राज्यातील महानगरपालिका निवडणुकांच्या पार्श्वभूमीवर राजकीय हालचाली वेग घेताना दिसत आहेत. पुणे आणि पिंपरी-चिंचवडनंतर आता मुंबई महापालिकेच्या निवडणुकीकडे सर्व पक्षांचे लक्ष केंद्रीत झाले आहे. विशेषतः राष्ट्रवादी काँग्रेसच्या दोन्ही गटांबाबत मुंबईत नवी र
.
याच पार्श्वभूमीवर राष्ट्रवादी काँग्रेसचे अध्यक्ष अजित पवार यांनी मुंबईतील निवडणुकीसाठी महत्त्वाचा राजकीय संकेत दिल्याची माहिती सूत्रांकडून मिळत आहे. बुधवारी मुंबईतील राष्ट्रवादीच्या कार्यालयात शहर व प्रदेश पातळीवरील पदाधिकाऱ्यांसोबत झालेल्या बैठकीनंतर अजित पवारांनी राष्ट्रवादी काँग्रेस शरदचंद्र पवार पक्षाला एकत्र निवडणूक लढवण्याचा प्रस्ताव देण्याचे निर्देश दिल्याचे समजते. महायुतीमध्ये अडचणी वाढत असताना, मुंबईत एकत्र येण्याचा पर्याय राष्ट्रवादीकडून गांभीर्याने विचारात घेतला जात असल्याचे या घडामोडींवरून स्पष्ट होते.
जर हा प्रस्ताव पुढे प्रत्यक्षात आला, तर पुणे आणि पिंपरी-चिंचवडनंतर मुंबईतही दोन राष्ट्रवादी पक्ष एकत्र निवडणूक लढवताना दिसू शकतात. मात्र, या समीकरणाला दुसरी बाजूही आहे. राष्ट्रवादी काँग्रेस शरदचंद्र पवार पक्ष मुंबईत शिवसेना उद्धव ठाकरे गट आणि मनसेसोबत आघाडी करून निवडणूक लढवण्यास अधिक इच्छुक असल्याची माहिती समोर येत आहे. त्यामुळे शरद पवार गट नेमका कोणता मार्ग स्वीकारतो, यावर मुंबईतील अंतिम चित्र अवलंबून राहणार आहे.
दरम्यान, मुंबईत राजकीय समीकरणे अधिक गुंतागुंतीची ठरत आहेत. एकीकडे अजित पवारांची राष्ट्रवादी शरद पवारांच्या राष्ट्रवादीला सोबत घेण्यासाठी प्रयत्नशील आहे, तर दुसरीकडे शरद पवार गट ठाकरे बंधूंसोबत जाण्याची शक्यता तपासत आहे. नवाब मलिक यांच्या मुद्द्यावरून शिवसेना आणि भाजपकडून माघार येण्याची शक्यता कमी असल्याने राष्ट्रवादीसाठी महायुतीतील मार्ग अधिक कठीण झाला आहे. तसेच, मुंबईतील अल्पसंख्यांक मतांचा विचार करता नवाब मलिक हे राष्ट्रवादीसाठी महत्त्वाचे मानले जात असल्याने पक्षाकडून इतर पर्यायांचीही चाचपणी सुरू आहे.
राष्ट्रवादी काँग्रेससाठी ही निवडणूक निर्णायक ठरणार
मुंबई महापालिका निवडणुकीच्या पार्श्वभूमीवर सह्याद्री अतिथीगृह येथे सुरू असलेल्या बैठकीत राष्ट्रवादीकडून विविध राजकीय शक्यतांवर चर्चा केली जात आहे. महायुतीसोबत राहायचे, स्वबळावर लढायचे की शरद पवार गटासोबत एकत्र यायचे, याबाबत अंतिम निर्णय अजून झालेला नाही. मात्र, मुंबईतील बदलती राजकीय गणिते पाहता राष्ट्रवादी काँग्रेससाठी ही निवडणूक निर्णायक ठरणार असून, येत्या काही दिवसांत या संदर्भात मोठा राजकीय निर्णय जाहीर होण्याची शक्यता व्यक्त केली जात आहे.
