श्रीरामपूर तालुक्यातील अशोक सहकारी साखर कारखान्याच्या वार्षिक सर्वसाधारण सभेदरम्यान एका सभासदाला अडवून शिवीगाळ आणि धक्काबुक्की केल्याचा प्रकार समोर आला आहे. कारखान्याचे चेअरमन आणि माजी आमदार भानुदास मुरकुटे यांचे पुत्र सिद्धार्थ मुरकुटे यांच्यावर हा आरोप करण्यात आला आहे. या घटनेचा व्हिडिओ सोशल मीडियावर प्रसारित झाल्यानंतर परिसरात या प्रकाराची चर्चा सुरू झाली आहे. अशोक सहकारी साखर कारखान्याची 68 वी वार्षिक सर्वसाधारण सभा सप्टेंबरच्या अखेरीस आयोजित करण्यात आली होती. या सभेसाठी कारखान्याचे सभासद अर्जुन पटारे हे उपस्थित राहण्यासाठी आले होते. कारखान्याचे सभासद असल्याने त्यांनी प्रवेशावेळी आपले अधिकृत ओळखपत्र दाखवले होते. प्रवेशावेळी वाद झाल्याचा आरोप पटारे सभागृहात प्रवेश करत असताना सिद्धार्थ मुरकुटे यांनी त्यांना अडवले, असा आरोप तक्रारीत करण्यात आला आहे. ओळखपत्र दाखवूनही त्यांना प्रवेशाबाबत अडवण्यात आले. त्यानंतर दोघांमध्ये वाद झाला. यावेळी मुरकुटे यांनी शिवीगाळ केली आणि त्यांच्याशी धक्काबुक्की केल्याचा आरोप पटारे यांनी केला आहे. घटनेचा काही भाग मोबाइल कॅमेऱ्यात चित्रित झाला असून हा व्हिडिओ सोशल मीडियावर व्हायरल झाला आहे. व्हिडिओमध्ये सभेच्या ठिकाणी काही व्यक्तींमध्ये वाद आणि धक्काबुक्की होत असल्याचे दिसून येत असल्याचा दावा केला जात आहे. सभासदांमध्ये नाराजी या प्रकारानंतर कारखान्याच्या सभासदांमध्ये नाराजी व्यक्त केली जात आहे. सर्वसाधारण सभा ही सभासदांना कारखान्याच्या कामकाजाबाबत प्रश्न विचारण्याची आणि आपली भूमिका मांडण्याची महत्त्वाची जागा असते. त्यामुळे सभेला आलेल्या सभासदाशी अशा प्रकारे वर्तन झाल्याचा आरोप गंभीर असल्याची चर्चा परिसरात सुरू आहे. कारखान्याच्या सभासदांना सभेत सहभागी होण्याचा अधिकार असताना प्रवेशाच्या मुद्द्यावरून वाद निर्माण होणे आणि त्यानंतर धक्काबुक्कीपर्यंत प्रकार जाणे यामुळे कारखान्याच्या कारभारावरही प्रश्न उपस्थित केले जात आहेत. पोलिसांत तक्रार; अदखलपात्र गुन्ह्याची नोंद या घटनेनंतर अर्जुन पटारे यांनी श्रीरामपूर शहर पोलीस ठाण्यात तक्रार दाखल केली. त्यांच्या तक्रारीच्या आधारे पोलिसांनी सिद्धार्थ मुरकुटे यांच्याविरोधात अदखलपात्र गुन्ह्याची नोंद केली आहे. दरम्यान, या प्रकरणाची पुढील चौकशी पोलिसांकडून केली जात आहे. सोशल मीडियावर व्हायरल झालेल्या व्हिडिओसह तक्रारीतील आरोपांची पडताळणी केली जाण्याची शक्यता आहे. कारवाईच्या मागणीला जोर घटनेचा व्हिडिओ समोर आल्यानंतर सभासद आणि विरोधी गटातील कार्यकर्त्यांकडून संबंधितांवर कारवाई करण्याची मागणी केली जात आहे. कारखाना हा शेतकरी आणि सभासदांच्या सहभागातून चालणारी सहकारी संस्था असल्याने सभासदांशी सन्मानाने वागले पाहिजे, अशी भूमिका काही सभासदांनी व्यक्त केली आहे. या घटनेमुळे अशोक सहकारी साखर कारखान्याच्या परिसरातील वातावरण तापले असून, प्रकरण पुढे कोणते वळण घेते याकडे सभासदांचे लक्ष लागले आहे. हेही वाचा… एमपीएससी विद्यार्थ्यांच्या मागण्यांना मुख्यमंत्र्यांचा सकारात्मक प्रतिसाद:2 ऑक्टोबरचे आंदोलन तात्पुरते स्थगित, सचिवांची बदली होणार एमपीएससीच्या विविध प्रश्नांवरून आंदोलनाच्या तयारीत असलेल्या विद्यार्थ्यांच्या शिष्टमंडळाची मुख्यमंत्री देवेंद्र फडणवीस यांच्यासोबत बुधवारी सविस्तर बैठक झाली. या बैठकीत विद्यार्थ्यांच्या प्रमुख मागण्यांवर सकारात्मक चर्चा झाली. त्यानंतर २ ऑक्टोबर रोजी नियोजित पुण्यातील आंदोलन तात्पुरते स्थगित करण्याचा निर्णय विद्यार्थ्यांनी घेतला. सविस्तर वाचा….