तुरुंगातूनही आंदेकर टोळीची दहशत!:अहिल्यानगरमध्ये मोठा कट उधळला, शस्त्रास्त्रांसह 5 सराईत गजाआड; लाखोंचा मुद्देमालही जप्त
महापालिका निवडणुकांच्या पार्श्वभूमीवर पुण्यात हत्या आणि हत्येच्या प्रयत्नांसारखे गंभीर गुन्हे करणारी आंदेकर टोळी, त्यांचे प्रमुख तुरुंगात असतानाही शहरासह शेजारील जिल्ह्यांमध्ये सक्रिय असल्याचे धक्कादायक वास्तव पोलिस तपासातून उघड झाले आहे. कारागृहाच्या भिंतींआड बसूनही पूर्ववैमनस्यातून या गुन्हेगारी कारवायांची सूत्रे हलवली जात असून, नुकतीच अहिल्यानगरमध्येही याची प्रचिती आली आहे. जिथे पोलिसांनी कारवाई करत आंदेकर टोळीतील पाच जणांना बेड्या ठोकल्या आहेत आणि त्यांच्याकडून मोठा शस्त्रसाठा जप्त केला आहे. आंदेकर टोळी तुरुंगातूनही सक्रिय असल्याचे उघडकीस आल्यानंतर, पुण्याचे पोलिस आयुक्त अमितेश कुमार यांनी राज्य कारागृह प्रशासनाला पत्र लिहून आंदेकर पिता-पुत्रासह टोळीतील प्रमुख गुंडांवर कारागृहातच कडक निर्बंध घालण्याची मागणी केली आहे. तर दुसरीकडे, याच कुख्यात टोळीतील पाच जणांना अहिल्यानगर स्थानिक गुन्हे शाखेच्या पोलिसांनी मिरावली पहाडच्या पायथ्याशी अटक केली आहे. दरोड्याच्या तयारीत असलेल्या मुश्ताक शेख, विराट मेहंदळे, समर्थ माडळकर, समर्थ दूधभाते आणि आकाश पवार या पाचही जणांना बेड्या ठोकण्यात पोलिसांना यश आले असून, या धडक कारवाईमुळे दरोड्याचा एक मोठा कट उधळला गेला आहे. 4 पिस्तूल, 10 जिवंत काडतुसे, 1 कोयता आणि मुद्देमाल जप्त या कारवाईत पोलिसांनी आरोपींकडून 4 पिस्तूल, 10 जिवंत काडतुसे, 1 कोयता आणि एका चाकूसह एकूण 2 लाख 76 हजार रुपयांचा मुद्देमाल जप्त केला आहे. विशेष म्हणजे, अटक करण्यात आलेल्या या आरोपींपैकी समर्थ माडळकर आणि समर्थ दूधभाते यांच्यावर पुणे शहरात खुनाचा प्रयत्न, बेकायदा शस्त्र बाळगणे आणि मकोका अंतर्गत यापूर्वीच अनेक गंभीर गुन्हे दाखल असल्याची माहिती समोर आली आहे. बंडू आंदेकर धुळे जिल्हा कारागृहात सध्या आंदेकर टोळीचा मुख्य सूत्रधार सूर्यकांत ऊर्फ बंडू आंदेकर हा धुळे जिल्हा कारागृहात, तर त्याचा मुलगा कृष्णा आंदेकर हा नंदुरबार कारागृहात बंदिस्त आहे. खंडणी आणि खुनासारख्या अनेक गंभीर गुन्ह्यांची नोंद असलेल्या या पिता-पुत्रांवर मकोका अंतर्गत कारवाई करण्यात आली असून ते न्यायालयीन कोठडीत आहेत. मात्र असे असतानाही त्यांच्याकडून कारागृहातूनच चालवली जाणारी ही संघटित गुन्हेगारी संपूर्णपणे मोडीत काढण्यासाठी आता पुणे पोलीस ‘ॲक्शन मोड’मध्ये आले आहेत.
