वाल्मीक कराडच्या अडचणीत वाढ:महादेव मुंडे हत्या प्रकरण अंगलट, बाळा बांगरांच्या जबाबाने खळबळ

बीड जिल्ह्यातील मस्साजोग गावचे सरपंच संतोष देशमुख यांच्या हत्येच्या घटनेने संपूर्ण महाराष्ट्र हादरला होता. या प्रकरणाचे राज्यभरात तीव्र पडसाद उमटल्यानंतर मुख्य आरोपी वाल्मीक कराड सध्या तुरुंगात आहे. मात्र, आता कराडच्या अडचणीत मोठी वाढ होण्याची शक्यता निर्माण झाली असून, परळीतील व्यापारी महादेव मुंडे यांच्या हत्या प्रकरणाने त्याला पुन्हा एकदा घेरले आहे. या जुन्या प्रकरणातील नवीन घडामोडींमुळे कराडच्या अडचणीत भर पडणार असल्याचे चिन्ह दिसत आहे. महादेव मुंडे हत्या प्रकरणात नुकताच विजयसिंह उर्फ बाळा बांगर यांचा 164 कलमानुसार गोपनीय जबाब नोंदवण्यात आला आहे. मिळालेल्या माहितीनुसार, या जबाबामध्ये बांगर यांनी वाल्मीक कराडसह त्याच्या मुलाचाही या गुन्ह्यात प्रत्यक्ष सहभाग असल्याचे नमूद केले आहे. बांगर यांचा हा जबाब या प्रकरणातील अत्यंत महत्त्वाचा पुरावा ठरणार असून, त्यामुळे कराड पिता-पुत्रापुढील कायदेशीर पेच अधिक कठीण होण्याची शक्यता वर्तवण्यात येत आहे. संतोष देशमुख हत्या प्रकरणात आधीच तुरुंगात असलेल्या वाल्मीक कराडच्या अडचणीत आता मोठी वाढ होण्याची शक्यता निर्माण झाली आहे, कारण व्यापारी महादेव मुंडे खून प्रकरणात विजयसिंह उर्फ बाळा बांगर यांनी दिलेल्या जबाबातून कराड आणि त्याच्या मुलाचे नाव समोर आले आहे. या खळबळजनक वळणानंतर आजच या प्रकरणातील दोन संशयितांची नार्को टेस्ट करण्यात येत असून, एसआयटीच्या तपासात आता नेमके काय धागेदोरे हाती लागतात, याकडे संपूर्ण राज्याचे लक्ष वेधले गेले आहे.