नांदेड (प्रतिनिधी) – शहरातील प्रत्येक नागरिकाचे नाव एसआयआर (SIR) च्या ड्राफ्ट लिस्टमध्ये समाविष्ट व्हावे आणि भविष्यातील संभाव्य अडचणी टाळता याव्यात, यासाठी मजलीस-ए-इत्तेहादुल मुस्लिमीन (MIM) पक्षाच्या वतीने नांदेडमध्ये व्यापक जनजागृती मोहीम हाती घेण्यात आली आहे. एमआयएमचे माजी प्रदेशाध्यक्ष सय्यद मोईन यांनी आज प्रसारमाध्यमांशी संवाद साधताना जनतेला आवाहन केले की, या मोहिमेबाबत कोणत्याही प्रकारची गफलत किंवा निष्काळजीपणा करू नका.
नेत्यांचे मार्गदर्शन आणि कार्यकर्त्यांची फळी सय्यद मोईन यांनी माहिती दिली की, एमआयएमचे राष्ट्रीय अध्यक्ष बॅरिस्टर खा.असदोद्दीन ओवैसी यांच्या सूचनेनुसार आणि आमदार कौसर मोईद्दीन तसेच माजी खासदार इम्तियाज जलील यांच्या मार्गदर्शनाखाली ही मोहीम राबवली जात आहे. या मोहिमेत मराठवाडा अध्यक्ष फिरोज खान लाला, माजी नगरसेवक मसूद सेठ, मुजीब, शमीम, नासिर, फसीद्दीन, अंसार, हबीब आणि इतर अनेक जबाबदार पदाधिकारी आणि नगरसेवक सक्रियपणे सहभागी झाले आहेत.
हेल्प सेंटर्स आणि बीएलएची मदत नांदेड शहरातील विविध प्रभागांमध्ये आणि प्रभाग क्रमांक ११, १२, १३, १४ आणि १५ यांसारख्या भागांत विशेष हेल्प सेंटर्स (मदत केंद्रे) उभारण्यात आली आहेत. सय्यद मोईन यांनी सांगितले की, आम्ही प्रत्येक वार्डात आणि प्रभागात हेल्प सेंटर सुरू केले आहेत, जिथे आमचे बीएलए (BLA) आणि कार्यकर्ते उपस्थित आहेत. जनतेला मार्गदर्शन करण्यासाठी आणि त्यांची कागदपत्रे पूर्ण करण्यासाठी हे कार्यकर्ते अहोरात्र काम करत आहेत. हैदर फंक्शन हॉल तसेच सैयदान परिसरातील नासिर साहेबांच्या कार्यालयाजवळ अशा प्रकारची केंद्रे सुरू असल्याचे त्यांनी नमूद केले.
इनोव्हेशन फॉर्म भरणे अनिवार्य गेल्या तीन दिवसांपासून इनोव्हेशन फॉर्म भरण्याची प्रक्रिया सुरू झाली आहे. सय्यद मोईन यांनी स्पष्ट केले की, जोपर्यंत नागरिक हे फॉर्म भरून देणार नाहीत, तोपर्यंत त्यांचे नाव ड्राफ्ट लिस्टमध्ये येणार नाही. आमची तळमळ आणि इच्छा आहे की, एका महिन्याच्या आत प्रत्येक पात्र व्यक्तीचे नाव ड्राफ्ट लिस्टमध्ये समाविष्ट व्हावे. कोणीही या प्रक्रियेतून वंचित राहू नये, असेही त्यांनी सांगितले. विशेषतः मुस्लिम आणि दलित समाजातील नागरिकांनी आपले नाव नोंदवण्यासाठी पुढे यावे, असे आवाहन पक्षाच्या वतीने करण्यात आले आहे.
अफवांवर विश्वास न ठेवण्याचे आवाहन एसआयआर नोंदणीबाबत समाजात पसरलेल्या भीतीवर भाष्य करताना सय्यद मोईन म्हणाले की, अनेकांच्या मनात अशी भीती आहे की नाव नोंदवल्यास त्यांना बांगलादेशात पाठवले जाईल. मात्र, त्यांनी स्पष्ट केले की अशा अफवांना घाबरण्याची गरज नाही. लोकांनी घाबरू नये, पण गफलतही करू नये. जर आज तुम्ही सावध झाला नाहीत आणि नोंदणी केली नाही, तर भविष्यात पश्चात्तापाशिवाय काहीही हाती उरणार नाही, असा इशारा त्यांनी दिला.
कागदपत्रांची पूर्तता आणि पुढील दिशा नोंदणी प्रक्रियेसाठी आवश्यक असलेल्या १२ विविध कागदपत्रांपैकी कोणत्याही एका कागदपत्राची पूर्तता करणे आवश्यक आहे. जर नागरिकांना कागदपत्रे गोळा करण्यात किंवा फॉर्म भरण्यात अडचण येत असेल, तर त्यांनी तात्काळ एमआयएमच्या हेल्प सेंटर्सशी संपर्क साधावा, असे सांगण्यात आले आहे.
मशिदींमध्ये जनजागृतीचा संकल्प ही मोहीम केवळ हेल्प सेंटर्सपुरती मर्यादित न ठेवता, ती घराघरापर्यंत पोहोचवण्यासाठी रिक्षाद्वारे प्रचार केला जात आहे. तसेच, येणाऱ्या काळात एमआयएमचे नेते आणि कार्यकर्ते शहरातील विविध मशिदींचा दौरा करणार आहेत. पाचवेळच्या नमाजनंतर मशिदींमध्ये थांबून तेथील स्थानिकांना एसआयआरचे महत्त्व पटवून दिले जाईल आणि त्यांना बेदार (जागरूक) केले जाईल.
पीर बुऱ्हाण, खडकपुरा, असरा नगर, वाजेगाव, मोमीनपुरा आणि मलिया यांसारख्या भागांतही विशेष कॅम्प आयोजित करून ही मोहीम अधिक तीव्र करण्याचा निर्धार एमआयएमने व्यक्त केला आहे. मजलीस नेहमीच जनतेच्या अडीअडचणीत त्यांच्या पाठीशी उभी राहिली आहे आणि यापुढेही राहील,असे आश्वासन सय्यद मोईन यांनी यावेळी दिले.
नांदेडच्या जनतेने वेळेचा सदुपयोग करून, आपल्या जवळच्या हेल्प सेंटरला भेट द्यावी आणि बीएलओ (BLO) किंवा बीएलए (BLA) यांच्या मदतीने आपले नाव नोंदवून घ्यावे, हीच या मोहिमेचामुख्य उद्देश आहे.
