रायगड आणि पुणे परिसरात आज अपघाताच्या दोन वेगवेगळ्या घटनांनी खळबळ उडाली आहे. रायगडमधील श्रीवर्धन येथे पुण्याच्या पर्यटकांच्या भरधाव थार गाडीने एकाला चिरडल्याची घटना घडली, तर दुसरीकडे मुंबई-पुणे एक्सप्रेस-वेवर ट्रकच्या भीषण अपघातात चालकाचा जागीच मृत्यू
.
रायगड जिल्ह्यातील श्रीवर्धन बाजारपेठेत पर्यटकांच्या गाडीचा भीषण अपघात झाला. पुण्याहून फिरण्यासाठी आलेल्या पर्यटकांच्या भरधाव थार जीपने दोन दुचाकींना जोरदार धडक दिली. ही धडक इतकी जबरदस्त होती की, यामध्ये परवेज हमदुले या स्थानिक तरुणाचा जागीच मृत्यू झाला.
मिळालेल्या माहितीनुसार, थार गाडीत चार पर्यटक होते. अपघातानंतर श्रीवर्धन पोलिसांनी तत्काळ कारवाई करत अपघातग्रस्त वाहन आणि त्यातील चारही जणांना ताब्यात घेतले आहे. हा अपघात नेमका कसा घडला, याचा तपास पोलिस करत असून आरोपींची कसून चौकशी सुरू आहे. पर्यटनासाठी आलेल्यांच्या बेगाम गाडीने स्थानिकाचा बळी घेतल्याने परिसरात हळहळ व्यक्त होत आहे.
बोरघाटात ट्रकचा चक्काचूर, चालकाचा अंत
दुसरीकडे, मुंबई-पुणे यशवंतराव चव्हाण एक्सप्रेस-वेवर खंडाळा बोरघाटातही भीषण अपघात झाला. पुण्याहून मुंबईकडे सिमेंटचे बॉक्स घेऊन जाणाऱ्या एका मालवाहू ट्रकचे नियंत्रण सुटल्याने हा अपघात घडला. अनियंत्रित झालेला हा ट्रक थेट अमृतांजन पुलावर जाऊन धडकला.
ही धडक इतकी भीषण होती की, ट्रक चालकाचा जागीच मृत्यू झाला. अपघातानंतर ट्रकमधील सिमेंटचे बॉक्स रस्त्यावर विखुरले गेले होते, ज्यामुळे मुंबईकडे जाणाऱ्या लेनवरील वाहतूक काही काळासाठी विस्कळीत झाली होती. घटनेची माहिती मिळताच खंडाळा बोरघाट पोलिसांनी घटनास्थळी धाव घेत परिस्थिती नियंत्रणात आणली आणि वाहतूक सुरळीत केली.
