पुण्यात 11 लाखांची ब्राऊन शुगर जप्त:विक्री प्रकरणी वाघोलीत दोघांना अटक

वाघोली पोलिसांनी ब्राऊन शुगरची विक्री करणाऱ्या दोघांना अटक केली आहे. त्यांच्याकडून 11 लाख 38 हजार 900 रुपये किमतीची ब्राऊन शुगर जप्त करण्यात आली. या प्रकरणी दोघांविरुद्ध अमली पदार्थ प्रतिबंधक कायद्यान्वये गुन्हा दाखल करण्यात आला आहे. अटक करण्यात आलेल्या आरोपींची नावे शिव कालू सिंह (वय 33, रा. बालाजीनगर, वाघोली, मूळ रा. जोधपूर, राजस्थान) आणि मांगीलाल (रा. आकुर्डी) अशी आहेत. सहायक पोलीस फौजदार बाबासाहेब मोराळे यांनी वाघोली पोलीस ठाण्यात याबाबत फिर्याद दिली आहे. पोलिसांनी दिलेल्या माहितीनुसार, अहिल्यानगर रस्त्यावरील केसनंद येथील एका बसथांब्यावर आरोपी शिवसिंह ब्राऊन शुगर विक्रीसाठी येणार असल्याची माहिती पोलिसांना मिळाली होती. या माहितीच्या आधारे पोलिसांनी सापळा रचून त्याला पकडले. त्याची झडती घेतली असता, त्याच्याकडून ब्राऊन शुगर जप्त करण्यात आली. चौकशीदरम्यान, शिवसिंहने ही ब्राऊन शुगर आकुर्डी येथील मांगीलाल याच्याकडून आणल्याचे सांगितले. त्यानंतर पोलिसांनी तात्काळ कारवाई करत मांगीलाललाही ताब्यात घेतले. वाघोली पोलीस या प्रकरणाचा पुढील तपास करत आहेत. पिस्तूल बाळगणारे दोन सराईत जरबंद दरम्यान, पिस्तूल बाळगणाऱ्या दोन सराईत गुन्हेगारांना लक्ष्मीनगर पोलिसांनी अटक केली आहे. त्यांच्याकडून देशी बनावटीचे एक पिस्तूल आणि काडतूस जप्त करण्यात आले. अटक करण्यात आलेल्या आरोपींची नावे साजिद उर्फ डीजे मोहम्मद शेख (वय 20, रा. कामराजनगर, येरवडा) आणि शुभम राजेंद्र बोत (वय 26, रा. ढवळे वस्ती, घोरपडी) अशी आहेत. हे दोघेही सराईत गुन्हेगार असून, शेख याच्याविरुद्ध येरवडा पोलीस ठाण्यात यापूर्वीच गुन्हा दाखल होता आणि तो तेव्हापासून फरार होता. तपास पथकातील पोलीस कर्मचारी अक्षय शिंदे, कादीर शेख आणि अमोल गायकवाड यांना शेख त्याच्या घरी येणार असल्याची माहिती मिळाली होती. पोलिसांनी सापळा रचला असता, शेख आणि त्याचा साथीदार बोत हे पोलिसांना पाहून घराच्या खिडकीतून उतरून पळून जाण्याचा प्रयत्न करत होते. पोलिसांनी पाठलाग करून दोघांना पकडले आणि त्यांच्याकडून पिस्तूल व काडतूस जप्त केले.