मुंबई-आग्रा महामार्गावर भीषण अपघात:चालकाला हृदयविकाराचा झटका आला, नियंत्रण सुटले अन् बस उलटली; प्रवाशी थोडक्यात बचावले
मुंबई-आग्रा राष्ट्रीय महामार्गावर आज एक थरारक आणि भीषण अपघाताची घटना घडली. नाशिकहून मालेगावाकडे जाणाऱ्या एका एसटी बसच्या चालकाला गाडी चालवत असतानाच अचानक हृदयविकाराचा तीव्र झटका आला. यामुळे चालकाचे बसवरील नियंत्रण सुटले आणि भरधाव बस महामार्गालगतच्या झाडावर जाऊन जोरात आदळली. हा अपघात इतका भीषण होता की, बसच्या धडकेमुळे एक मोठे झाड मुळासकट उन्मळून पडले असून बसचेही मोठे नुकसान झाले आहे. सुदैवाने, या अपघातात कोणतीही जीवितहानी झाली नसून नशीब बलवत्तर म्हणून प्रवाशांचा जीव वाचला आहे. मिळालेल्या प्राथमिक माहितीनुसार, ही बस नेहमीप्रमाणे नाशिकहून प्रवाशांना घेऊन मालेगावाकडे निघाली होती. बस उमराने गावाच्या शिवारात आली असता, चालकाला अचानक छातीत असह्य वेदना होऊ लागल्या. हृदयविकाराचा झटका आल्यामुळे चालकाचा स्टिअरिंगवरील ताबा सुटला. भरधाव वेगात असलेली बस महामार्गावरून खाली उतरली आणि रस्त्याकडेला असलेल्या एका झाडावर जाऊन आदळली. धडक इतकी जोरात होती की बस पलटी झाली आणि ते झाड उन्मळून पडले. ४ प्रवासी किरकोळ जखमी अपघात होताच बसमधील प्रवाशांमध्ये एकच आक्रोश निर्माण झाला. बसमधील खिडक्यांच्या काचा फुटल्या आणि मोठा आवाज झाल्याने परिसरातील ग्रामस्थ आणि महामार्गावरून जाणारे इतर वाहनचालक तातडीने मदतीसाठी धावले. बसमध्ये सुमारे ३० ते ४० प्रवासी असल्याची शक्यता वर्तवण्यात येत आहे. नशिबाने बस झाडावर अडकल्याने ती अधिक वेगाने पलटी झाली नाही, ज्यामुळे मोठी जीवितहानी टळली. या घटनेत ४ प्रवासी किरकोळ जखमी झाले आहेत. जखमींवर उपचार आणि चालकाची प्रकृती अपघाताची माहिती मिळताच पोलिसांनी घटनास्थळी धाव घेतली. जखमी झालेल्या चार प्रवाशांना तातडीने मालेगाव येथील शासकीय रुग्णालयात प्राथमिक उपचारासाठी दाखल करण्यात आले आहे. त्यांची प्रकृती स्थिर असल्याची माहिती आहे. दुसरीकडे, हृदयविकाराचा झटका आलेल्या बस चालकाला तातडीने एका खासगी रुग्णालयात अतिदक्षता विभागात हलवण्यात आले असून, त्यांच्यावर तज्ज्ञ डॉक्टरांच्या देखरेखीखाली उपचार सुरू आहेत.
