नाशिक TCS धर्मांतर प्रकरण:फरार निदा खान आरोपींच्या संपर्कात; दानिशच्या मोबाईलमधून संशयास्पद फोटो SIT च्या हाती

नाशिक येथील TCS मल्टिनॅशनल कंपनीतील धर्मांतर प्रकरणाचा तपास आता अधिक सखोल झाला असून, यातील मुख्य संशयित आणि सध्या फरार असलेली निदा खान ही अटकेत असलेल्या इतर आरोपींच्या सतत संपर्कात असल्याची धक्कादायक माहिती समोर आली आहे. विशेष तपास पथकाने केलेल्या तांत्रिक विश्लेषणामध्ये ही बाब निष्पन्न झाली असून, यामुळे या प्रकरणाचे गांभीर्य आणि गुंतागुंत अधिकच वाढली आहे. फरार असूनही निदा खानचा आरोपींशी असलेला सक्रिय संपर्क या प्रकरणामागे मोठे धागेदोरे असण्याची शक्यता अधोरेखित करत असून, पोलिस आता या प्रकरणाच्या मुळाशी जाण्यासाठी तपासाची व्याप्ती वाढवत आहेत. पोलिस तपासात मिळालेल्या माहितीनुसार, निदा खानने संबंधित कंपनीतील नोकरी सोडल्यानंतरही तिचे इतर आरोपींसोबतचे संबंध कायम असल्याचे स्पष्ट झाले आहे. मोबाईल कॉलिंग डिटेल्सच्या तांत्रिक विश्लेषणानुसार, निदा आणि इतर आरोपींमध्ये सातत्याने संवाद होत होता, असे निष्पन्न झाले आहे. या नियमित संपर्कातून केवळ धर्मांतरच नव्हे, तर फसवणुकीचा एक मोठा कट रचला गेल्याचा दाट संशय आता तपास यंत्रणांना येत असून, त्या दिशेने पोलिस आता अधिक सखोल तपास करत आहेत. या प्रकरणातील दुसरा आरोपी दानिश शेख याच्या मोबाईलच्या तपासणीतून विशेष तपास पथकाच्या हाती अत्यंत महत्त्वाचे धागेदोरे लागले आहेत. दानिशच्या मोबाईलमध्ये अनेक संशयास्पद फोटो आणि व्हिडिओ आढळून आले असून, या महत्त्वपूर्ण डिजिटल पुराव्यांचे आता तांत्रिक स्तरावर सखोल विश्लेषण केले जात आहे. या व्हिडिओंच्या माध्यमातून धर्मांतर प्रकरणाचे नेमके गूढ उकलण्याची आणि यामध्ये आणखी कोणाचे चेहरे समोर येणार, याकडे सर्वांचे लक्ष लागले आहे. 27 एप्रिल रोजी न्यायालयीन सुनावणी विशेष तपास पथकाकडून सध्या सर्व तांत्रिक आणि डिजिटल पुराव्यांची कसून जुळवाजुळव केली जात असतानाच, आता सर्वांचे लक्ष 27 एप्रिल रोजी होणाऱ्या न्यायालयीन सुनावणीकडे लागले आहे. या दिवशी या प्रकरणातील संशयित आणि फरार निदा खान हिच्या जामीन अर्जावर न्यायालयात सुनावणी होणार असून, पोलिस तपासात हाती लागलेले भक्कम पुरावे सादर करण्याची शक्यता आहे. या सुनावणीत आरोपींना जामीन मिळणार की त्यांच्या पोलिस कोठडीत वाढ होऊन तपासाचा फास अधिक आवळला जाणार, हे पाहणे आता महत्त्वाचे ठरेल. संशयित आरोपी दानिश शेख अत्यंत चलाख नाशिक येथील प्रकरणातील संशयित आरोपी दानिश शेख हा तांत्रिकदृष्ट्या अत्यंत प्रगत आणि चलाख असल्याचे तपासात समोर आले आहे. त्याने आपल्या मोबाईलमधील प्रत्येक फाईल, चॅट आणि ॲप्लिकेशनसाठी स्वतंत्र पासवर्ड वापरण्यासोबतच प्रगत ‘फेस आयडी’ सुरक्षा प्रणाली सक्रिय केली होती. या कडक सुरक्षा कवचा मुळे पंचवटी येथील प्रादेशिक न्यायसहाय्यक वैज्ञानिक प्रयोगशाळेला (FSL) तांत्रिक विश्लेषण करण्यात मोठ्या अडचणी येत होत्या. पासवर्ड क्रॅक करणे अत्यंत कठीण झाल्याने तपासाची गती काहीशी मंदावली होती. तपासातील हा तांत्रिक पेच सोडवण्यासाठी एसआयटी प्रमुख तथा सहायक पोलीस आयुक्त संदीप मिटके यांनी न्यायालयाकडे विशेष परवानगी मागितली होती. न्यायालयाच्या आदेशानुसार, दानिशला शुक्रवारी (दि. 24) दिंडोरी रोडवरील फॉरेन्सिक लॅबमध्ये नेण्यात आले आणि तिथे कायदेशीर प्रक्रियेद्वारे संशयिताच्या प्रत्यक्ष ‘फेस आयडी’चा वापर करून मोबाईल यशस्वीरीत्या अनलॉक करण्यात आला. आता या मोबाईलमधील व्हॉट्सॲप चॅट्स, ई-मेल्स, फोटो आणि व्हॉईस रेकॉर्डिंगचे सखोल विश्लेषण सुरू झाले असून, यातून अनेक खळबळजनक खुलासे होण्याची शक्यता वर्तवली जात आहे.