घरातील टीव्ही ठरला यमदूत!:डोक्यावर कोसळताच 13 वर्षीय मुलीचा दुर्दैवी मृत्यू; जळगावातील हादरवणारी घटना
घरात खेळत असताना अचानक घडलेल्या एका दुर्घटनेत 13 वर्षीय मुलीचा दुर्दैवी मृत्यू झाल्याची घटना जळगाव जिल्ह्यातील आमोदा गावात घडली आहे. घरातील कपाटावर ठेवलेला अवजड टीव्ही अचानक खाली कोसळून मुलीच्या डोक्यावर पडल्याने ही दुर्घटना घडली. नाझमीन मोहम्मद इसहाक पिंजारी असे मृत मुलीचे नाव असून या घटनेने संपूर्ण गावात हळहळ व्यक्त केली जात आहे. रविवारी सकाळच्या सुमारास नाझमीन घरात असताना ही घटना घडली. घरातील एका रिकाम्या कपाटावर ठेवलेला टीव्ही अचानक तोल जाऊन खाली पडला. टीव्ही थेट नाझमीनच्या डोक्यावर कोसळल्याने ती गंभीर जखमी झाली. मोठा आवाज झाल्यानंतर कुटुंबीय घटनास्थळी धावले असता नाझमीन रक्ताच्या थारोळ्यात पडलेली दिसली. हा प्रकार पाहून कुटुंबीयांना मोठा धक्का बसला. मुलीच्या अचानक निधनाने कुटुंबीयांवर दुःखाचा डोंगर
जखमी अवस्थेतील नाझमीनला तातडीने भुसावळ येथील रुग्णालयात नेण्यात आले. मात्र, उपचारापूर्वीच तिचा मृत्यू झाल्याचे डॉक्टरांनी घोषित केले. मुलीच्या अचानक झालेल्या निधनामुळे कुटुंबीयांवर दुःखाचा डोंगर कोसळला असून परिसरात शोककळा पसरली आहे. गावकऱ्यांनीही पिंजारी कुटुंबीयांच्या घरी धाव घेत त्यांचे सांत्वन केले. दरम्यान, या घटनेची माहिती मिळाल्यानंतर पोलिसांनी घटनास्थळाची पाहणी केली. मुलीचे वडील मोहम्मद इसहाक पिंजारी यांच्या माहितीवरून यावल पोलिस ठाण्यात अकस्मात मृत्यूची नोंद करण्यात आली आहे.
