[ads1]
नवी दिल्ली23 मिनिटांपूर्वी
- कॉपी लिंक
जंतर-मंतरवरील आंदोलनानंतर देशभरात चर्चेत आलेल्या कॉकरोच जनता पार्टीमध्ये (CJP) उभी फूट पडली आहे. सीजेपीचे संस्थापक अभिजीत दिपके यांनी दिल्लीचे माजी मुख्यमंत्री अरविंद केजरीवाल यांच्यासोबत हातमिळवणी करून आंदोलनाचा सौदा केला, असा गंभीर आरोप करत मूळ आंदोलनातील प्रमुख कार्यकर्ते मनीष ब्रह्मभट्ट यांनी गुरुवारी (3 सप्टेंबर) ‘कॉकरोच जनता पार्टी डेमोक्रेटिक’ (CJP-D) या नव्या राजकीय पक्षाची अधिकृत घोषणा केली. या बंडामुळे युवा आंदोलनाच्या नावाखाली स्थापन झालेल्या या पक्षात अंतर्गत वाद चव्हाट्यावर आला आहे.
घरी बसून 12 जणांची टीम बनवली, मित्रांचा आणि आपच्या नेत्यांचा भरणा
अहमदाबादचे रहिवासी असलेले आणि आंदोलनात सुरुवातीपासून सक्रिय राहिलेले मनीष ब्रह्मभट्ट यांनी नवी दिल्लीत पत्रकार परिषद घेऊन अभिजीत दिपके यांच्यावर थेट तोफ डागली. “जंतर-मंतरवरील आंदोलन देशातील सामान्य जनतेच्या आणि विद्यार्थ्यांच्या घामातून उभे राहिले होते. मात्र, आंदोलन यशस्वी होताच ते पूर्णपणे विकले गेले. अभिजीत दिपके यांनी घरी बसून स्वतःच्या मर्जीने १२ लोकांची राष्ट्रीय कोअर टीम तयार केली. यासाठी रस्त्यावर उतरलेल्या कोणत्याही विद्यार्थ्याला, कार्यकर्त्याला विश्वासात घेण्यात आले नाही.”
मैत्रिणी आणि कॉलेजचे मित्र कोअर टीममध्ये
“या 12 जणांच्या समितीत कोणत्याही निकषांशिवाय थेट आम आदमी पक्षाशी (AAP) संबंधित आठ जणांचा, स्वतःच्या मैत्रिणींचा आणि कॉलेजच्या मित्रांचा समावेश करण्यात आला. प्रत्येक राज्यातून ५ प्रतिनिधी निवडून लोकशाही मार्गाने राष्ट्रीय टीम बनवण्याची आमची मागणी दिपके यांनी फेटाळून लावली,” असा आरोप ब्रह्मभट्ट यांनी केला.
अण्णांनंतर आता दिपकेचा वापर; केजरीवालांनी आंदोलन हायजॅक केले
अरविंद केजरीवाल आणि अभिजीत दिपके यांच्यात ‘पॉलिटिकल डील’ झाल्याचा दावा करत ब्रह्मभट्ट म्हणाले, “केजरीवाल यांचा राजकीय इतिहासच आंदोलनांचा गैरवापर करून स्वतःची सत्ता मिळवण्याचा राहिला आहे. त्यांनी अण्णा हजारेंच्या आंदोलनाचा वापर करून स्वतःची राजकीय पोळी भाजली आणि नंतर मूळ तत्त्वे बाजूला सारली. आता तोच प्रकार कॉकरोच जनता पार्टीसोबत घडला असून केजरीवाल यांनी दिपके यांच्या माध्यमातून संपूर्ण आंदोलन हायजॅक केले आहे.”
सीजेपी म्हणजे ‘टीम केजरीवाल’
“झारखंडमध्ये जेव्हा विद्यार्थ्यांचे मोठे आंदोलन झाले, तेव्हा सीजेपीचे नेते तिकडे फिरकलेही नाहीत. कारण भाजपशासित राज्यांव्यतिरिक्त इतर विरोधी पक्षांच्या सत्ता असलेल्या राज्यांमध्ये आंदोलने न करण्याचे आदेश त्यांच्या ‘बॉस’कडून म्हणजे केजरीवालांकडून दिले गेले होते.”
मुस्लिम, शीख आणि विद्यार्थ्यांचे प्रतिनिधित्व शून्य
नव्या कार्यकारणीतील रचनेवर आक्षेप नोंदवताना ब्रह्मभट्ट यांनी सीजेपीच्या सर्वसमावेशकतेवर प्रश्न उपस्थित केले. “राष्ट्रीय कोअर टीममध्ये एकाही सामान्य विद्यार्थ्याचा समावेश करण्यात आलेला नाही. आंदोलनाच्या काळात ज्या शीख समाजाने गुरुद्वारांचे दरवाजे उघडून लंगर वाटले, त्या समाजातील एकाही शीख प्रतिनिधीला स्थान मिळाले नाही. तसेच एकाही मुस्लिम पुरुषाला या टीममध्ये घेण्यात आलेले नाही.”
“आरजेडी, समाजवादी पार्टी, शिवसेना आणि राष्ट्रवादीच्या ज्या कार्यकर्त्यांनी पक्षाचे जोडे बाजूला ठेवून या जनआंदोलनाला जाहीर पाठिंबा दिला होता, त्यापैकी कोणालाही विश्वासात घेतले गेले नाही.”
‘CJP डेमोक्रेटिक’ची भूमिका
आपण भाजपच्या पाठीशी नसल्याचे स्पष्ट करत मनीष ब्रह्मभट्ट म्हणाले की, कॉकरोच आंदोलनाची मूळ कल्पना ही देशातील भ्रष्ट व्यवस्थेविरोधात लढण्याची होती. त्यामुळे कोणत्याही एका नेत्याची किंवा ‘आप’ची हुकूमशाही मोडून काढण्यासाठी आणि प्रत्येक राज्याला समान अधिकार देण्यासाठी ‘CJP डेमोक्रेटिक’ ची स्थापना करण्यात आली असून, राज्यनिहाय कार्यकर्त्यांना एकत्र आणून हा लढा पुढे सुरू ठेवला जाईल.
आम्ही भाजपसोबतही नाही
नवीन CJP-D ची भूमिका कोणत्याही राजकीय पक्षाच्या बाजूने नसल्याचे स्पष्ट करण्याचाही ब्रह्मभट्ट यांनी प्रयत्न केला. CJP-D ही भाजपसोबत नाही आणि भ्रष्ट व्यवस्था बदलण्यासाठी सुरू झालेली चळवळ कोणत्याही एका पक्षाच्या राजकीय फायद्यासाठी वापरली जाऊ नये, असे त्यांनी सांगितले. त्यांच्या मते, भ्रष्टाचार आणि चुकीच्या व्यवस्थेविरोधातील लढा प्रत्येक राज्यात पोहोचवण्याची गरज आहे. त्यासाठी स्थानिक पातळीवरील कार्यकर्ते, विद्यार्थी, स्वयंसेवक आणि आंदोलनात प्रत्यक्ष सहभागी झालेल्या लोकांना निर्णय प्रक्रियेत स्थान मिळाले पाहिजे.
CJP समोर आता नव्या आव्हानाची स्थिती
CJP-D च्या घोषणेमुळे आधीच चर्चेत असलेल्या CJP मधील अंतर्गत मतभेद आता सार्वजनिक झाले आहेत. एकीकडे अभिजीत दीपके यांच्या नेतृत्वाखालील मूळ CJP आहे, तर दुसरीकडे आंदोलनातील मूळ कार्यकर्त्यांना प्रतिनिधित्व मिळत नसल्याचा दावा करत ब्रह्मभट्ट यांनी स्वतंत्र व्यासपीठ उभे केले आहे. आंदोलनातून निर्माण झालेल्या संघटनेवर कोणाचा अधिकार, निर्णयप्रक्रियेत कार्यकर्त्यांचा सहभाग किती आणि संघटनेचा राजकीय पक्षांपासून नेमका संबंध काय, हे प्रश्न आता केंद्रस्थानी आले आहेत. ब्रह्मभट्ट यांनी केलेले आरोप आणि CJP-D ची स्थापना यामुळे या संघर्षाला पुढे कोणते स्वरूप मिळते, याकडे राजकीय वर्तुळाचे लक्ष लागले आहे.
हेही वाचा…
दिपके म्हणाले- CJP कोणत्याही पक्षाची ‘बी टीम’ नाही: म्हटले- आम्ही विद्यार्थ्यांची A टीम, नेत्यांच्या पदवीवरही प्रश्नचिन्ह उपस्थित केले
कॉकरोच जनता पार्टी (CJP) चे संस्थापक अभिजीत दिपके यांनी आपल्या संस्थेला काँग्रेस किंवा आम आदमी पार्टीची ‘बी टीम’ म्हटले जात असल्याच्या आरोपांचे खंडन केले. ते म्हणाले- महाराष्ट्राचे मुख्यमंत्री म्हणतात की मी काँग्रेसची बी टीम आहे आणि काही लोक म्हणतात की मी आम आदमी पार्टी (AAP) ची बी टीम आहे. मला वाटते की या सर्व लोकांनी एकत्र बसून ठरवावे की मी कोणाची बी टीम आहे. तर, आमच्या मते आम्ही विद्यार्थ्यांची ए टीम आहोत. येथे वाचा संपूर्ण बातमी
[ads2]
Leave a Reply