Ebola Virus Vaccine | कोरोनानंतर आता इबोलावर लस बनवणार; 200 हून अधिक मृत्यूंनी वाढली चिंता

Ebola Virus Vaccine | कोरोनानंतर आता इबोला विषाणूच्या नव्या आणि धोकादायक प्रकाराने जगभरात चिंता वाढवली आहे. आफ्रिकेतील काही देशांमध्ये या संसर्गाने गंभीर परिस्थिती निर्माण केली असून, त्यावर प्रभावी लस विकसित करण्यासाठी मोठ्या प्रमाणात प्रयत्न सुरू झाले आहेत. या मोहिमेत भारतातील जगप्रसिद्ध लस उत्पादक कंपनी Serum Institute of India देखील महत्त्वाची भूमिका बजावणार आहे.

डेमोक्रॅटिक रिपब्लिक ऑफ काँगो (DRC) आणि युगांडामध्ये इबोलाच्या “बुंदीबुग्यो” स्ट्रेनचा वेगाने प्रसार होत आहे. आतापर्यंत ३२१ रुग्णांची नोंद झाली असून ४८ जणांचा मृत्यू झाला आहे. जवळपास १,१०० संशयित रुग्ण आढळल्याने परिस्थिती गंभीर बनली आहे. या पार्श्वभूमीवर World Health Organization ने सार्वजनिक आरोग्य आणीबाणी जाहीर केली आहे.

या संकटाचा सामना करण्यासाठी जागतिक महामारी प्रतिबंधक संस्था Coalition for Epidemic Preparedness Innovations (CEPI) ने तब्बल ६० दशलक्ष डॉलर्सचा निधी जाहीर केला आहे. हा निधी इबोला बुंदीबुग्यो स्ट्रेनविरोधात लस विकसित करण्यासाठी वापरण्यात येणार आहे.

या प्रकल्पात अमेरिकेतील Moderna, ब्रिटनचे University of Oxford आणि International AIDS Vaccine Initiative (IAVI) यांचा समावेश आहे. यापैकी सर्वाधिक निधी मॉडर्नाला देण्यात आला असून, कंपनीच्या प्राथमिक क्लिनिकल चाचण्या आणि उत्पादनासाठी सुमारे ५० दशलक्ष डॉलर्स दिले जाणार आहेत.

लस निर्मितीसाठी आंतरराष्ट्रीय पातळीवर मोठे प्रयत्न

भारतीय कंपनी सीरम इन्स्टिट्यूट आणि ऑक्सफर्ड विद्यापीठ संयुक्तपणे “ChAdOx1 Bundibugyo” नावाची लस विकसित करत आहेत. हीच ती तंत्रज्ञान प्रणाली आहे ज्यावर कोविड काळात ऑक्सफर्ड-ॲस्ट्राझेनेका अर्थात “कोविशिल्ड” लस तयार करण्यात आली होती. त्यामुळे या लसीकडून मोठ्या अपेक्षा व्यक्त केल्या जात आहेत.

तज्ज्ञांच्या मते, बुंदीबुग्यो स्ट्रेनवर सध्या कोणतीही मान्यताप्राप्त लस किंवा प्रभावी उपचार उपलब्ध नाहीत. त्यामुळे नवीन लस विकसित करणे ही काळाची गरज बनली आहे. CEPI चे प्रमुख Richard Hatchett यांनी सांगितले की, पुढील काही महिन्यांत मानवी चाचण्यांसाठी लस तयार करण्याचे उद्दिष्ट ठेवण्यात आले आहे.

दरम्यान, IAVI संस्थेने विकसित केलेल्या एक-मात्रेच्या लसीचे प्राण्यांवरील प्राथमिक चाचण्यांमध्ये सकारात्मक परिणाम दिसून आले आहेत. ही लस Ervebo प्रमाणेच तंत्रज्ञान वापरते. एर्वेबोला इबोलाच्या झायर स्ट्रेनसाठी आधीच मान्यता मिळाली आहे.

मात्र, लस तयार करणे जितके महत्त्वाचे आहे तितकेच ती संघर्षग्रस्त आणि गरीब भागांपर्यंत पोहोचवणे हे मोठे आव्हान ठरणार आहे. पूर्व काँगोमधील अस्थिर सुरक्षा परिस्थिती आणि हिंसाचारामुळे क्लिनिकल चाचण्या घेणे कठीण असल्याचे तज्ज्ञांनी सांगितले आहे.

अस्थिर वातावरणातील आव्हाने आणि जागतिक मदत

या संकटाशी लढण्यासाठी इतर आंतरराष्ट्रीय संस्थांनीही मदतीचा हात पुढे केला आहे. जागतिक लस आघाडी Gavi, the Vaccine Alliance ने ५० दशलक्ष डॉलर्सची मदत जाहीर केली आहे, तर जागतिक बँकेच्या पँडेमिक फंडकडून २२०.६ दशलक्ष डॉलर्सचे अनुदान देण्यात आले आहे. जगभरातील वैज्ञानिक आणि आरोग्य संस्था आता ही महामारी नियंत्रणात आणण्यासाठी युद्धपातळीवर प्रयत्न करत आहेत.

News Title: Ebola Virus Vaccine Serum Institute CEPI