सातारा गुन्हेगारी वृत्त:प्रेमविवाहानंतरच्या छळातून युवकाची आत्महत्या दहा जणांवर गुन्हा
प्रेमविवाह केल्यानंतर सातत्याने मानसिक व शारीरिक त्रास दिल्याचा आरोप असलेल्या प्रकरणात एका युवकाच्या आत्महत्येनंतर दहा जणांविरुद्ध आत्महत्येस प्रवृत्त केल्याचा गुन्हा फलटण शहर पोलीस ठाण्यात दाखल करण्यात आला आहे. दहिगाव (ता. माळशिरस, जि. सोलापूर) येथील किरण महादेव ढवळे (३५) यांनी विषारी औषध प्राशन करून जीवन संपविल्याची घटना घडली. त्यांच्या बहिणी शितल ढवळे यांनी दिलेल्या फिर्यादीनुसार, प्रेमविवाहाचा राग मनात धरून संबंधित नातेवाईकांकडून वारंवार मारहाण, धमक्या आणि पैशांसाठी तगादा लावण्यात येत होता. या सततच्या त्रासामुळे किरण यांनी टोकाचे पाऊल उचलल्याचा आरोप फिर्यादीत करण्यात आला आहे. या प्रकरणाचा तपास सहाय्यक पोलीस निरीक्षक शिंदे करीत आहेत. हुंड्याच्या मागणीवरून विवाहितेचा छळ; पतीसह चौघांवर कारवाई लग्नावेळी फ्रीज आणि कुलर न दिल्याचा मुद्दा उपस्थित करत विवाहितेला मानसिक त्रास दिल्याप्रकरणी पतीसह चार जणांविरुद्ध सातारा शहर पोलीस ठाण्यात गुन्हा दाखल झाला आहे. फिर्यादी महिलेने दिलेल्या माहितीनुसार, विवाहानंतर घरखर्च, भाडे आणि इतर आर्थिक जबाबदाऱ्या तिच्यावर टाकण्यात आल्या. तसेच वेळोवेळी शिवीगाळ, दमदाटी आणि पैशांची मागणी करण्यात येत होती. या तक्रारीनंतर पती, सासू, सासरे आणि नणंद यांच्यावर गुन्हा नोंद करण्यात आला असून पोलीस पुढील तपास करीत आहेत. दुचाकीतून देशी दारूची वाहतूक; जकातवाडी परिसरात पोलिसांची कारवाई जकातवाडी रोडवरील बोगदा परिसरात सातारा तालुका पोलिसांनी केलेल्या कारवाईत दुचाकीतून देशी दारूची अवैध वाहतूक करणाऱ्या व्यक्तीला पकडले. या कारवाईत ९० हजार रुपये किमतीची होंडा अॅक्टिव्हा आणि १०० देशी दारूच्या बाटल्या जप्त करण्यात आल्या. एकूण ९४ हजार रुपयांचा मुद्देमाल पोलिसांनी ताब्यात घेतला असून संबंधिताविरुद्ध गुन्हा दाखल करण्यात आला आहे. महामार्गालगतच्या हॉटेलवर धाड; मद्यसेवनासाठीचे साहित्य जप्त वाढेगाव हद्दीतील सातारा-पुणे महामार्गालगत असलेल्या एका हॉटेलवर सातारा तालुका पोलिसांनी छापा टाकून मद्यसेवनासाठी वापरले जाणारे साहित्य जप्त केले. कारवाईदरम्यान विदेशी मद्य, प्लास्टिक खुर्च्या, टेबल आणि काचेचे ग्लास असा मुद्देमाल ताब्यात घेण्यात आला. या प्रकरणी हॉटेल मालकासह चार जणांविरुद्ध गुन्हा दाखल करण्यात आला असून तपास सुरू आहे. संशयास्पद हालचाली करणाऱ्या युवकावर पोलीस कारवाई सार्वजनिक ठिकाणी चेहरा झाकून संशयास्पदरीत्या फिरत असल्याचे आढळून आल्याने एका युवकाविरुद्ध सातारा शहर पोलीस ठाण्यात गुन्हा दाखल करण्यात आला आहे. रिमांड होमजवळील ईदगा मैदान परिसरात पोलिसांनी ही कारवाई केली. संबंधित युवक स्वतःची ओळख लपवून संशयास्पद हालचाली करत असल्याचे निदर्शनास आल्याने महाराष्ट्र पोलीस कायद्यान्वये त्याच्यावर गुन्हा नोंद करण्यात आला. यवतेश्वर घाटात मद्यधुंद अवस्थेत गोंधळ; युवकाविरुद्ध गुन्हा यवतेश्वर घाट परिसरात सार्वजनिक ठिकाणी मद्यप्राशन करून गोंधळ घालणाऱ्या युवकावर सातारा तालुका पोलिसांनी कारवाई केली. सिमेंटच्या कट्ट्यावर बसून तो मद्यधुंद अवस्थेत गोंगाट करत असल्याचे आढळून आले. सार्वजनिक शांतता भंग केल्याप्रकरणी त्याच्याविरुद्ध महाराष्ट्र दारुबंदी अधिनियमांतर्गत गुन्हा दाखल करण्यात आला आहे. घरातील कपाट फोडून सोन्याचे दागिने लंपास शहरातील बॉम्बे रेस्टॉरंट परिसरातील एका घरात चोरीची घटना घडून जवळपास ४८ हजार रुपयांचे सोन्याचे दागिने चोरट्याने पळविल्याची नोंद झाली आहे. चोरट्याने घरातील कपाटातून मंगळसूत्र आणि सोन्याचे झुमके असा ऐवज लंपास केला. याप्रकरणी अज्ञात व्यक्तीविरुद्ध सातारा शहर पोलीस ठाण्यात गुन्हा दाखल करण्यात आला असून तपास सुरू आहे. वनवासवाडीत ज्येष्ठाने गळफास घेऊन जीवन संपविले खेड परिसरातील वनवासवाडी येथे ६९ वर्षीय व्यक्तीने राहत्या घरात गळफास घेऊन आत्महत्या केल्याची घटना घडली. नातेवाईकांनी त्यांना तातडीने जिल्हा शासकीय रुग्णालयात दाखल केले; मात्र डॉक्टरांनी तपासणीनंतर मृत घोषित केले. या घटनेची नोंद पोलिसांत करण्यात आली असून पुढील तपास सुरू आहे.
