काँग्रेस-शिवसेना (उद्धव बाळासाहेब ठाकरे) आघाडीचे वानवडी-साळुंखे विहार प्रभाग क्रमांक १८ मधील अधिकृत उमेदवार आणि माजी महापौर प्रशांत सुदामराव जगताप यांनी नववर्षाच्या पहिल्याच दिवशी, १ जानेवारी रोजी, आपल्या महानगरपालिका निवडणुकीच्या प्रचाराचा जोरदार प्
.
प्रचाराचा शुभारंभ वानवडी गावचे ग्रामदैवत श्री काळभैरवनाथ महाराजांचे आशीर्वाद घेऊन करण्यात आला. त्यानंतर त्यांनी घरातील ज्येष्ठांचे आशीर्वाद घेतले. वानवडी येथील छत्रपती शिवाजी महाराजांच्या स्मारकास आणि महात्मा ज्योतिराव फुले सांस्कृतिक भवन येथील महात्मा ज्योतिराव फुले यांच्या पुतळ्यास पुष्पहार अर्पण करून अभिवादन केले.
यावेळी त्यांच्यासोबत प्रभागातील उमेदवार रत्नप्रभा जगताप, साहिल केदारी, शमिका जांभुळकर उपस्थित होते. तसेच, काँग्रेसचे ज्येष्ठ नेते मोहन जोशी, अभय छाजेड, नानासाहेब जगताप आणि शिवाजी (अण्णा) केदारी यांनीही प्रचारात सहभाग घेतला.
यावेळी बोलताना प्रशांत जगताप म्हणाले की, “काँग्रेस-शिवसेना (उद्धव बाळासाहेब ठाकरे) पक्षाचे अधिकृत उमेदवार म्हणून आम्ही वानवडी-साळुंखे विहार प्रभागातील नागरिकांच्या सेवेसाठी वचनबद्ध आहोत. भारतीय संविधानाला स्मरून, शिव-शाहू-फुले-आंबेडकर यांच्या समतेच्या विचारांचा अंगीकार करून आम्ही सर्वसमावेशक विकास आणि सर्वांगीण प्रगतीसाठी सज्ज आहोत.”
ते पुढे म्हणाले, “ही निवडणूक केवळ एखाद्या पदासाठीची धडपड नसून, महात्मा फुलेंनी दिलेल्या समतेच्या विचारांची जपणूक करण्याचा हा लढा आहे. या लढ्यात आम्हाला यश मिळावे अशी प्रार्थना करतो.” त्यांनी उपस्थितांना नवीन वर्ष आणि शौर्य दिनाच्या शुभेच्छाही दिल्या.
१ जानेवारी हा क्रांतीसूर्य महात्मा ज्योतिराव फुले आणि क्रांतीज्योती सावित्रीबाई फुले यांनी १८४८ मध्ये पुण्यात मुलींची पहिली शाळा सुरू केल्याचा दिवस आहे. माता-भगिनींच्या जीवनात ज्ञानाची ज्योत प्रज्वलित करणाऱ्या या दिवसाला “फुले दांपत्य सन्मान दिन” म्हणून साजरे केले जाते. या ऐतिहासिक दिनानिमित्त प्रशांत जगताप यांनी फुले दांपत्याच्या महान कार्याला विनम्र अभिवादन केले.
