीज:हजारो भाविकांची उपस्थिती, विठ्ठल मंदिरासह वाखरी पालखी तळावरही सामूहिक आरती‎

.

श्री विठ्ठल रुक्मिणी मंदिरात असलेल्या श्री संत तुकाराम महाराज यांच्या समाधी स्थळी पादुका पूजन करण्यात आले. समाधीची फुलांनी सुंदर सजावट करण्यात आली होती. तसेच सभामंडपात कीर्तन संपन्न झाले आणि दुपारी ठीक १२.०० वाजता संत तुकाराम महाराज यांच्या वैकुंठ गमन सोहळ्याचे स्मरण करण्यात आले. यावेळी विठ्ठल नामाचा जयघोष आणि पुष्पवृष्टीचा मुख्य सोहळा पार पडला. याच बरोबर देहूकर वाडा, संत तुकाराम महाराज मठ, संत मीराबाई महाराज सेवाश्रम या ठिकाणी वारकरी संप्रदायातील शेकडो भाविकांच्या उपस्थितीत बिजोत्सव संपन्न झाला. टाळ-मृदंगाच्या गजर आणि ‘तुकाराम-तुकाराम’च्या जयघोषाने संपूर्ण परिसर भक्तीत न्हाऊन निघाला होता. वाखरी येथील पालखी तळावर असलेल्या संत तुकाराम महाराज पालखीच्या मेघडंबरी मध्ये संत तुकाराम महाराजांच्या पादुकांचे पूजन करण्यात आले. बुधवारी रात्री भजन सोहळा संपन्न झाला तर गुरुवारी सकाळी कीर्तन आणि दुपारी १२वाजता पुष्पवृष्टी सोहळा पार पडला. यानंतर वाखरी ग्रामस्थांच्या वतीने महाप्रसादाचे आयोजन करण्यात आले होते. यावेळी वाखरी आणि आसपासच्या परिसरातील शेकडो भाविक उपस्थित होते. वाखरी भजनी मंडळाच्या वतीने या कार्यक्रमाचे आयोजन करण्यात आले होते, अशी माहिती हभप भागवत महाराज पोरे यांनी दिली. बीज उत्सवाच्या निमित्ताने सायंकाळी ७.वाजता भाविकांसाठी संत मीराबाई महाराज सेवाश्रम येथे महाप्रसादाचे आयोजन करण्यात आले होते. मातोश्री श्री संत मिराबाई महाराज सेवाश्रम येथे मोठ्या संख्येने भाविकांनी या महाप्रसादाचा लाभ घेतला. हा सोहळा वै. मिराबाई महाराज आणि ह.भ.प. नवनाथ महाराज काळे यांच्या आशीर्वादाने आयोजित करण्यात आला होता. बुधवारी रात्री भजन सोहळा संपन्न झाला तर गुरुवारी सकाळी कीर्तन आणि दुपारी १२वाजता पुष्पवृष्टी सोहळा पार पडला. यानंतर वाखरी ग्रामस्थांच्या वतीने महाप्रसादाचे आयोजन करण्यात आले होते. कार्यक्रमाचे यशस्वी नियोजन ज्ञानेश्वर काळे मित्र मंडळ आणि नामदेव भुईटे मित्र परिवार यांच्या वतीने करण्यात आले. यावेळी नगराध्यक्ष प्रणिता भालके, नगरसेविका अर्चना शिंदे, प्रणिता घाडगे, नगरसेवक लखन चौगुले, प्रसा कळसे आदी उपस्थित होते. पंढरपूर शहर व तालुक्यातील भाविकांनी या सोहळ्याला उपस्थित राहून दर्शनाचा लाभ घेतला.