पुणे शहर कृषी-तंत्रज्ञान केंद्र म्हणून विकसित करण्याच्या उद्देशाने ‘इंटरनॅशनल अॅग्री हॅकाथॉन इन पुणे २०२६’ चे आयोजन करण्यात येणार आहे. जिल्हाधिकारी जितेंद्र डुडी यांनी ही माहिती दिली. कृषी महाविद्यालय, पुणे येथे १५ ते १७ मे २०२६ या कालावधीत ही स्पर्धा होईल. या स्पर्धेत सहभागी होण्यासाठी २३ फेब्रुवारी ते ३१ मार्च या कालावधीत ऑनलाईन अर्ज स्वीकारले जातील. प्राप्त अर्जांची तज्ज्ञ समितीद्वारे छाननी करून अंतिम फेरीतील स्पर्धकांची निवड ३० एप्रिल रोजी केली जाईल. अंतिम फेरीतील स्पर्धकांसाठी कृषी महाविद्यालय, पुणे येथे १५, १६ आणि १७ मे २०२६ रोजी प्रत्यक्ष स्पर्धेचे आयोजन करण्यात आले आहे. स्पर्धकांना आठ महत्त्वाच्या विषयांवर आधारित आपले नाविन्यपूर्ण तंत्रज्ञान सादर करता येईल. या विषयांमध्ये जमिनीचे आरोग्य सुधारण्यासाठी तंत्रज्ञान, स्मार्ट जलव्यवस्थापन, शेती यांत्रिकीकरण (एआय आणि रोबोटिक्स), कृषी प्रक्रिया आणि मूल्य साखळी, अक्षय ऊर्जा वापर व कचरा व्यवस्थापन, पीक संरक्षण, हवामान अनुकूल व शाश्वत शेती, तसेच शेतकऱ्यांनी स्वतः विकसित केलेली नाविन्यपूर्ण साधने यांचा समावेश आहे. स्पर्धेतील विजेत्यांना प्रोत्साहन देण्यासाठी आकर्षक बक्षिसे जाहीर करण्यात आली आहेत. अंतिम फेरीतून निवडल्या जाणाऱ्या विजेत्यास २५ लाख रुपये, तर उपविजेत्यास १५ लाख रुपयांचे रोख पारितोषिक देऊन गौरवण्यात येईल. पुणे हे कृषी आणि तंत्रज्ञानाचे संगम केंद्र बनले असून, या हॅकाथॉनमुळे देशातील गुणवंत संशोधकांना आणि शेतकऱ्यांना आपले कौशल्य दाखवण्याची मोठी संधी मिळेल. स्पर्धेचे अधिकृत संकेतस्थळ २३ फेब्रुवारीपासून उपलब्ध होणार आहे.
पुण्यात 'इंटरनॅशनल अॅग्री हॅकाथॉन 2026' चे आयोजन:15 ते 17 मे दरम्यान कृषी महाविद्यालयात स्पर्धा; विजेत्यांना 25 लाखांचे बक्षीस
