गॅस सिलेंडरचे नवे दर जाहीर; LPG महागला की स्वस्त झाला? वाचा आजचे लेटेस्ट रेट

LPG Gas Price| जागतिक बाजारपेठेतील घडामोडींमुळे इंधनाच्या किमतींवर सातत्याने परिणाम होत असल्याचे पाहायला मिळत आहे. पश्चिम आशियाई देशांमध्ये सध्या सुरू असलेल्या भूराजकीय तणावामुळे आणि युद्धाच्या परिस्थितीमुळे आंतरराष्ट्रीय पातळीवर कच्च्या तेलाचे दर बदलले आहेत. याचे थेट प्रतिबिंब देशांतर्गत बाजारात उमटले असून पेट्रोल, डिझेल आणि सीएनजी (CNG) यांच्या दरांमध्ये चढ-उतार पहायला मिळत आहेत. आजचा एलपीजी दर काय आहे? जाणून घेऊया.

घरगुती सिलेंडरच्या किमती कायम

तेल वितरण कंपन्यांनी नुकतेच महिन्याच्या सुरुवातीला म्हणजेच १ जून रोजी इंधनाचे नवीन दर जाहीर केले आहेत. या ताज्या दरपत्रकानुसार, देशभरातील विविध राज्यांमध्ये १४.२ किलोग्रॅम वजनाच्या घरगुती एलपीजी (LPG) सिलेंडरच्या किमतींमध्ये कोणताही बदल करण्यात आलेला नाही. देशातील वेगवेगळ्या भागांत या घरगुती गॅस सिलिंडरची किंमत ₹९१०.५० ते ₹९५०.५० च्या दरम्यान स्थिर ठेवण्यात आली आहे.

महागाईच्या या काळात घरगुती गॅसच्या किमती नियंत्रणात राहिल्यामुळे मध्यमवर्गीय आणि सर्वसामान्य कुटुंबांच्या बजेटला मोठा आधार मिळाला आहे. पेट्रोल आणि डिझेलच्या वाढत्या दरांनी आधीच सर्वसामान्यांचे कंबरडे मोडले असताना, स्वयंपाकाचा गॅस महाग न झाल्याने गृहिणींना काहीसा दिलासा मिळाला आहे.

व्यावसायिक गॅस ग्राहकांना दरवाढीचा फटका

दुसरीकडे, व्यावसायिक क्षेत्रात वापरल्या जाणाऱ्या गॅस सिलिंडरच्या बाबतीत मात्र ग्राहकांच्या खिशाला कात्री लागली आहे. सार्वजनिक क्षेत्रातील तेल कंपन्यांनी १९ किलोग्रॅम वजनाच्या व्यावसायिक एलपीजी सिलेंडरच्या दरात वाढ करण्याचा निर्णय घेतला आहे. ही वाढ सर्व शहरांमध्ये एकसारखी नसून, स्थानिक करांनुसार ती वेगवेगळ्या प्रमाणात लागू करण्यात आली आहे.

या नवीन दरवाढीनुसार, देशाची राजधानी दिल्ली (Delhi) येथे व्यावसायिक वापराच्या सिलेंडरच्या किमतीत ४२ रुपयांची वाढ झाली आहे. तर दक्षिण भारतातील चेन्नई (Chennai) या महानगरामध्ये हाच व्यावसायिक सिलिंडर तब्बल ४६ रुपयांनी महागला आहे. या दरवाढीमुळे हॉटेल व्यावसायिक आणि किरकोळ खाद्यपदार्थ विक्रेत्यांच्या अडचणीत वाढ होण्याची शक्यता आहे.

News Title: LPG Gas Price Today New Commercial Rates