जय पवारांसाठी ऋतुजा पवारांची भावनिक पोस्ट चर्चेत:वडिलांच्या आठवणीत वाढदिवस; कठीण काळात अभिमानाची कबुली

राज्याचे दिवंगत उपमुख्यमंत्री अजित पवार यांचे सुपुत्र जय पवार यांचा वाढदिवस 29 फेब्रुवारीला येतो. ही तारीख चार वर्षांतून एकदाच येत असल्याने त्यांचा वाढदिवस विशेष मानला जातो. दरवर्षी कुटुंबिय आणि मित्रपरिवारात साध्या पद्धतीने वाढदिवस साजरा केला जातो. मात्र यंदाचा वाढदिवस वेगळ्या आणि भावनिक वातावरणात साजरा होत आहे. वडिलांच्या दुर्दैवी निधनानंतर पहिल्यांदाच वाढदिवस साजरा होत असल्याने पवार कुटुंबासाठी तो अधिक वेदनादायी ठरला आहे. काही दिवसांपूर्वी झालेल्या विमान अपघातात अजित पवार यांचे निधन झाले. या घटनेचा मोठा धक्का केवळ पवार कुटुंबालाच नव्हे तर संपूर्ण महाराष्ट्राला बसला. सध्या कुटुंब कठीण प्रसंगातून जात असताना जय पवार यांचा वाढदिवस आला. या निमित्ताने त्यांच्या पत्नी ऋतुजा पवार यांनी सामाजिक माध्यमावर भावनिक संदेश लिहित काही छायाचित्रे शेअर केली. त्या छायाचित्रांमध्ये अजित पवार यांच्यासोबत जय पवार यांचा एकत्रित फोटो तसेच पती-पत्नीचे काही खास क्षण टिपलेले फोटो समाविष्ट आहेत. ऋतुजा पवार यांनी आपल्या संदेशात, हे सगळं अजूनही अविश्वसनीय वाटत आहे, असे नमूद केले. अचानक बदललेल्या परिस्थितीत जय पवार यांनी दाखवलेल्या धैर्याचा आणि मानसिक ताकदीचा त्यांना अभिमान असल्याचे त्यांनी लिहिले. कठीण प्रसंगात खंबीरपणे उभे राहून कुटुंबाची जबाबदारी सांभाळण्याचा त्यांचा प्रयत्न प्रेरणादायी असल्याचे त्यांनी सांगितले. या शब्दांतून त्यांच्या मनातील भावना स्पष्टपणे उमटताना दिसतात. त्यांनी पुढे असेही म्हटले की, इतरांच्या गरजांना स्वतःच्या गरजांपेक्षा अधिक महत्त्व देण्याची जय पवार यांची सवय आहे. लोकांच्या अडचणी समजून घेऊन मदत करण्यासाठी ते सदैव तत्पर असतात. दादांच्या राज्याच्या भल्यासाठी आणि जनतेच्या सेवेसाठी झटताना त्यांनी प्रामाणिकपणा, शौर्य आणि निस्वार्थीपणा यांचा आदर्श जपला, असेही ऋतुजा पवार यांनी नमूद केले. अशा व्यक्तिमत्त्वाचा म्हणून अनुभव घेण्याचे भाग्य लाभल्याचे त्यांनी भावुक शब्दांत व्यक्त केले. आठवणींनी आणि भावनांनी भरलेला दिवस जय पवार यांचा वाढदिवस नेहमीच वेगळ्या पद्धतीने साजरा होतो, कारण ही तारीख चार वर्षांनी एकदाच येते. मात्र यंदा उत्साहाऐवजी आठवणींची छाया अधिक गडद आहे. वडिलांच्या आठवणींनी भारावलेल्या वातावरणात कुटुंबीयांनी साधेपणाने हा दिवस साजरा केला. सामाजिक माध्यमावर अनेकांनी जय पवार यांना शुभेच्छा देत त्यांना धीर दिला. अजित पवार यांच्या निधनानंतर पवार कुटुंबावर दुःखाचा डोंगर कोसळला असला तरी एकमेकांना आधार देत ते पुढे जात आहेत. अशा कठीण काळात ऋतुजा पवार यांनी व्यक्त केलेले शब्द केवळ वाढदिवसाच्या शुभेच्छा नसून पतीच्या धैर्याला दिलेली सलामी आहे. हा दिवस यंदा आनंदापेक्षा आठवणींनी आणि भावनांनी भरलेला ठरला आहे.