अचलपूर तालुक्यातील हनवतखेडा येथील तरुण शेतकरी आणि परतवाडा शहरातील श्री डिजिटल हबचे संचालक सुमित प्रकाश घोम यांचा बुधवारी सायंकाळी दुचाकी अपघातात मृत्यू झाला. हा अपघात परतवाडा-अंजनगाव मार्गावर घडला, ज्यात आणखी दोन युवक जखमी झाले आहेत.
.
३१ डिसेंबर रोजी रात्री ८ वाजण्याच्या सुमारास परतवाडा-अंजनगाव मार्गावरील पेट्रोल पंपाजवळ दोन दुचाकींची समोरासमोर धडक झाली. एमएच २७ बीएल ६२४६ आणि एमएच २७ डी ३६८१ या क्रमांकाच्या दुचाकी या अपघातात सामील होत्या. अपघातानंतर तिघांनाही रुग्णालयात नेण्यात आले, मात्र सुमित घोम यांचा वाटेतच प्राणज्योत मालवली.
या अपघातात दुसऱ्या दुचाकीवरील एक युवक गंभीर जखमी झाला असून, त्याला पुढील उपचारासाठी अमरावती येथे रेफर करण्यात आले आहे. अन्य एकाला किरकोळ दुखापत झाली आहे. हे दोघेही अंजनगाव तालुक्यातील असल्याचे समजते, मात्र त्यांची ओळख अद्याप पटलेली नाही.
सुमित घोम हे महानुभाव पंथाचे अनुयायी होते आणि गावात तसेच परिवारात सर्वांना मदत करणारे, तसेच युवकांसाठी प्रेरणादायी व्यावसायिक म्हणून ओळखले जात होते. ते बहुतांश वेळा चारचाकी वाहनाचा वापर करत असले तरी, अपघाताच्या दिवशी ते दुचाकीने परतवाडा जात होते. त्यांच्या निधनाने सर्वत्र शोक व्यक्त होत आहे.
