विवाहित महिलेवर धमकी देत अत्याचार:आरोपींच्या दुकानावर थेट बुलडोझर चालवला; अकोल्यात महापालिकेची धडक कारवाई

अकोला येथील बलात्काराच्या गंभीर घटनेनंतर प्रशासनाने अत्यंत आक्रमक पवित्रा घेतला असून, गुन्हेगारांविरुद्ध ‘बुलडोझर कारवाई’चा बडगा उगारला आहे. सिटी कोतवाली पोलिस ठाण्यात गुन्हा दाखल झालेल्या आरोपींच्या दुकानांवर अकोला महानगरपालिकेच्या तोडक पथकाने थेट बुलडोझर चालवून ती जमीनदोस्त केली. उत्तर प्रदेशात ज्याप्रमाणे गुन्हेगारी प्रवृत्ती मोडून काढण्यासाठी बुलडोझरचा वापर केला जातो, अगदी त्याच धर्तीवर अकोल्यातही ही कठोर कारवाई करण्यात आल्याने शहरात मोठी खळबळ उडाली आहे. या प्रकरणाची सविस्तर माहिती अशी की, डाबकी रोड परिसरातील एका विवाहित महिलेने आरोपींनी अश्लील व्हिडिओ व्हायरल करण्याची धमकी देऊन वारंवार अत्याचार केल्याची तक्रार पोलिसांत दिली होती. या प्रकरणात रहमान ऊर्फ मोहम्मद मुस्तफा सलीम तेली, मोहम्मद इब्राहिम ऊर्फ बाबू सलीम तेली, इब्राहिम (गॅरेजवाला) आणि चंदू वानखेडे यांच्याविरुद्ध बलात्कारासह विविध गंभीर कलमान्वये गुन्हे नोंदवण्यात आले आहेत. पीडितेच्या तक्रारीनंतर प्रशासनाने तत्काळ पावले उचलत आरोपींच्या बेकायदेशीर बांधकामांवर ही धडक कारवाई पूर्ण केली. पीडित महिलेने दिलेलया तक्रारीनुसार, परी बिंदी घर’ या दुकानात बलात्काराची घटना घडली. हे दुकान गांधी रोड, सीटी कोतवाली पोलिस ठाण्याच्या मागे आहे. याच ठिकाणी पीडितेशी अश्लील वर्तन करत तिचा व्हिडिओ काढण्यात आला. त्यानंतर जबरदस्ती करण्यात आल्याचा आरोप पीडितेने केला आहे. या प्रकरणाची गंभीर दखल घेत सीटी कोतवाली पोलिसांनी आतापर्यंत दोन आरोपींना अटक केली असून उर्वरित आरोपींबाबत पुढील कारवाई सुरू आहे. तसेच हे प्रकरण संवेदनशील असून दोन धर्मांमध्ये तेढ निर्माण होऊ नये, तसेच शहरातील कायदा व सुव्यवस्था अबाधित राहावी, यासाठी अकोला महानगरपालिका प्रशासनाने तातडीने पुढाकार घेतला आहे. दुकानावर बुलडोझर कारवाई अकोल्यातील गांधी रोडवरील सिटी कोतवाली पोलिस ठाण्याच्या मागे असलेल्या ‘परी बिंदी घर’ आणि त्यालगतच्या अवैध दुकानांवर महानगरपालिकेच्या तोडक पथकाने बुलडोझरच्या साहाय्याने मोठी कारवाई केली. जरी महानगरपालिका प्रशासनाने ही अधिकृतरीत्या अवैध अतिक्रमणाविरोधातील कारवाई असल्याचे स्पष्ट केले असले, तरी बलात्कारासारख्या गंभीर गुन्ह्यातील आरोपींच्याच मालमत्तेवर हा प्रहार झाल्याने शहरात प्रशासनाच्या आक्रमक भूमिकेची जोरदार चर्चा आहे. या कारवाईतून गुन्हेगारी प्रवृत्तींना आळा घालण्यासाठी प्रशासनाने ‘झिरो टॉलरन्स’ धोरण अवलंबल्याचे स्पष्ट संकेत मिळत आहेत. स्थानिक नागरिकांनी या धाडसी कारवाईचे उत्स्फूर्त स्वागत केले असून, उत्तर प्रदेशातील बुलडोझर मॉडेलच्या धर्तीवर अकोल्यातही गुन्हेगारांविरुद्ध कठोर पवित्रा घेतला जात असल्याची भावना व्यक्त होत आहे. अशा प्रकारच्या धडक कारवाईमुळे गुन्हेगारांमध्ये जरब बसली असून, समाजात प्रशासनाप्रती विश्वासाचे वातावरण निर्माण झाले आहे. दरम्यान, सिटी कोतवाली पोलीस या बलात्काराच्या प्रकरणाचा तांत्रिक आणि कायदेशीर दृष्टिकोनातून सखोल तपास करत असून, आरोपींना कठोर शिक्षा व्हावी यादृष्टीने पुरावे गोळा करण्याचे काम वेगाने सुरू आहे.