लॉरेन्स बिश्नोई गँगला FBI चा दणका:अमेरिका-कॅनडासह अनेक देशांमध्ये 50 ठिकाणी छापे; 24 जणांना बेड्या, पुण्यातही 4 गजाआड

अमेरिकेच्या तपास यंत्रणा एफबीआयने (FBI) पहिल्यांदाच गँगस्टर लॉरेन्स, गोल्डी बराड आणि जग्गू भगवानपुरिया यांच्यावर मोठी कारवाई केली आहे. मंगळवारी अमेरिका, कॅनडा आणि युरोपमध्ये संयुक्त कारवाईदरम्यान भारताशी संबंधित गँगस्टर्सच्या २४ साथीदारांना अटक करण्यात आली, तर ३७ आरोपींविरुद्ध गुन्हा दाखल करण्यात आला आहे. याचबरोबर, गँगस्टर लॉरेन्स आणि गोल्डी बराड यांना खलिस्तान समर्थक हरदीप सिंग निज्जर हत्याकांडातील आरोपी बनवण्यात आले आहे. दोघांनी मिळून कट रचल्याचा आरोप आहे. आरोपींमध्ये रोहित गोदारा आणि इतर साथीदारांची नावेही समाविष्ट असल्याचा दावा करण्यात आला आहे. आरोपपत्रात असे नमूद करण्यात आले आहे की, लॉरेन्स भारतात तुरुंगात असतानाही आपले नेटवर्क चालवतो आणि त्याचे साथीदार भारत, अमेरिका, कॅनडा तसेच युरोपमध्ये टार्गेट किलिंग आणि अंमली पदार्थांची तस्करी करतात. यूएस फेडरल सरकारच्या अधिकाऱ्यांनी सांगितले की, ते लवकरच भारतीय सरकारकडे लॉरेन्स बिश्नोई, जग्गू भगवानपुरिया आणि सक्रिय पोलीस प्रमुख पुंदरप्रीत सिंग यांच्या औपचारिक प्रत्यार्पणाची मागणी करतील. याव्यतिरिक्त, एफबीआयने गोल्डी बराडवर ५० हजार डॉलरचे बक्षीस जाहीर केले आहे. FBI ने आणखी काय खुलासे केले…. 50 ठिकाणी छापे, ड्रग्ज-शस्त्रे जप्त अमेरिकन फेडरल अथॉरिटीने पत्रकार परिषद घेऊन महत्त्वाचे खुलासे केले. त्यांनी सांगितले की, ते इंडिया-आधारित आंतरराष्ट्रीय संघटित गुन्हेगारी गटाविरुद्ध अनेक वर्षांपासून आंतरखंडीय तपास करत होते. या अंतर्गत त्यांनी किमान 2 डझनहून अधिक लोकांना अटक केली आहे. या अटक यूएस, कॅनडा आणि युरोपमध्ये झाल्या आहेत. आरोपींविरुद्ध किमान 50 शोध वॉरंट जारी करण्यात आले होते, त्यानंतर हजारो किलो नार्कोटिक्स ड्रग्ज आणि डझनभर शस्त्रे जप्त करण्यात आली आहेत. गँगस्टर लॉरेन्स तुरुंगातून चालवत आहे टोळी यूएस फेडरल सरकार आणि लॉस एंजेलिसच्या जिल्हा ॲटर्नी जनरलच्या प्रतिनिधींनी सांगितले की, या संपूर्ण भारतीय-आधारित गुन्हेगारी संघटनेच्या नेटवर्कचे नेतृत्व भारतातील तुरुंगात असलेला गँगस्टर लॉरेन्स करत आहे. उत्तर अमेरिकेत त्याचे ऑपरेशन्स गोल्डी ब्रार चालवत होता आणि युरोपमध्ये सर्व काम रोहित गोदारा सांभाळत होता. असे मानले जाते की या तिन्ही टोळी प्रमुखांमध्ये आता फूट पडली आहे आणि ते एकमेकांचे विरोधक बनले आहेत, परंतु यूएस अधिकाऱ्यांचे म्हणणे आहे की हे तिघे आतापर्यंत एकत्र काम करत आले आहेत. हेही वाचा.. पुण्यात बिश्नोई गँगचे खंडणी रॅकेट उद्ध्वस्त, चार गजाआड पुणे शहरातील व्यावसायिक आणि उद्योजकांना खंडणीसाठी धमकावणाऱ्या कुख्यात बिश्नोई गँगच्या रॅकेटचा पुणे पोलिसांनी पर्दाफाश केला आहे. या प्रकरणात मुख्य गोळीबार करणाऱ्या दोघांसह एकूण ४ जणांना ताब्यात घेतले असून त्यांच्याकडून तीन अत्याधुनिक शस्त्रे जप्त करण्यात आली आहेत. सलग १५ दिवस पाच राज्यांमध्ये पाच हजार किलोमीटरचा पाठलाग करत पोलिसांनी ही मोठी कारवाई केली. पोलिस आयुक्त अमितेश कुमार यांनी दिलेल्या माहितीनुसार, या प्रकरणातील मुख्य संशयित आणि प्रत्यक्ष गोळीबार करणारा आरोपी पवनकुमार याला तीन दिवसांपूर्वीच अटक करण्यात आली होती. त्यानंतर दुसरा मुख्य आरोपी रविकुमार याला एका अल्पवयीन साथीदारासह पंजाबमधील भटिंडा येथून ताब्यात घेण्यात आले. तसेच, या आरोपींना पुण्यात स्थानिक पातळीवर मदत करणाऱ्या सत्यप्रकाशलाही पोलिसांनी गजाआड केले आहे. हे आरोपी मूळचे हरियाणा आणि राजस्थानचे रहिवासी असून पूर्वी ते पुणे आणि पिंपरी-चिंचवड भागात एका स्टील कंपनीत काम करत होते. सविस्तर वाचा..