भंडाऱ्यांसाठी 1 हजार 100 ताट, ग्लास उपलब्ध:" माय वसुधा विकास'' ची चौथी शाखा; पर्यावरण संवर्धनाचा ध्यास
शहरात प्लास्टिक डिस्पोजेबलचा वापर कमी होऊन पर्यावरण रक्षण व्हावे, यासाठी कार्य करणाऱ्या माय वसुधा विकास संस्थेतर्फे १ वर्षांपासून “प्लॅस्टिक डिस्पोजेबलमुक्त अकोला अभियान’ राबवण्यात येत आहे. या संस्थेने आता चौथी शाखा कार्यासाठी सुरू केली असून, या अंतर्गत संस्थेने ११०० ताटे, ग्लास, चमचे, वाट्या, चहाचे पेले, मठ्ठाचे पेले, नाष्टा प्लेट निःशुल्क उपलब्ध झाले आहेत. फक्त न्या, वापरा आणि स्वच्छ धुऊन परत करा, एवढंच अकोलेकरांना करायचं असल्याचे संस्थेचे म्हणणे आहे. डॉ. मनीषा पालीवाल आणि डॉ. योगेश पालीवाल यांच्या माय वसुधा विकास संस्थेतर्फे पर्यावरण संरक्षणाच्या दृष्टीने व प्लास्टिक डिस्पोजेबलचा वापर लोकांनी टाळावा, यासाठी निःशुल्क ताट, ग्लास, वाट्या,चमचे, नाष्टा प्लेट, चहाचे पेले, मठ्ठासाठी पेले, वेस्ट टब इत्यादी उपलब्ध करुन देण्यात येतात. यासाठी विविध ठिकाणी शाखा सुरू केल्या आहेत. चौथ्या शाखेचे कामकाज आता सुरू झाले आहे. याप्रसंगी विजय गोखले, प्रा. डॉ. महेश डाबरे, डॉ. मनीषा पालीवाल, डॉ. दिनकर देशमुख व अमोल पाचकवडे यांच्या उपस्थितीत स्टीलचे ताट, ग्लास, चमचे व इतर साहित्याचे लोकार्पण करण्यात आले. संस्थेतर्फे आजपर्यंत १ लाख ६० हजार पत्रावळ्या, ३ लाख २० हजार द्रोण, १ लाख ८० हजार हजार ग्लास, सात हजार नऊशे चमचे, पाच हजार दोनशे नाष्टा प्लेट, आठ हजार तीनशे चहाचे/ दुधाचे कप इतका प्लॅस्टिक डिस्पोजेबलचे कचरा वाचवण्यात यश आल्याचे डॉ. मनीषा पालीवाल यांचे म्हणणे आहे.
