Buldhana Father, Brother Confess Murder; Girl Returns Alive

.

जळगाव जामोद परिसरातील राजुरा धरणाजवळ काही दिवसांपूर्वी एका तरुणीचा अर्धवट जळालेला मृतदेह आढळला होता. त्याच सुमारास खगनार पोलिस ठाण्याच्या हद्दीतील खडकी गावातील 26 वर्षीय शिवानी कळमेकर नामक तरुणी बेपत्ता असल्याची माहिती पोलिसांना मिळाली होती. पोलिसांनी या दोन्ही घटनांची सांगड घालत सदर मृतदेह शिवानीचाच असल्याचा अंदाज बांधला. त्यानंतर तिचे वडील बापूराम कळमेकर व भाऊ अजय कळमेकर यांना संशयित म्हणून ताब्यात घेतले. या दोघांना जळगाव जामोद न्यायालयासमोर हजर केले असता या दोघांनीही शिवानीच्या हत्येची कबुली दिली.

न्यायालयाने बापूराम कळमेकर व अजय कळमेकर या दोघांनाही 6 दिवसांची पोलीस कोठडी सुनावली. पण गत 28 मे रोजी शिवानी स्वतः खगनार पोलिस ठाण्यात हजर झाली आणि आपण जिवंत असल्याचे सांगितले. या एका धक्कादायक प्रसंगाने संपूर्ण प्रकरण उलटे फिरले. पोलिसांनी जो मृतदेह शिवानीचा मानला तो मृतदेह कुणाचा होता? व वडील व मुलाने खुनाची खोटी कबुली का दिली? असा प्रश्न पोलिसांपुढे उपस्थित झाला. पण त्यानंतर पोलिस तपासात हळूहळू सत्य उघड झाले.

वडील व भावाच्या मनात शिवानी पळून गेल्याचा होता राग

शिवानी आपल्या घरातून कुणालाही न सांगता पळून गेली होती. या गोष्टीचा प्रचंड राग बापूराम व अजय या दोघांच्याही मनात खदखदत होता. दरम्यान, एका वेगळ्याच प्रकरणात पोलिसांनी त्यांना ताब्यात घेतले असता संतापाच्या भरात त्यांनी अज्ञात मुलीच्या हत्येची जबाबदारी स्वतःवर घेतली आणि पोलिसांची दिशाभूल केली. दोघांनी सुटकेनंतर स्पष्ट केले की पोलिसांनी कोणताही दबाव अथवा आमिष दाखवले नव्हते, तर रागाच्या भरात आपण हत्येचा गुन्हा मान्य करण्याचे पाऊल उचलले.

अखेर पोलिसांनी बाप-लेकाची बुलढाणा कारागृहातून सुटका केली. मात्र राजुरा धरण परिसरात सापडलेला अर्धवट जळालेला मृतदेह नक्की कुणाचा, हा प्रश्न अजूनही अनुत्तरित असून तो शोधण्याचे मोठे आव्हान पोलिसांपुढे उभे टाकले आहे.

हे ही वाचा…

संतोष देशमुख हत्या प्रकरणात मोठी अपडेट:धनंजय देशमुख यांच्या साडूला सख्ख्या भावानेच दिली जीवे मारण्याची धमकी, पोलिसांत तक्रार

मस्साजोगचे सरपंच संतोष देशमुख हत्या प्रकरणाने आता आणखी एक धक्कादायक वळण घेतले आहे. या खटल्यातील एक प्रमुख साक्षीदार असलेल्या दादा खिंडकर यांना साक्ष मागे घेण्यासाठी चक्क त्यांच्या सख्ख्या भावानेच जीवे मारण्याची धमकी दिल्याची बाब समोर आली आहे. या प्रकरणी बीडच्या शिवाजीनगर पोलिस ठाण्यात अदखलपात्र गुन्ह्याची नोंद करण्यात आली आहे. या घटनेमुळे बीडमध्ये एकच खळबळ माजली आहे. वाचा सविस्तर